كتير من الناس حافظين مش فاهمين
بيقولوا ...

السلفي ده ... حد مش بيبتسم ... علي طول متجهم
و حواجبه تمانية مقلوبة ..
و انا بقول يا جماعة ...
بلاش نردد كلام لا علاقة له بالواقع

السلفي هو شخص ... متبع للسنة
و أصلا أصلا ... المفروض مايبقاش في حاجة اسمها سلفي
و يبقا السلفي حد غريب و مختلف عن المسلمين

ليه ؟
لأن السلفي هو المتبع لسنة الحبيب صلي الله عليه و سلم
و بالمنطق ده... المفروض كلنا سلفيين

بمعني : بنتبع منهج السلف الصحابة و التابعين
هل أصبحت السلفية تهمة ؟؟؟
أقول : لا تسمعوا عنهم ... بل اسمعوا منهم

بيقولوا : السلفي بيضرب و بيعض و بيقطع الودان
و انا بقول : بالذمة ده كلام يا ناس ؟
بذمتكوا تسمعوا للهبل ده و تصدقوه ؟
و من بعيد من غير ما تختلطوا بالناس دي تحكموا عليهم ؟

انا عاشرتهم كتير جدا جدا ... و كنت بحضر دروس كتير
تحت أرجل العلماء و الدعاة الكبار منذ الصغر

ماشوفتش أطيب و لا أحن و لا أعقل منهم
لانهم محكومين بضوابط الشرع
و الشرع قمة في التحضر و الرقي و التسامح


شهادة ادين بها لله

كفاية نسمع من الطرف التاني و ما نسمعلهمش

كفاية اوي القهر اللي عاشوا و عشنا فيه طول السنين اللي فاتت في حياة مبارك و قبله

شاب سلفي بيقول :

يا جماعة اقتربوا منا و اسمعونا

انا سلفي و مش هعض حد !!!
انا سلفي و مبطلعش لحد في الكوابيس بالليل
انا سلفي و ببتسم والله
انا سلفي و انسان زيكو
انا سلفي و اهم حاجة عندي رضا ربي
انا سلفي و منهجي الدعوة بالتي هي احسن
انا سلفي و اسلوبي التعامل بالحسني
انا سلفي و مش هخطف حد النهاردة

بالله عليكو ما تصدقوا العقول الصدأة زي عقل يحيي الجمل و امثاله اساتذة تشويه الاسلام و أهله
بالله عليكو ما تصدقوا زعيم حركة كفاية
اللي طالع يقول
مصر مدنية و اللي مش عاجبه يضرب دماغه في الحيط
مين فينا اللي همجي و عايز يفرض رأيه

هوا مش في صناديق اقتراع ؟
مدنية مدنية ... اسلامية اسلامية ... زي ما الناس تختار
ايه المشكلة

ياريت نغير فكرنا عن الناس دي
و حضراتكم شوفتوا الاخوان اد ايه ناس متفتحين
و ديمقراطيين
و ناس محترمة
لدرجة ان قادتهم قالوا
لا نمانع في دخول الاخوة المسيحيين
حزب الحرية و العدالة الخاص بالاخوان
و لا نمانع في مشاركة المرأة

و اد ايه السلفيين امثال الفاضل محمد حسان
همهم بكل صدق مصلحة مصر
لدرجة انه كان احد الاسباب
في اخماد نار الفتنة الطائفية
في الايام القليلة الماضية

يبقا ايه بقا ؟


فاهمين ... و لا حافظين ؟