تسمحلى أحلملك حلم ... أه ولا لأ ؟؟؟؟؟؟؟؟؟

[دعاء شديد]

ده سؤال مهم جدااااااااا سألته لنفسى وانا اتأمل
هو ينفع حد يحلملى حلم ؟؟؟؟؟؟؟
بمعنى ... تعالوا نتخيلها
*************
تبقى اعد كده لا بيك ولا عليك فى حالك
يخبط الباب وحد يقولك عندى ليك حلم انما ايه عجب
طيب وبعدين ... تعالى نفرض انك وافقت
عمنا "المحلمانى" هيبدأ يرسملك معالم الحلم
ويفتح باب دنيا الاحلام على مصرعيه
وانت هتدخل طبعا كأنك داخل عالم سمسم
عادى
المهم خلينا فى عمو "المحلمانى"
جات بقى لحظه تحقيق الحلم
وبدا فعلا ... وانت طبعا يدوبك دورك فقط "محقق الحلم"
اوعى تفكر انك انت صاحب الحلم
(((ده مش كلامى انا طبعا)))
ده كلام
الي حلملك الحلم اصلا هيقولك لااااااااااا ده مش
حلمك ... ده حلمى انا
بس بدل متعب انا ... انت موجود

*************

طيب ليه اصلا
هو حد قالوا يحلم لحد
لا طبعا بس هو لسه هيتعب وويحقق الحلم بنفسه
مش كفايه ان حلم وخلاص
يدور على حد ينفذ بقى
(((دنيا فيها العجب الوان)))

*************

نيجى بقى للمهم
انت بقى ممكن تسمح لحد يحلملك ؟
ولو حصل يعنى
هتبقى يقظ ان من غيرك الحلم ميتحققش ؟؟؟
((( وان من غير قدراتك لن يتحقق الحلم )))

*************

يا ريت اعرف الاراء
:bosyht9:

[dalila7777]

جربت حد يحلملى صحيح لما حققت الحلم نجحت جدا جدا فى تحقيق حلم غيرى لكن حلمى انا ما عملتوش افشل طريقه فى الدنيا تحقق اوامر واحلام غيرك هو حلم ما يحققوا زى الاب اللى بيحلم ان ابنه يبقى طبيب او ظابط او مدرس او مهندس بتضطر تسمع الكلام بلترغيب او الترهيب لكن بيبقى كابوس حتى لو الواحد بقى ملك لكن مش حلمى نصبحه لكل الناس وخصوصا البنات لانهم الاكثر انقياديه لو احلام غيرى اللى حققتها وقرارات اخدها غيرى نبذتها صحيح ما كنتش حبقى ناجحه بس ما كنتش حبقى تعيسه فى مقوله شهيره "سارتر الجحيم هم الأخرون Hell is other نصيحه لو حد حلم لغيره يعرض الحلم يمكن الاخر ليه نفس الاحلام ما يزهقش غيره بحلمه لانه حلمه مش يفرض اقكاره على حد عشان ما يحسش بلقهر والمراره وعمنا بتاع الاحلام مكانه الان مش موجود لان كل الجيل الجديد شخصياته روعه
افضل الف مره من جيلى العجوز طولت عليكم بس موضوعك روعه يا دعاء تسلم ايديكى وافكارك جميله

[موناليزا]

*************
نيجى بقى للمهم
انت بقى ممكن تسمح لحد يحلملك ؟
ولو حصل يعنى
هتبقى يقظ ان من غيرك الحلم ميتحققش ؟؟؟
((( وان من غير قدراتك لن يتحقق الحلم )))
*************

:bosyht9:

اولا اسمحيلي أحييكي علي هذ الموضوع الجميل ودائما كل موضوعاتك جميله وواقعيه وليها فلسفه خاصه اما من ناحية السؤال ده
انا ممكن أخلي حد يحلملي حلم بس بشرط أكون واثقه ان هيحقق الحلم من خلال قدراتي انا
غير كده ان الشخص اللي يحلملي لازم أكون واثقه فيه وفي عقليته زي والدي مثلا أو والدتي
المشكله بقي ان أنا عندي احلام كتيييييييييييييير ومش عارفه هل انا هأقدر أحققها
بدون محلماني
وساعات القدر يدخل في حياتنا اشخاص بترميلك
بدايات حلم صغير تتمني منهم أنهم يكملوا بدايات الحلم ده
لان الحلم ده ممكن يكون علي هواك
بجد الف شكرعلي الموضوع الجميل ده
ده أنا حلمت دلوقت أكتر من حلم من خلالك والله

[امل لاشين]

نيجى بقى للمهم
انت بقى ممكن تسمح لحد يحلملك ؟

لالالالا ..صعب جدااااا...ولكن في حاله واحده بس
اللي بتكون مشروعه ان حد يحلم للاخر هو حلم الاب والام
بمستقبل ابنائهم وانهم يكونوا في احسن الاحوال ..


