شات سنه 3009
سكاموني : هاي إنت جبت إيميلى منين ؟؟
فرافيرو : من موقع احلم بمجرتك بعد ثانيتين دوت كوم .
سكاموني : طيب .
فرافيرو : ممكن نتعرف؟
سكاموني : طبعا ممكن .
فرافيرو : أنا فرافيرو من الأرض 4 سنين عميد كلية السفن الفضائية في الزهرة وإنت؟
سكاموني : أنا سكاموني من زحل 5 سنين ونص ... عالمعاش ... كنت شغال فى الطاقة الهيدروجينية فى نيبتون قبل الحرب .
فرافيرو : أهلا بيك يا سكاموني إنت طالع معاش من إمتى؟؟
سكاموني : من 6 شهور تقريبا .
فرافيرو : يا حرام !! 6 شهور بحالهم وعملت إيه يا مسكين فى العمر دة؟
سكاموني : أبدا وحياتك معظم وقتي على النت الفضائي أو للرحلات بين زحل والمشترى والقمر وساعات المريخ .
فرافيرو: ياه دة إنت حياتك صعبة قوى ... ربنا وياك .
سكاموني : وإنت هتوصل سن المعاش امتى؟؟
فرافيرو : لا أنا لسة بدري عليا قوي .... لسة سنة بحالها ..
سكاموني : يا بختك يا فرافيرو .
فرافيرو: بس إنت جميل قوي فى الكاميرا وباين عليك الشباب ولا كأنك شاب عنده سنة ونص ..
سكاموني : دة بفضل الجهاز اللي اشتريته امبارح من القمر بمجرد ما تدخل جواه يظبط لك شكلك وجسمك ويمحى علامات الشيخوخة اللي بتظهر بعد سن 4 سنين ..
فرافيرو: جبته بكام ؟
سكاموني : ب80 مليار قلحة (عملة التبانة) ..
فرافيرو: بس ؟؟؟ ده رخيص قوى ...
سكاموني : أصله مش مستورد ده تقليد إنما الأصلي المستورد من مجرة تانية هتلاقيه أغلى بكتير ..
فرافيرو: لا إحنا عاوزين نشجع صناعة مجرتنا وشعارنا هو (صنع فى التبانة) ..
سكاموني : عندك حق برضه 000هي إيه الدوشة اللى سامعها حواليك دى ؟؟
فرافيرو: لا أصل العيال أحفادى عاملين هيصة ..عيال أشقية قوي ..الكبير فيهم عنده 5 شهور عقبال عندك نجح فى الثانوية العامة إمبارح وجاب تقدير يدخله كلية عابرات المجرات فى بلوتو ..
سكاموني : ألف مبروك لحفيدك انا هبعتله هدية دلوقتي بالقمر الطبيعى ....هبعتله سفينة فضاء هدية ..
فرافيرو: ولو إنه عنده كتير لكن هات مش هيقول لأ ..
سكامونى: هه وصلت؟؟
فرافيرو : آه وصلت ميرسي جدا ..
سكاموني : شفت الإحتفال الى عملوه من يومين لأكبر معمر فى المجرة ؟؟؟ ده كان إحتفال إسطورى ..
فرافيرو: أكبر معمر فى التبانة؟؟؟ ليه هو عنده كام سنة؟؟
سكامونى : تخيل فضل عايش لغاية ماعمره وصل 13 سنة ......
فرافيرو: ياااااه معقولة إزاى وصل للعمر دة وحالته كانت إيه؟ احكيلى ..
سكاموني : هو كان بيموت بقاله 6سنين بس فضل فى مستشفى الحياة فى عطارد والدكاترة بيحاولو جيل بعد جيل إنهم يخلوه عايش أكتر مدة ممكنة و لما وصل للسن الكبير قوى ده عملوا له إحتفال أسطورى حضره كل ملوك ورؤساء التبانة واتنقل على الهواء بالقمر الطبيعى على كل الشاشات السماوية لكل سكان التبانة .....هو إنت ماشفتوش؟
فرافيرو: لا أصلى كنت فى مجرة تانية بصيف !! المهم هو عامل إيه دلوقتى؟؟
سكاموني : لأ ماهو الراجل ما إستحملشى إنه يشوف الإحتفال دة ومات فى ثانيتها ..
فرافيرو: يا عم كفاية عليه 13 سنة هو إيه هياخد زمنه وزمن غيره كمان!! بس إحنا نكمل ال8 سنين ونحمد ربنا على كدة ..أخبار الحرب فى نيبتون إيه؟
سكاموني : آخر الأخبار إن رئيس أورانوس أعلن إنه هيسحب سفنه الفضائية وجيشه الآلى من نيبتون بعد هدنة مع رئيسها لمدة 3 أيام ..
فرافيرو: أهى مدة كافية عشان ينموا بلادهم من تاني..
سكاموني :على رأيك..
فرافيرو : أنا سعيد جدا بمعرفتك وإن شاء الله نتقابل فى أى كوكب قريب ..
سكاموني : أكيد طبعا ..
فرافيرو: أنا هستأذن دلوقتى عشان ورايا محاضرة مهمة بعد دقيقتين فى الزهرة وسائق الصاروخ وصل فوق وعمال يضربلى فى شظايا(بدل الكلاكسات)عشان أطلع له ..
سكاموني: طيب هشوفك إمتى تانى؟؟
فرافيرو: بعد 25 دقيقة لأني مشغول قوي ..
سكاموني : ياااه بس دة كتير قوى 00على العموم حاول تيجى بدري عن كدة ..
فرافيرو: حاضر هحاول .. بااي .
سكاموني : باي..
 |
رد مع اقتباس
شكراً لهذا
أعجبني هذا
المشاركة الأصلية كتبت بواسطة 7asnaa kareem
المفضلات