ماسنجر المعلمين بالتعاقد .... هنا هانتكلم عن كل مشاكلنا ونتعرف على بعض ونستفيد من بعض

**NESCAFIO** · 03-10-2009, 08:47 PM

السـلام عليكـم ورحمـه اللـه وبركـاتـه

ده مـوضـوع أنا عـاملة علشان نقرب من بعض أكتر ونفيد بعض

ونساعد بعض على قد ما نقدر

أعـزائى وأخوانى المعلمين المساعدين الموضـوع ده هيكـون للتعـارف بيننـا

وهنسـلم على بعـض وهنتكـلم فيه عن امـور حيـاتنا وكـل مشاكلنا

ونحاول نساعد بعض على قد ما نقدر

سواء كان خبر جديد أو معلومة حد فينا عرفها أو أى شئ يخص

وظيفتنا

وتذكروا دائماً أن يد الله عز وجل مع الجماعة

واتمنـى تفـاعـل الجمـيع من أجـل انجـاح الموضوع والخير يعم إن شاء الله
وانـا اول واحـد هبـدأ

الأسـم : محمد

السـن : 29 سنة

السكـن : القـاهـره

المـؤهـل : حـاصـل عـلى ليسانس أداب جامعة إسكندرية تقدير جيد والحمد لله

دراسات عليا : دبلومة عامة فى التربية جامعة عين شمس تقدير جيد

الوظيفـه : معلم مساعد أخصائى نفسى

**همس الكلام** · 03-10-2009, 09:31 PM

والله فكرة جميلةاننا نتعرف كلنا على بعض
انا مدرسة لغة عربية

**NESCAFIO** · 03-10-2009, 09:42 PM

المشاركة الأصلية كتبت بواسطة همس الكلام

والله فكرة جميلةاننا نتعرف كلنا على بعض
انا مدرسة لغة عربية

أهلاً وسهلاً بحضرتك

يا أ / همس وشرفتى الماسنجر وإن شاء الله تفيدى وتستفيدى معانا

ومدرسين اللغة العربية نوروا الماسنجر بوجود حضرتك معانا

ولو فية أى إستفسار عند حضرتك ممكن تقولية ونحاول كلنا نجاوب على حضرتك إن شاء الله

**لــؤلــؤة** · 04-10-2009, 01:42 AM

فكرة كويسة يا استاذ محمد

انا مدرسة تربية رياضية

24 سنة

وكنت عايزة اعرف ايه آخر اخبار تقديم الاوراق في الاكاديمية ؟؟

يعني طلبوا حاجة زيادة ولا الأمن مستتب؟؟؟؟؟

**NESCAFIO** · 04-10-2009, 07:14 AM

المشاركة الأصلية كتبت بواسطة لــؤلــؤة

فكرة كويسة يا استاذ محمد

انا مدرسة تربية رياضية

24 سنة

وكنت عايزة اعرف ايه آخر اخبار تقديم الاوراق في الاكاديمية ؟؟

يعني طلبوا حاجة زيادة ولا الأمن مستتب؟؟؟؟؟

أهلاً وسهلاً بحضرتك ونورتى الماسنجر يا أ/ لؤلؤة

أما بالنسبة لتقديم الأوراق فى الأكاديمية فاأخر حاجة أنا لسة ماضى عليها من حوالى يومين

إن أخر ميعاد لتقديم الأوراق هو

5/10

يعنى بكرة أخر يوم فياريت الناس اللى ما قدمتش تلحق تقدم النهاردة

أو بكرة بالكتير

والحمد لله ربنا هاديهم وماحدش طلب حاجة جديدة لحد دلوقتى

ناس ذوق ذوق ذوق الصراحة

وأهلاً بحضرتك معانا فى أسرة الماسنجر

**doaa26979** · 04-10-2009, 05:32 PM

سلام عليكم
انا دعاء مدرسه حاسب الى صناعى بكالوريس هندسه
و ياريت يا استاذ محمد تعرفنى ايه نظام الدبلومه التربويه يعنى صعبه و لا سهله و خصوصا انا عندى طفله رضيعه

