المنهج ارجو المساعده

**ام مؤيد** · 17-10-2009, 12:57 AM

بسم الله الرحمن الرحيم

انا مدرسه جديده جدا فى مدرسه جديده

ارجو منكم المساعده فى معرفه المنهج المقرر

ومتى ميعاد امتحان الترم الاول
وكيف اجعلهم يعرفون القراءه والكتابه وهم حتى لايعرفون الالف من كوز الذره

انا اسفه اكترت من الكلام وصدعتكم بس بجد انا نفسى حد يساعدنى

وشكرا على القراءه

**ميس سوزان** · 19-10-2009, 01:13 AM

اهلا بيكى يا حبيبة قلبى .. اطمنى دى حاجة سهلة جدا وبسيطة لانهم اطفال يعنى عجينة تقدرى تشكليها زى ما انتى عايزة .

ابدئى بدعاء المذاكرة وهما مع الوقت حيحفظوه .
حاولى تسأليهم اسألة سهلة جدا وبسيطة وبعيدة تماما عن الغموض .
واديهم امثلة من الحياه والناس اللى حواليهم او على هيئة حدوتة صغيرة لانهم بيموتوا فيها.
ودايما يكون فيه تعزيز لاى حاجة صح وحلوة يعملوها مادى او معنوى ( استيكر تلصقيه على الكراسة - كلمة برافو عليك او شاطر او هايل او الله ينور عليك ......
انا شخصيا ممكن اجيب للبنات الاكسسوارات الصغيرة اللى بيلبسوها دى او اى لعبه بسيطة جدا ب 2 جنيه للولاد والبنات واديهاله اول ما يعمل الواجب كله صح ما تتصوريش بيفرح بيها اد ايه.

او اديله ربع جنيه و اكتب له عليه
او لو بدى مجموعة بقولهم اللى حيبقى شاطر ويجمع منى 4 ربع جنيه ليه عندى هديه
بس متكتريش من التعزيز المادى ده علشان ما يطلعش طماع ومادى !!
ولو جاوب غلط بلاش تقوليله لا غلط فى وشه كده
قوليله ها انت قربت من كذا....
او صح بس لو كنت قلتها كذا تبقى احسن
واصبرى عليهم معلش
وخصوصا لو بينسى اصبرى وممكن تشتريله نوته شكلها حلو وصغيرة كده يكتب فيها الواجب اللى عليه واللى يخلصه يعمل جنبه علامة صح ودى حتخليه يركز اكتر ويعمل الواجب كله
وابعدى عن الضرب والشتيمة علشان ثقته فى نفسه ما تقلش
وممكن تجيبى الاسطوانات التعليمية حلوة جدا ومجسمات ...
وما تنسيش التكرار التكرار التكرار
اللى مش عارف الحروف اكتبيهاله فى الكراسة بتاعته على هيئة عواميد مثلا حرف الالف وفوقيها كلمة تبدأ بحرف الالف وقوليهاله وهو يقول وراكى كذا مرة ، وطبعا مش كلها مرة واحدة لانها حتبقى كتيرة جدا جدا عليه !!
والحرف الواحد اكتبهوله فى 3 عواميد وهو يكتب تحتهم ...
وما تنسيش تقولى الحروف كل يوم وهما يقولوها وراكى وعلقى على الحيطة اللوح اللى بتتباع فى المكتبات اللى بيبقى فيها الحروف والرسومات دى وممكن تشاورى عليها وانتى بتقولى ، وكذلك حروف الانجليزى وطبعا القرأْن {جزء عامة} تقريه معاهم يوميا وكمان الاناشيد الدينية ويا سلام بقى لو احاديث عن الرسول عليه الصلاة والسلام والسيرة بتاعته بأختصار وبساطة وقصص الانبياء

عايزين نطلع جيل فاهم دينه بقى كده وعارف الصح من الغلط ومتمسك بمبادىء وقيم صح

وابدعى بقى وحبى مهنتك وربنا معاكى يا قمر ويكتر من امثالك ويكرمك ابقى طمنينى عليكى .

