بسم الله الرحمن الرحيم

يا ريتني خت الوصل
أكيد كلنا عارفين ان هذه الجمله هي الأشهر من فيلم الآنسه حنفي
ويبدو ان أهل القرن الماضي كانوا يمتلكون فلسفه عاليه وهي بمثابة رساله للأجيال القادمه
وقراءه للأحداث المستقبليه. نيجي بقا لسيدنا الوصل في زماننا بداية
يا ويلك ويا سواد ليلك لو فكرت تعمل مشروع هتلم شويه ايصالات مش هقولك
طبعا علي الريق كده هتلاقي وصل الإيجار كام ألف كده بيدفعوا شهريا
ماهو إيجار جديد وكل مالك يعمل كما يبدو له وشويه وهتلاقي وصل الكهرباء شرف وياريته ما شرف ولعه ونار أصل سعر الكهرباء بقي في العالي وبكره هيخلوه بكارت شحن.
بعد كده عشان مش أطول عليكوا أحسن ريقي نشف.. قابل يا عم وصل الميه وصل ايه ده مش ممكن كل ده رقم .. معلش اصل تم أضافه ستين في الميه رسوم صرف صحي ومجاري ادفع ثم أشتكي
مش دافع .... هنشيل العداد
وهكذا يا ساده ياكرام مش هتعرف تغمض عنيك هتغمض ازاى بص شوف مين جاي
محصل الضرائب وصل على ايه ضرائب ما البلد عارفه الحاله وعارفه الكساد ووقف الحال وكمان ضرائب ماشي يا عم هات الوصل.. وشويه تلاقي محصل تاني .. انت مين كمان
انا محصل الغرفه التجاريه ماشي هات الوصل
وما عليك عشان مش أطول عليك وصل السجل التجاري ووصل التأمينات الاجتماعيه
إيصالات في إيصالات بلد بتاعت إيصالات صحيح
أقوللكم حاجه حلوه
نقفل المشروع أحسن وهتصل علي بوليس النجده وهسلم نفسي
ادي 122
الو مين معايا أحنا السنترال مضطرين لقطع الخط انت لم تسدد الفاتوره
والله انا دافع
طيب لو دافع هات الوصل
بس الوصل انا نسيت اخده كنت مستعجل
وهتفضل تقول
ياريتني خت الوصل
ايه رأيك تفتح مشروع ولا تقعد في البيت أحسن
تحياتي