المواد الدستورية تحت البنفسجية ـــ فوق الحمراء

[شريف]

السلام عليكم

عارف لما تلاقى عيل صغير بيفرك ... عشان أبوه ناوى يشيل الكمبيوتر و الجيمز عشان الواد يذاكر ؟؟؟؟
هوا ده بالظبط حال النخبة و الصفوة
و الليبرالين و العلمانيين فى مصر الآن !!!!
مش قادرين يتخيلوا ان ممكن الاخوان أو التيار الدينى يبقا أغلبية فى البرلمان أو حتى بنسبة 30 %
مش قادرين يتخيلوا ان البرلمان اللى هيكون فيه تيار دينى ... هوا اللى ممكن يصيغ الدستور و من ثم يعرضه على الشعب في استفتاء شعبى فالناس توافق أو ترفض .... هيموتوا كمدا و غيظا ... و كان ذراعهم الأيمن فى الموضوع ده ... الحاج يحيي الجمل الله لا يمسيه بالخير .... و الحاج يحيي الجمل غار خلاص ... و لكن مازال الفرك مستمرا

فَرَكَ ... يَفْرُكُ ... فَرْكاً ..... مش قاعدين علي بعضهم ... مرعوبين من الاسلام ... مش طايقين أن تكون كلمة الله هى العليا .... المهم , فكل يوم يطلعولنا بفكيرة حلوة كده أمورة من تأليفاتهم و شطحاتهم ... الناتجة عن عملية الفرك اياها ... فاخترعوا ايه بقا ؟؟؟

المواد الفوق دستورية !!!
تخيلوا ؟؟؟ ايه فوق دستورية دي ؟؟؟ ده يا سيدى مصطلح مبتدع حديثاً معناه إنهم عايزين يعملوا مواد أعلى رتبة و قداسة من الدستور نفسه !!! تخيل البجاحة يا أخى ... طب معروف ان الشعب هوا اللي بيعمل الدستور و طبعا بيبقا بناءا علي تقاليد و اعراف البلد و المجتمع فضلا عن الخلفيات الدينية اللي تابع لها البلد دي .... لا بقا ... هما فئة عايزين يحطوا مواد محرم الاقتراب منها سواء الالغاء او حتي مجرد التعديل ... و تبقا اشبه بمواد مقدسة ... ممنوع الاقتراب او التصوير ... طب يا عم الحاج دا انتم قلة قليلة !! ايه سلطتكم علي الشعب عشان تفرضوا عليه مواد تكون أكثر قدسية من الدستور نفسه ؟؟؟ يا عم الحاج ده الشعب هوا اللي بيحط الدستور و كونك تقول انك عندك مواد افضل من اللي هيحطها الشعب تكون اساسية و الشعب مايقربش منها ... دانت كده تبقا بتهين الشعب المصري و بتشتمه و بتتهمه ضمنيا بالجهل و التخلف و الأمية السياسية !!! ... دانت كده عايز تعمل نفسك وصي علي 85 مليون !! ... يا عم الحاج ... كونك هتحط مواد فوق دستورية يعني انت عايز تعمل قران غير القران المنزل من السما .... القران هوا الشئ الوحيد اللي نقول عليه فوق الدستور ... لان الدستور قانون وضعي و القران قانون السماء ... كلام ملك الملوك عز و جل ألا يعلم من خلق و هو اللطيف الخبير ؟ .... ده الشئ الوحيد اللي ممكن نقول عليه فوق الدستور ...

انما شوية ناس لا تجيد أركان الوضوء ... و ماتعرفش حتي تصلي ازاي في طهارة ... يحطولنا مواد فوق دستورية ؟؟؟؟؟؟؟؟

يقولك معلش .... اصل الاخوان بعد كده و التيار السلفي و الديني هما اللي هيبقوا مسيطرين و هما كده اللي هيحطوا الدستور ؟ يا سلام ؟ طب و انت مال اهلك ؟؟ هوا التيار السلفي ولا الاخوان دول لما ييجوا مجلس الشعب ... مين اللي هيبقا جايبهم ؟؟؟ مش رأي الاغلبية برضه ؟؟؟ مش في انتخابات يابني ؟؟؟

يعني ايه انت ليبرالي و مابتحترمش رأي الاغلبية ؟؟؟ يعني ايه الديمقراطية اللي بتتغني بيها ليل نهار و انت مش قادر تستوعب ان ممكن الشعب المصري يختار براحته و بحريته ؟؟؟ ياخي انت مالك يختار تيار سلفي و لا اخواني و لا ديني و لا شيوعي حتي ... انت مالك ... يحط دستور زي ماهو عايز ... ماهو رأي اغلبية انت مالك ؟؟؟

عشان كده ... انا نازل ميدان التحرير الجمعة الجاية ... و الجمعة الوحيدة اللي هشارك فيها ان شاء الله ... جمعة الهوية ... جمعة رفض المواد الفوق دستورية و التحت بنفسجية و فوق الحمراء و الاستحمار الفكري اللي سيطر ع البلد ... كل يومين يضحكوا علينا بشوية مصطلحات و يتوهوا الناس .. و يأبي الله الا أن يتم نوره و لو كره الكافرون


حكمونا العسكر ... حكمونا العلمانيين ... حكمونا كارهي الدين ... حكمونا الفرنسيين و الانجليزيين و اليهود و الامريكيين و و و و و ..... و مصر كانت بترجع لورا .... نجرب بقا قال الله قال الرسول ... نجرب بقا شرع ربنا و الاقتصاد الاسلامي و الاحكام الاجتماعية الحكيمة و الشرائع البديعة القيمة ... نجرب نرجع لربنا بقا ... نجرب مش هنخسر حاجة ... ماحنا ياما جربنا و اتجرب فينا لما بقينا فيرااااااااااااان تجارب ... نجرب هويتنا الاسلامية الحقيقية ...