**doudy** · 19-10-2009, 01:51 AM

اسلوب حضرتك ممتاز يا ميس سوزان

بجد انا استفدت منه جدا حتى مع ولادى

ربنا يكرمك و يحبب فيكى تلاميذك اكتر و اكتر

تحياتى

**ميس سوزان** · 19-10-2009, 04:19 AM

الله حلوة اوى اوى الدعوة دى
جزاكى الله خيرا يا دودى
منورة ولله
واى حاجة عايزاها قولى على طول احنا فى الخدمة
على فكرة ماما بتدلعنى وتقولى دودى
ههههههههههههههههههه

**ميس سوزان** · 19-10-2009, 04:54 AM

اه صحيح ام مؤيد ... نسيت اقولك لو بتدى تانية ابتدائى وانتى طالعة يبقى لازم تبدأى معاهم فى الأساليب والتراكيب
لأن دى اساسيات لازم يعرفوها
ودى سهلة جدا
زى أسماء الاشارة (هذا ، هذه ، هذان ، هاتان ، هؤلاء).
ضمائر المتكلم ( انا ونحن ).
ضمائر المخاطب ( انت - انتِ - انتما - انتن - انتم ).
ضمائر الغائب { هو - هى - هما - هم - هن } .
وادوات واساليب الاستفهام ( ماذا؟ ومتى؟ واين؟ما ؟ كيف؟..
علامة الاستفهام ؟
علامة التعجب !
القوسين {}
الفاصلة ، والفاصلة المنقوطة ؛
وطبعا تدى امثلة عليهم
وتدريبات فى الاخر
وتحفظيهم اسامى الدروس كمان لان ممكن ييجى ويقوله
# ما اسم \عنوان هذا الدرس ؟
ويجاوب اجابة نموذجية يعنى تقوليله
نشيل اسلوب الاستفهام ....1
نشيل علامة الاستفهام { الاداه} ......2
نكتب باقى السؤال وبعدين نحط الاجابة بتاعتنا :
عنوان هذا الدرس ......
وتعاملى كل تلميذ حسب قدراته ومستوى ذكاؤه
يعنى فيه اللى يكون كويس ويجاوب معاكى من غير مشاكل
وفيه اللى لالالالالازم تكونى جامدة معاه وتضربيه اذا لزم الامر علشان يكون كويس معاكى
ودى كمان حاجة سهلة وحتعرفيها من كتر التعامل معاهم
اتمنى اكون أفدتك بحاجة
ولو وصل الامر انك تعملى كل حصتين او ثلاثة امتحان يبقى ياريت .
ولو احتجتى اى حاجة قولى ولو افتكرت اى حاجة تانية حقولهالك

**ام مؤيد** · 20-10-2009, 11:02 PM

شكرا جدا ميس سوزان
على هذه المعلومات القيمه
انا بدى اوى ابتدائى بس المشكله ان المنهج كتير ومفيش وقت والاطفال حفظين الحروف اغنيه لكن مش عارفنها
انا برسم لهم شخصيات ديزنى وعملها علقه فى الغرفه ياخذها كل اسبوع الملتزم المذاكر
عدد الطالبه اللى عندى 16 منهم 8 شاطرين والباقى الحمد لله
والاهالى منهم الى مكبر دماغه خالص مفيش متابعه ولا اهتمام
وطبعا الحصه نص ساعه مينفعش ادى فيها جاجه كامله عاوزه اخالص
المهم بجد انا محتاجه توزيع المنهج وازى اعلم الطالبه القراءه باسرع وقت

على فكره انا فى درس ادراك العلاقات بين الاشياء خالصته
هل انا كده متاخره على العلم ان حصصى يومين بس فى الاسبوع

وبجد بجد مرسيه اتمنى اكون انا وحضرتك صحاب

**ميس سوزان** · 21-10-2009, 03:08 PM

السلام عليكم
ده شرف ليا ولله اننا نكون صحاب
بس ولله العظيم انا ما اعرفش توزيع المنهج ايه بس انتى ماشية بمعدل كويس اوى مش متأخرة ولا حاجة
ولو قدرت اجيب هولك مش حتأخر ولله
فعلا انا معاكى ان المنهج كبير وكل ما يكبروا بيزيد اكثر !!
وبعدين انا مستغربة طالما انتى فى مدرسة وبتدى فصل اولى ابتدائى يبقى المفروض يكون معاكى توزيع المنهج
ليه مش بتطلبى من الموجه بتاع حضرتك ده؟ او تسألى زمايلك .
عموما جربى واعملى كل اللى عليكى
وربنا معاكى

**ام مؤيد** · 22-10-2009, 08:51 AM

المدرسه اللى انا فيها مفيهاش مدرس اول وانا المدرسه الوحيده لعربى
ولاحتى توجيهى لانها مدرسه جديده وامريكا واى
وتعرفى الاكتر من كده ان اوليا الامور مش عاوزين حتى وجبات للاولاد
بالنسبه لنوزيه المنهج انا الحمد لله اتصرفت اخده من كتاب الاضواء

