ممكن توضيح
يا مستر اضراب عن العمل ازاى ؟؟
يعنى نروح مدارسنا ومندخلش الفصول يعنى ولا نشتغل ؟؟؟
لو استنتاجى صح
أنا مقدرش أعمل كده
أنا عارفه ان المعلم مش واخد حقه بتاتا
وأنا من ضمن المئات اللى بدأوا السلم من أوله
شغل حصص وبعدين عقد مميز وبعدين معلم مساعد
وبهدله ملهاش أول من آخر
إلى أن تم تثبيتنا من شهور بسيطه
وعارفه أن المدرس يستاهل يتقدر أكتر من كده
وأن مرتبه مبيكفيش 10 أيام من الشهر
بس أنا مقدرش أسيب الطلبه تيجى المدرسه
وأقعد كده وأقول مش هشتغل و لا هعلمكم
أصل وزارتنا مش عاوزه تدينا حقنا
لما تدينا أبقى أعلمكم
طيب الولاد ذنبهم إيه فى ده ؟؟

ممكن نطالب بحقنا
بس مش بوسيلة الاضراب عن العمل
وبعدين احنا نضرب عن العمل
وجهاز الشرطه يضرب عن العمل
ووزارة الصحه بكامل هيئاتها تضرب عن العمل
وقطاع التموين يضرب عن العمل
والفلاحين يضربوا عن العمل
والسواقيين يضربوا عن العمل
والعمال يضربوا عن العمل
مصر تروح فين بقى
تشوف حد تانى يشتغل فيها

معلش احنا استحملنا كتير
معلش نستحمل سنه أو اتنين عشان مصر
اعتقد مفيش ميزانيات لكل القطاعات دى
ولو على حقوق تانيه
نوصلها بأسلوب تانى غير الاضراب عن العمل
ده رأيى ومش هقدر أكون ضمن المضربين عن العمل
 لو بالشكل اللى فهمته