ولو حصل يعنى
هتبقى يقظ ان من غيرك الحلم ميتحققش ؟؟؟
((( وان من غير قدراتك لن يتحقق الحلم )))

طبعا ..لاني البطل في الحلم ....تخيلي حلم من غير بطل يتحقق

ولكن بصرف النظر علي مين يحلم لمين..لكن المهم انا عاوزة ايه؟؟

وماذا استطيع ان افعل ؟؟وياتري فقدت القدره علي الحلم لكي اترك غيري ان يحلم لي

؟؟؟

يا فلسفتك يادعاء ....ااقصد يامواضيعك يادودو .....

تسلمي عليها دايما .......

[شريف]

انت بقى ممكن تسمح لحد يحلملك ؟

حد يحلم لي ؟
ليه ؟
كيس جوافة انا قاعد ؟
قرطاس لب ؟
و بعدين ده مين ده اللي سايب احلامه و جاي يحلم لي ده؟
طبعا كلام مستحيل يحصل الا مع العجزة
الناس اللي مخلوقة في الدنيا عشان تكون تابعة و مش متبوعة
ده انا
شريف .... احلام غيري لا تعنيني ... او الطريقة اللي بيفكر فيها غيري لا تلزمني
انا في ابسط المواقف و في ابسط المهمات ما بثقش غير في نفسي
لازم اعمل حاجتي بنفسي
عشان اضمن انها اتعملت صح
فما بالك بالاحلام و الطموحات ؟
انا ممكن احلم كتير و يمكن يبقا صعب عليا احقق بعض الاحلام
لكن بحلم .... و مش عايز حد يحلملي حتي لو هيحلم لي حلم في متناول التنفيذ
.................
لكن في نفس الوقت
مانكرش
ان البعض مش قادر يحلم
مش فاضي يحلم
مش رايق يحلم
ماعندوش القدرة انه يحلم
فبيفوض حد تاني يحلم له
و مهما كان عذره
بحتقر النوعية دي

[عزه حسن]

*************
طيب ليه اصلا
هو حد قالوا يحلم لحد
لا طبعا بس هو لسه هيتعب وويحقق الحلم بنفسه
مش كفايه ان حلم وخلاص
يدور على حد ينفذ بقى
(((دنيا فيها العجب الوان)))
*************
نيجى بقى للمهم
انت بقى ممكن تسمح لحد يحلملك ؟
ولو حصل يعنى
هتبقى يقظ ان من غيرك الحلم ميتحققش ؟؟؟
((( وان من غير قدراتك لن يتحقق الحلم )))
*************
يا ريت اعرف الاراء

:bosyht9:

استاذة/ دعــــــــــــاء
تحياتى لك
أرى أننا فى زمن الاحلام00!!
الكل بيحلم 000ويبالغ فى الحلم 00
وممكن اقول أن الحلم يوم ما يفضل حلم وميتحققش0
يصبح000وهم !!!

ومش مشكلة أنه حد يحلم000 ما هو الحلامين دول 00كتير
وكمان الاحلام أنواعها كتير00منها الحلم البسيط00ومنها الحلم الكبير
ومنها التافه00مالوش عازه فى سوق الاحلام
ومنها الكابوس الفظيع
بس تعرفى أهم من الحلم ايه
الرؤيه
اهم بكتييييير
يمكن الحلامين كتير لكن أصحاب الرؤى دول
نادرين00نادرين
يووووه ياريت نلاقى واحد منهم
لأن الأهم من الحلم ومن الرؤية
بكتير 00كتير00كتير
واحد يقدر يحول الحلم لحقيقة وواقع ملموس
يعنى عقل 00وجهد00وعمل00تعب
ارق00سهر
يعنى واحد صاحى وفايق وبيحقق الحلم
مش نايم وبيحلم
سيظل الحلم ( الفكرة ) حلم (فكرة) حتى يجد من يجعله واقع
جميل

شكرا لطرحكم الممتع

[وسام غانم]

انا اسمح لحد يحلملى ليه ؟؟؟!!!
حلمى انا عارفاه و عارفه نفسى معاه
و احب انا اللى اعيش جواه
و الا هيكون حلمى ازاى
احب اعيش كل اللى فيه
السعاده اللى ممكن الاقيها او المشكله اللى ممكن تقابلنى او .......
اى حاجه فى الحلم
المهم ان انا اللى اعيشها
موضوع متميز كالعاده
مشكوره عليه
جزاكى الله كل الخير

[Madame/Basmalh]

هههههههههههههههههه
فكرتنى با غنية هيفاء
تسمحلى ادلعك
بصى يا دعاء هو يحلملى ايوه ما هو فاضى وبعدين الاحلام مش بفلوس
يشتغلنى برده ماشى برحتك:006et4::006et4::006et4: تيجى عند تحقيق الحلم
لا بقا انت فاكرنى دقة عصافير وبعدين بدل الاحلام مانيجى للواقع والعقل
والمنطق ولا هى بقة اشتغلات اقصد احلام
يا موضوعاتك يا دودى والله بموت فيك ههههههههههههههههه

[نعمه محمود]