واشكرك بجد على تفاعلك معى وتعاونك

**أستاذة شروق** · 22-10-2009, 02:37 PM

ميس سوزان بجد جزاك الله خيرا وجعل ما تقومين به فى ميزان حسناتك
أنا مدرسة لأولى ابتدائى من خمس سنوات وبجد فخورة جدا بكده ودايما أتمنى كلا سنة إنى أتعامل معاهم بس عندى طلب .... عاوزة أفكار جديدة لوسائل تعليمية بالذات الحروف لأنى مش بحب الوحات الجاهزة وكمان عاوزة أولادى وبناتى يشاركونى فى عملها
على فكرة أنا تقريبا بتبع نفس طريقتك فى التعامل مع الأولاد الصغيرين
جزيت خيرا

**ميس سوزان** · 24-10-2009, 02:53 PM

السلام عليكم
جزانا واياكم أستاذة شروق
وربنا يزيدك كمان وكمان

بالنسبة للوسائل التعليمية أبسط حاجة ممكن تجيبى ورق كرتون ملون الوان مختلفة وكل لون تكتبى فيه حرف وكلمة
وتقلبيهم على ظهرهم وكل تليميذ يختار اللون اللى بيحبه والحرف اللى يطلع له يقراه ويقرا الكلمة اللى معاه وتطلبى منه يقولك كلمة تانية من عنده تبدأ بالحرف ده ولو عايزاهم يساعدوكى ممكن تكونى محضرليهم ورق كرتون تانى واقلام تلوين فيلومستر وكل ولد برضه ياخد الالوان اللى بيحبها ويكتب الحرف والكلمة الجديدة اللى هو قالها فى البطاقة الجديدة .
فكرى وحتلاقى ربنا الهمك بافكار كتيييييييييير حتستغربى انتى جبتيها منين ؟!
وأبحثى على النت برضه حيساعدك كتير وفيه هنا فى المنتدى الوسائل التعليمية ادخلى فيه ودورى يمكن تلاقى حاجة تساعدك وربنا يوفقك يااااااااارب ويكثر من أمثالك .

**ام مؤيد** · 27-10-2009, 12:27 AM

واللهى افكارك حلوه
واسمحى لى بفكره انا قمت بيها مع اولادى وهى
عمل الحروف على فل ولونته
وكمان عملت كوتشينه وهى عباره عن ورقه فيها الرسمه
وورقه فيها الكلمه ونقوم بالعب ارمى انا الرسمه وهو يسحب الكلمه وهكذا وهى فكره جديده
وشكرا

**awasifelabeer** · 28-10-2009, 01:35 AM

جزاكم الله خيرا ونفعنا واياكم بماتعلمنا

**محمد عفيفى** · 28-10-2009, 12:50 PM

شكررررررررررررررررررررررررررررررررررر

**أستاذة شروق** · 29-10-2009, 09:01 PM

جزاك الله خيرا ميس سوزان وياريت تفيدينا دائما بكل مالديك من جديد وجعله الله فى ميزان حسناتك

**مشمشاية** · 08-11-2009, 11:35 AM

شكرا جزيلا مس سوذان وبارك الله فيك انا استفدت جدا من موضوعك وخاصة مع ابنى هو هيدخل المدرسه السنه الجايه وبحاول ااسسه كويس فى العربى ونفسى يكون متفوق وكمان هو ماشاء الله عنده استعداد وانا فعلا باستعمل معاه هو زاخته اسلوب التعزيز والهدايا الصغيرة دى بتجيب نتيجه حلوه وكمان متنسوش تعلمو ولادكم وهما صغيرين على الصلاه بس براحه ومنغير ما تعقدوهم احنا فعلا محتجين نكون جيل يعرف لغته ودينه وربنا يكرمنا كلنا فى اولدنا

**samar7** · 02-03-2010, 01:07 AM

السلام عليكم لو سمحتى انا لسه مدرسة جديدة وعندى طالب بديله درس وانا اول مرة ادى درس وهو فى الصف الثالث الابتدائى بس ضعيف جدا فى القراءة والكتابة والاملاء وبينسى بسرعة انا عايزة اسسه كويس وفى نفس الوقت امشى معها فى المنهج حضرتك تنصحينى باية واكون شاكرة ليكى