**NESCAFIO** · 04-10-2009, 08:38 PM

المشاركة الأصلية كتبت بواسطة doaa26979

سلام عليكم
انا دعاء مدرسه حاسب الى صناعى بكالوريس هندسه
و ياريت يا استاذ محمد تعرفنى ايه نظام الدبلومه التربويه يعنى صعبه و لا سهله و خصوصا انا عندى طفله رضيعه

أهلاً وسهلا بحضرتك يا مدام دعاء شرفتنيا فى الماسنجر

أما بالنسبة للدبلومة فاأنا كنت عملتها فى جامعة عين شمس نظام سنة واحدة

بس بصراحة كانت سهلة جداً وعلى فكرة مذاكرتى ليها كانت يادوبك قبل الإمتحانات بكام يوم

أما بالنسبة للحضور فالحضور مهم فى السكاشن والتدريب العملى

توكلى على الله وما تتردديش وأدخليها لإنها مهمة

وأكيد برضة الناس هتراعى إن حضرتك معاك طفلة

وإن شاء الله نسمع خبر نجاحك بتفوق

**safaa_ss** · 05-10-2009, 12:17 AM

:bosyht9:مشروع جميل جدا أنا صفاء مدرسة علوم ،وعلى فكرة لاأعتقد أنه يوجد معلم مساعد مثلى فأنا جدولى 36حصة علوم فى الأسبوع،فهل فى أحد مثلى؟؟لا أعتقد.

**spiritlover_2009** · 05-10-2009, 06:30 PM

الف شكر يا اخ محمد على جهدك فى التواصل بين المتعاقدين
انا عبدالله معلم مساعد حاسب آلى محافظة الشرقيه
وتايه بين الشغل والتربوى والاكاديميه ومي فاهم اى حاجه وخايف من الحضور فى التربوى لانه مواعيد المدرسه عندى فى نفس مواعيد التربوى
ارجو المساعده من اهل الخبره علشان انا بجد اتخنقت من وزير التربيه والتعليم بعد كده هيقولوا لينا اطلعوا القمر علشان نجدد عقودكم

**NESCAFIO** · 05-10-2009, 09:36 PM

المشاركة الأصلية كتبت بواسطة safaa_ss

:bosyht9:مشروع جميل جدا أنا صفاء مدرسة علوم ،وعلى فكرة لاأعتقد أنه يوجد معلم مساعد مثلى فأنا جدولى 36حصة علوم فى الأسبوع،فهل فى أحد مثلى؟؟لا أعتقد.

أهلاً وسهلاً بحضرتك أ/ صفاء

ومتهيألى 36 حصة فى اليوم عايزين 36 ساعة راحة ربنا يعينك يا ميس صفاء

المهم أخبار الدروس أية ؟

وعلى رأى المثل

الضرايب مصلحتك أولاً

هههههههههههههههه

بهزر طبعاً يا أ/ صفاء وكان الله فى عون حضرتك وشرفتى الماسنجر وإن شاء الله تكونى

عضوة دائمة معانا

**NESCAFIO** · 05-10-2009, 09:41 PM

المشاركة الأصلية كتبت بواسطة spiritlover_2009

الف شكر يا اخ محمد على جهدك فى التواصل بين المتعاقدين
انا عبدالله معلم مساعد حاسب آلى محافظة الشرقيه
وتايه بين الشغل والتربوى والاكاديميه ومي فاهم اى حاجه وخايف من الحضور فى التربوى لانه مواعيد المدرسه عندى فى نفس مواعيد التربوى
ارجو المساعده من اهل الخبره علشان انا بجد اتخنقت من وزير التربيه والتعليم بعد كده هيقولوا لينا اطلعوا القمر علشان نجدد عقودكم

أهلأً وسهلاً بحضرتك أ/ عبد الله

ومتشكر جداً لكلامك الرائع وإن شاء الله تكون عضو دائم معانا فى الماسنجر

أما بخصوص التربوى فدية لازم تتعمل فيستحسن إنك تنجز فيها وما تأجلهاش

قبل ما يجى اليوم وتقول ياريتنى كنت عملتها دية نصيحة أخوية

وما باليد حيلة وإنت عارف ماحدش بياكلها بالساهل

وياسيدى ما تقلقش أنا والله واخد التربوى فى سنة واحدة وكنت ساعتها شغال صبح وبعد الظهر وكانت الحياة ذى الفل