الأحلام كتير يادعاء بس النفس اللي تحلم او الروح اللي تحلم

نيجى بقى للمهم
انت بقى ممكن تسمح لحد يحلملك ؟
ولو حصل يعنى
هتبقى يقظ ان من غيرك الحلم ميتحققش ؟؟؟
((( وان من غير قدراتك لن يتحقق الحلم )))

*************

مفيش عندى مشكلة ان حد يحلم لى حلم يعنى زمان بابا الله يرحمه حلم لى أحلام كتير أبسطها انى احصل على الماجستير والحمد لله انى بدأت تحقيق الحلم أما باقي أحلامه لى فقد باتت من احلامى أيضا واسعى لتحقيقها إذن فالأمر يتوقف على "مين يحلم لك"ماهو مش أى حد معدى كده هيحلم لى حلم ويمشي
وأحيانا بدى لنفسي الحق إنى أحلم لغيرى يعنى يكون حد غالى عليا أوى بس مكسل يحلم
ممكن احلم له واقدم له آليات تنفيذ الحلم بس هو حر بقي لو ما خدش خطوة ايجابية
عارفه يادعاء أيه أكتر حاجة ممكن تححق حلم هى تجسيد الحلم يعنى لو بحلم اكون وزيرة مثلا مثلا فكل ما اتخيل نفسي في مكتب الوزارة بدى لنفسي دفعه معنوية لتحقيق الحلم ولو حد بيحلم يركب عربية معينة لو تخيل نفسه سايقاه وعاش بخياله الحلم هيحققه
بس تعرفي ايه مشكلة معظم الناس اللي مش بتحلم
انهم مش عاوزين يحلمووووووووووا مش عاوزين يرهقوا نفسهم بالأحلام

[المجاهد فى سبيل الله]

طبعا موضوع مميز كا العادة بتاعت الدكتورة دعاء
بس انا رائى من راى الاستاذه نعمه
وليه لا
ولا فيها ايه لما حد يحلملى
هو الاحلام دى خلاص اصبحت واقع ملموس
ما الى عايز يحلملى يحلم براحته
وهنا اتبع نظرية الحزن الوطنى بتعنا احلملى كيفما تشاء وانا انفذ ما اريد
الى عايز يحلم يتفضل وانا ليا احلامى الخاصه الى محدش يحلمها غيرى انا وبس
انا كتير زى ما قالت الاستاذه نعمه كتير بابا حلملى احلام ورسملى امال
وانا مشيت على الاحلام دى
و الحمدلله نجحت فى تحقيق اغلبها لان دا بابا واحلامه هى احلامى
جزاك الله خيرا يا دكتورة بجد موضوع مميز من حضرتك

[عزة المصرى78]

لا يوجد أحد هذه الأيام إلا قلة من يحلمون لغيرهم وما الضرر فى أن يحلم لنا البعض ونسعى نحن لتحقيق أحلامهم فما نحن فيه من تقدم علمى وتكنولوجى أكيد كان حلم من سبقونا ونحن حققناه وكذلك كل أب أو أم يحلمان بحياة أفضل لأبنائهم ومستقبل باهر ويدفعان أبناءهما لتحقيق ذلك الحلم ليتنا نحلم أو نجد من يحلم لنا فهذا يعنى أننا فى محل اهتماماته ومشغول بأمرنا ويتمنى لنا الخير أما الآن كل واحد يحلم لنفسه فقط ويريد أن يحقق هو الحلم إن استطاع ولا يشرك معه أحد أو يسرق أحلامك لعجزه عن الحلم وهناك أحلام مشتركة يجب أن نحلم بها جميعا من أن يحلم بعضنا بها ويسعوا جاهدين لتحقيقها بالرغم من أنها عامة وسوف تعم على الكل بينما الآخرون نائمين حالمين منتظرين حتى يستيقظوا يجدوا الحلم تحقق
لا مشكلة فى أن نحلم فالأحلام ما أكثرها عند البعض ولكن الأصعب تحقيقها لوحدك أو أن تجدين من سرقه وأدعى أنه حلمه الذى يراوده منذ سنوات فليست المشكلة فى أن يكون حلمى هو حلم آخر مثلى المشكلة فيمن يحلم ولا يحقق ، ومن لا يحلم ولا يحقق ومن يقلب أحلامنا إلى كوابيس

أنا أحب أحلم لغيرى كثيرا ولا أرفض أن يحلم لى أحد وإذا عجبنى حلمه أدعو الله أن يوفقنى لتحقيقه وإن لم يعجبنى أشكر صاحبه أنى شغلت فكره وقلبه هذا الوقت فعندما تحلمين لأحد قد تجدين فى هذا الانسان قدرات يغفلها ويحتاج من يدفعه إليها ويمنيه بها ويثير هذا الحلم فيه وأخيرا هو حلم له حرية قبوله أو رفضه فالأحلام فيها حرية مطلقة لاحجر عليها فى النفوس والعقول

موضوع متميز كعادتك صاحبة الفلسفة الراقية التى تبحث فى ذاتنا عن معانى وتكشف عنها ونتعلم منها الكثير لاحرمنا الله منك ومن إبداعاتك