99 % من اللي قلته يا مستر
لا يختلف عليه اتنين عقلاء اكيد

الاختلاف الوحيد
ان في ناس متعقدة من حكم العسكر
الحكم اللي يستمر بالعشرة و العشرين و التلاتين سنة
و ساعتها مابيبقاش حرصا علي مصلحة مصر كما يزعم الزاعمون
و لكن عشان يركبوا الكرسي
و أدينا شوفنا
الثورة اصلا قامت علي ناس عسكر
(( مبارك و بقايا حزب السادات و ديكتاتورية زرعها عبد الناصر ))
60 سنة اهو من حكم العسكر

هوا احنا يا مستر بنحكم علي العسكر
نحبهم او نكرههم بناءا علي ايه ؟؟؟
مش بناءا علي خبرة و تجربة و رؤيا العين ؟؟؟

اللي شوفناه طول ستين سنة جاب مصر لورا
عبد الناصر كان كاره لكل ماهو اسلامي
و سحل و عذب الكثيرين
السادات في اخر ايامه خرف و برضه سحق كل معارضيه و سجنهم
مبارك طبعا ... ما يتحكيش عليه
كان بيلعب بمزاج

فالتجربة كلها مره
مفيش شئ مشجع عشان الشعب المصري يتمسك بحكم العسكر
و انا عن نفسي بفرق و فاهم اوي الفرق بين الجيش كجيش
حامي البلد
رجالة
و صاعقة
و التزام و قوة
و حماية حدود
و دراع مصر اليمين القوي

و بين أفراد عسكريين يعشقون الحكم
و يتمسكون به كتمسكهم بالحياة

انا الحمد لله قادر افرق بين الاتنين
و اقدر افصل بينهم في حكمي عليهم أو رأيي فيهم
الجيش علي العين و الراس
و انا ضد كل من يشتم او يسب
و ضد كل الجزم من شباب البوكسرات اللي حضرتك ذكرتهم
اللي بيتعاملوا بكل قلة ادب
و مش فاهمين يعني ايه جيش مصر

لكن في نفس الوقت
نفسي يحكمنا مدنيين
ناس تعرف يعني ايه سياسة بجد
الشعب ده شعب عاطفي جدا
عايز اللي يسايسه
و يعرف لغته و لهجته
و يتكلم معاه كلام من القلب للقلب
و يعرف مشاكله
و يعامله باحترام

العسكر مش كده
و لا متدربين علي كده
و لا دي حياتهم اصلا

حياتهم كلها طوابير و اسلحة و تدريبات و عنف
حياتهم كلها التزام و أحكام عسكرية و طاعة عمياء

و فرق كبير بين عقيد جيش بيقود كتيبة
و بين قائد سياسي محنك بيقود بلد أو أمة

معتقدش انهم ينفعوا نهائي للحكم الدائم ... بدليل التجربة
و في نفس الوقت ... مش عايزهم حالا يشيلوا ايديهم خالص من كل حاجة
انتقاما من الشعب اللي رافض حكمهم !!

شكرا يا مستر علي موضوعك