أشرف السيد ووثائق ويكيليكس

[مسيو وليد عسكر]

لست أدري كيف يمكنني البداية...
قد يبدو الموضوع لأول وهلة مثيرا من العنوان ومشوقا لمعرفة ماهي علاقة صديقي العزيز أشرف السيد بوثائق ويكيليكس الشهيرة والتي جعلت انفاس العالم تتلاحق في الأونة الاخيرة من كثرة مابها من مفاجاءات مدوية هزت عروش وانظمة سياسية وجعلتها تتهاوي بعنف ...
دعوني أسرد ماحدث وصف تفصيلي وأقسم بالله أن كل ماحدث في هذه الرواية حقيقي رغم كون جانب كبير من الرواية كان مجرد حلم..
أرجو أن تصبر معي قليلا ولاينفذ صبرك ولا تتعجب من هذا التناقض في الكلام ..
كيف يكون الكلام حقيقي وأنا أدعي ان جانب كبير منه حلم ؟؟ هذا ماحدث ..تابع معي واستنتج مابين السطور واترك العنان لخيالك في قراءة ماوراء الكلمات ...
البداية كانت بالامس القريب...
كنت اتصفح موقع اليوتيوب وجال بخاطري أكتب اسم كل واحد من الموقع علي محرك البحث..
بدأت باشرف السيد...
وكانت مفاجاءة ...رأيت فيديو لذيذ له وهو يقوم بعملية التصويت في احد اللجان وكم فرحت وانا أري ابتسامته البريئة الطفولية وهو يسجل للتاريخ بكل فخر أنه يمارس حقه في التصويت في أول انتخابات نزيه محترمة ..وكان فخورا وهو يقول لا للتعديلات الدستورية ..
المهم نزلت الفيديو عندي ودخلت بعدها بشوية علي صفحتي علي الفيسبوك ووجدت رسالة عتاب رقيقة من اختي الفاضلة دكتورة دعاء شديد تطالبني فيها بدخول المنتدي والرد علي الموضوعات ومتابعتها كالعادة وأخبرتها أني متضايق شوية من بعض الأمور في المنتدي ..
كنت وقتها عائد للتو من شغلي وكنت أشعر بارهاق قلت أدخل انام ساعة ظبطت منه موبايلي ..وحدث التالي ...
اتصال تليفوني من أشرف السيد :-
ازيك ياريس فينك؟
-موجود ياحبيبي
-وحشنا والله ..
-ربنا يخليك ..ماتشوفش وحش...
-أنت قلت لي انك ساكن جنب أمن الدولة في المنصورة ؟
-أيوة مانت جيتلي وعارف ده ..ليه خير ؟
-كويس أوي أنا جايلك في الطريق ومعايا الأستاذ خالد سعد هتغدينا ايه يازعيم ؟
-تشرف ياحبيبي عندي جبنة قديمة تجنن وخيار علي أعلي مستوي..
-مافيش مشكلة احنا عاوزين نشوفك وخلاص
-ياعم انا بهرج معاك هعملك أحلي واجب ولو انك ماتستهلش ومزعلني منك بتجاهلك لأراء كل من يحب الموقع وبصراحة أنا مش مبسوط ..
-حاضر ..كل ده هنشوفه لما نعد سوا ..
-تشرف وتوصل بالسلامة ان شاء الله..
----------------------------------------------------
الجزء الثاني (عندي في البيت ))
حمدا لله بالسلامة ياعم اشرف أهلا أستاذ خالد
-الله يسلمك
-وريني ياوليد فين أمن الدولة ؟
-أيه ياعم أشرف مالك وايه حكاية أمن الدولة معاك ؟
-معلش اصلي مشغول جداا بالموضوع ده من ساعة مافيه ناس دخلت المقر الرئيسي في لاظوغلي وعرفت ان فيه وثائق منه بتتباع ؟
- وأنت ايه يهمك في ده انت عاوز تتاجر في أمن بلدك ولا ايه ؟
هنا ضحك أشرف بطريقته المعهودة وبدء يشغل جهاز الكمبيوتر الشخصي بتاعي وتابع باهتمام الشاشة وقالي :
-دي ثورة والكل بيهتم بكل ماوراء الستار مانت شايف الزميل ويكيليكس ربنا كرمه بشوية ملفات وموقوعه مسمع علي مستوي العالم وزمانه عامل احلي اعلانات والسبوبة هناك باليورو والدولار خلينا نعيش ونشوف نفسنا بقي ؟؟
-برضه مش فاهم أنا ايه علاقتي بالليلة دي ؟حد قالك عليا رأفت الهجان ؟
-متشغلش بالك يازعيم وبعدين قلب الموضوع تهريج زي مايكون عاوزني أخرج من الحجرة وقالي :فين الغدا وافتح لي اللاب توب بتاعك كمان علشان عليه باس ورد ..فتحت له الجهاز وخرجت خمس دقايق تقريبا من الحجرة...
شوية ودخلت لقيت حاجات مش لاقي لها تفسير..فلاشات ..هاردات متوصلة بجهازي ..جهاز لاسلكي.. جهاز فك شفرات بيشتغل عليه الاستاذ خالد سعد ..سجائر أجنبية وأجندات (دي من عندي من وحي الثورة ))
- أيه ياعم أشرف الليلة دي كلها ؟أنت بتعمل ايه بالظبط ؟
-ماتشغلش بالك ياعم وليد جهازك عليه فيروسات وانا بنظفه
-فيروسات ايه ياعم أشرف هو أنت فاكرني هندي ورابط الفيل بره؟؟ايه اللاسلكي ده ؟
-هنا لقيت الاستاذ خالد سعد رش علي وجهي بخاخة ولم أعرف ماحدث بعدها ...
------------------------------------------------------
الجزء الثالث :
لما فقت روحت أشوف جهازي لقيته زي ماهو بس الهارد اتكسر والاب توب محطم ورسالة مقتضبة (انسي اللي حصل والا هتموت ))
قمت علي الفور واتصلت بالشرطة واخبرتهم ماحدث :لقيت رد بارد من احد أمناء الشرطة سيب رقم تليفونك واحنا هنتصل بيك
او بلغ الحاكم العسكري
شويه وبتابع برامج التوك شو لقيت اخبار ماليه التلفزيون ان فيه موقع اسمه بوابة التعليم المصري بينفرد بنشر وثائق سرية من ملفات غاية في الخطورة لأمن الدولة وفيها تقارير عن علاقة جمال مبارك بزلزال اليابان وانه زرع قنابل عنقودية في بعض مدن اليابان الهامة علشان حاول يدخل شريك في توكيل تويوتا للسيارات وهما رفضوا نسبة 51% له ...وكان لازم يتعاقبوا لرفضهم شراكته
شوية ولقيت أشرف السيد ضيف في لقاء مع مني الشاذلي وهو بيشرح لها عن موقع بوابة التعليم المصري وعن انفراداته الدائمة وانه مصمم الموقع باحدث الاصدارات ومن الممكن تصفح الموقع بسهولة دون أي مشاكل تقنية ..
شوية ولقيت جرس المنبه في موبايلي بيرن وبيقولي دقت ساعة الصحيان ..اصحي اصحي واتغطي كويس وماتقلش في الأكل قبل النوم علشان ماتحلمش الاحلام العبيطة دي تاني ..
-
السؤال اللي محيرني في الحلم ده بجد :اشمعني الاستاذ خالد سعد اللي جه مع أشرف بيتي مع اني لم ألتقي به الا مرة واحدة فقط ؟؟ ياريت حد بيعرف يفسر أحلام يقولي ..