إعتمد إنت على الله وإعملها والله المستعان

**NESCAFIO** · 05-10-2009, 09:52 PM

مساء الخير عليكم جميعاً

حد يا جماعة هنا من المتعاقدين الإدراة كلفتة بوظيفة المنسق العام ؟؟

أصل أخوكم منسق عام وتعبان أخر تعب من الحكاية دية

تاكسى رايح وتاكسى جاى والعملية وسعت أوى

هانصرف عالحكومة بأة ولا أية

ههههههههههههه

**shosho_love** · 05-10-2009, 09:55 PM

انا مدرسه تربيه رياضيه من الشرقيه
وعلى فكره انا قدمت ورقى امبارح وقالوا هناك ان المكتب هايقبل ورق لغايه يوم الخميس8/10/2009
وسمعت من ناس انهارده انه هايفضل مافتوح طول العام بس اللى انا متأكده منه انه هايقبل ورق لغايه يوم الخميس ويوم منا قدمت اخدوا ورق من اللى مش معاه تربوى بيقدم بصوره طبق الاصل من وصل مصاريف التقديم للتربوى وعلى فكره فى تقديم للى عقدهم 1/3/2009

**مشمشاية** · 05-10-2009, 10:05 PM

أنا ام احمد أخصائية تطوير خريجة تربية نوعية تكنولوجيا تعليم 2002 جيد جدا واعمل بالعقد المؤقت وليس المميز لانى لم اكن على راس العمل العام قبل الماضى فعملت بالعقد المؤقت على امل ان يعملوا لى عقد مميز هذا العام ولك عندنا فى محافظة كفر الشيخ قالو مفيش عقود مميزة هذا العام وده قرار من الوزارة وكمان حتى الان لم يسلمونا جوابات استلام العمل كما كنا بالعقد المؤقت وانا مش عارفه مين الى فى ايده يفدنى هل اذهب للمحافظ ولا اعمل ايه انا اسفة طولت عليكم بس يا ريت حد يساعدنى ويقولى الحقيقه فين هل فى عقود مميزة هذا العام ام لا؟؟

**safaa_ss** · 05-10-2009, 10:24 PM

على فكرةأنا كنت بقول 36حصة فى الأسبوع مش فى اليوم وإيه حكايةالمنسق العام دى ممكن تفهمهلنا يا أستاذ محمد

**NESCAFIO** · 05-10-2009, 10:29 PM

المشاركة الأصلية كتبت بواسطة shosho_love

انا مدرسه تربيه رياضيه من الشرقيه
وعلى فكره انا قدمت ورقى امبارح وقالوا هناك ان المكتب هايقبل ورق لغايه يوم الخميس8/10/2009
وسمعت من ناس انهارده انه هايفضل مافتوح طول العام بس اللى انا متأكده منه انه هايقبل ورق لغايه يوم الخميس ويوم منا قدمت اخدوا ورق من اللى مش معاه تربوى بيقدم بصوره طبق الاصل من وصل مصاريف التقديم للتربوى وعلى فكره فى تقديم للى عقدهم 1/3/2009

شكراً جزيلاً لتنيبهك أختى الكريم

وأنا من رأى الناس تخليها فى المضمون وتلحق تقدم ورقها قبل 8/10

حتى وإن كان التقديم لأخر السنة

أنا مش بحبط والله الناس اللى لسة ما قدمتش

بس أنا باقول للناس اللى تقدر تكمل أوراقها قبل 8/10 لية ما تكملهاش وتخلص من وجع الدماغ دة

والماسنجر نور بوجود حضرتك

**NESCAFIO** · 05-10-2009, 10:33 PM

المشاركة الأصلية كتبت بواسطة مشمشاية

أنا ام احمد أخصائية تطوير خريجة تربية نوعية تكنولوجيا تعليم 2002 جيد جدا واعمل بالعقد المؤقت وليس المميز لانى لم اكن على راس العمل العام قبل الماضى فعملت بالعقد المؤقت على امل ان يعملوا لى عقد مميز هذا العام ولك عندنا فى محافظة كفر الشيخ قالو مفيش عقود مميزة هذا العام وده قرار من الوزارة وكمان حتى الان لم يسلمونا جوابات استلام العمل كما كنا بالعقد المؤقت وانا مش عارفه مين الى فى ايده يفدنى هل اذهب للمحافظ ولا اعمل ايه انا اسفة طولت عليكم بس يا ريت حد يساعدنى ويقولى الحقيقه فين هل فى عقود مميزة هذا العام ام لا؟؟

