باراك أوباما من أجل جيزة نظيفة
السلام عليكم
هتكلم على قمة السعادة التي تغمرني عند العلم بأن الجيزة وجامعة القاهرة ستتجمل لحضور أوباما وستصرف الغالي والثمين وتهيئ الشوارع وترصف الطرق المؤدية للجامعة وتقوم بصيانة قبة الجامعة وتلميعها بـ 50 الف جنية بس يا بلاش وكمان صيانة شامة للصرف (المجاري) داخل الجامعة وأيضاً ملء الطرق التي سيمر منها موكب الرئيس الامريكي للجامعة بالورود باهظة الثمن وتوفير 450 عامل نظافة في هذه البقعة لانجاز اعمال النظافة في 73 ساعة والمشكلة اننا مش بنشوف غير اثنين بالعافية - اموت واعرف منين جابوا 450 عامل نظافة منين وهل هم بعقد عادي ولا عقد مميز بس اكيد الـ 450 عامل نظافة دول اتطبق عليه الكادر بتاع البلدية وعلشان البلدية واحنا نعرف ان فريق البلدية بيلبس اللون الاخضر فقرروا يدهنوا مباني واسوار الجامعة الحديدية بطول 5000 الف باللون الاخضر علشان الحسد
وقرروا كمان غسل تمثال النهضة المواجه للسفارة الاسرائيلية وفرش الورود حوله وبرضوا الورد باهظة الثمن
بس بصراحة محافظة الجيزة حلفت وقالت ابدااااا لازم تساهم في الموضوع وقالت هتدفع 65 % من قيمة المصاريف والصيانة والباقي على الجامعة
... بصراحة انا مبسوط وسعيد لان حالنا يرثى له يعني لو مفيش مسئول ولا رئيس جاي مش هيظبطوا الصرف بتاع الجامعة ويسيبوا الدنيا بايظة كدا
... بس بجد انا بشكر اوباما انه بيشاركنا في حملة من اجل جيزة نظيفة اصل جريدة المصري اليوم عملت حملة من أجل قاهرة نظيفة فالجيزة غارت وقالت ابدااااا لازم احنا كمان يكون لنا دور ومحافظتنا تكون احسن محافظة ولازم شكلنا يبقي حلو امام الاجانب
بس تصدق انا مبسوط ان ملعب جامعة القاهرة كبير وواسع وهيظبطوا الملعب بس مش علشان اللعب ، لا علشان طائرة الرئيس الامريكي اللي هيهبط فيها
طيب في اسئلة لو عرفت تجاوب عليها هتأخذ 1000 وردة من الورد باهظ الثمن اللي هيتفرش في طريق موكب اوباما للجامعة
س1 : هل تم تطبيق الكادر على موظفي البلدية علشان يخلصوا المهمة في 72 ساعة
س2 : هل الرئيس جاي بطائرة فلعشات كدا بيظبطوا ملعب الجامعة ولا جاي بموكب وعربية وعلشان كدا بيظبطوا الطرق المؤدية للجامعة اللي هيمر منها الموكب
س3 : لماذا تتحمل جامعة القاهرة 35 % فقط
س 4 : هل تم التجديد والصيانة والنظافة وهذه المصاريف منذ فترة وقت احتفال الجامعة بالمئوية
في النهاية انا مش زعلان من القاء الخطاب من القاهرة ولا من الجامعة لا ده فخر لكل مواطن بالقاء خطاب للعالم الاسلامي من هنا بس حزين بجد على المصاريف اللي بتطلع بس وقت الزيارات الكبيرة قوي
ولو عرفتم حل الاسئلة السابقة ارسل رسالة على رقم شارع جامعة القاهرب
وكل زيارة وانتم متلمعين زي قبة الجامعة
والسلام عليكم
مقالة لـ
أشرف السيد
 |
رد مع اقتباس
شكراً لهذا
أعجبني هذا
المفضلات