أهلاً وسهلاً بحضرتك وإعتبرى نفسك صاحبة الموضوع من دلوقتى مش بس تشاركى

وحكاية العقود المميزة أنا هسأل لحضرتك فيها ويارب أعرف أفيدك

وإن شاء الله ربنا يقدم ما فية الخير وحضرتك تستلمى العمل بعقد مميز

**إسلامى نبض حياتى** · 05-10-2009, 10:35 PM

السلام عليكم

فكرة حلوة اوى لاننا بجد تايهين جدا ومحتاجين نتعرف على بعض عشان اللى عنده معلومات يفيد بيها التانى

انا مروة مدرسة اقتصاد منزلى 26 سنة ومن اسكندرية

وقدمت ورقى الحمد لله الاسبوع اللى فات وكله لغاية دلوقتى تمام

**NESCAFIO** · 05-10-2009, 10:43 PM

المشاركة الأصلية كتبت بواسطة safaa_ss

على فكرةأنا كنت بقول 36حصة فى الأسبوع مش فى اليوم وإيه حكايةالمنسق العام دى ممكن تفهمهلنا يا أستاذ محمد

هههههههههههههه

وهو معقول برضة الواحد هياخد 36 حصة فى اليوم

دة لو هرقليز هايقع من الحصة الثامنة

بس 36 حصة فى الأسبوع ياعنى على أقل تقدير لو السبت مش أجازة هايبأة 6 حصص كل يوم

وشر البلية ما يضحك أنا والله عازر حضرتك جداً وربنا يكون فى عونك

أما بالنسبة لحكاية المنسق العام فدية بأة وظيفة جديدة

وسببها السيدة المبجلة أنفلونزا الخنازير

أما مهامها فهى إن المنسق بيكون حلقة الوصل بين المدرسة ووزارة الصحة عن طريق الخط الساخن للتبليغ فورا عن أى حالة إشتباة فى أنفلونزا الخنازير

دة غير المرورو اليومى على فصول المدرسة كلها علشان نقفش الطلبة اللى بتفكر إنها تكح حتى !!

طبعاً غير المرور عليهم أثناء طابور الصباح ومراقبتهم أثناء الفسحة المدرسية

دة غير بأة إن المنسق دة لازم يتابع غياب الطلبة والطلبة اللى بتغيب دية

غايبة لية ؟

وطبعاً غير كم الإمضاءات اللى بيمضيها فى اليوم على دفاتر التحضير والغياب

والفاتحة على روح الأخصائى النفسى

أكيد إنت دلوقتى بتقولى يا أ/ صفاء يارتنى ما كنت سألتة ؟!!!

**NESCAFIO** · 05-10-2009, 10:50 PM

المشاركة الأصلية كتبت بواسطة إسلامى نبض حياتى

السلام عليكم

فكرة حلوة اوى لاننا بجد تايهين جدا ومحتاجين نتعرف على بعض عشان اللى عنده معلومات يفيد بيها التانى

انا مروة مدرسة اقتصاد منزلى 26 سنة ومن اسكندرية

وقدمت ورقى الحمد لله الاسبوع اللى فات وكله لغاية دلوقتى تمام

أهلاً بأهل إسكندرية الجدعان أخر حاجة

ويا بختك يا أستاذة مروة أكيد إسكندرية ما فيهاش الزحام بتاع القاهرة والحياة عندكوا

فلة شمعة منورة أنا مش بحسد على فكرة

دة مجرد أر

عادى ياعنى

هههههههههههههه

وألف مبروك يا أستاذة مروة على تقديم وقبول أوراقك وعقبال ما نيجى نبارك لحضرتك

على التعيين إن شاء الله

وسلامى لكل أهل إسكندرية اللى قضيت فيها أجمل أيام حياتى

وعلى رأى المثل لو لم أكن قاهرياً لوددت أن أكون إسكندرانياً