من أجمل ما كتب الشاعر أحمد فؤاد نجم

http://www.samysoft.net/forumim/slam/46eab0297c.gif

يعيش أهل بلدي

وبينهم ما فيش
تعارف
يخلي التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبي يا خالد
بنتلم صحبه
ونهتف .. يعيش
يعيش أهل بلدي
يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
عدو الزحام
بكام كلمة فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدي
يعيش التنابله
فى حي الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك إذا عزت توصف حياتهم
تقول الحياة عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوي
دماغهم تخينه
سنانهم مبادر تفوت فى الجليد
ما فيش سخن بارد
بياكلوا الحديد
ما دام نهر وارد
وجاي م الصعيد
تزيد الموارد
كروشهم تزيد
وتسمع وتسلم
بأن التنابله
أو الأكالين
حيسمح كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع
أطيع الخليفه
أطيع والديك
أطيع التنابله
دا مفروض عليك
وتزرع وتبعت لحي الزمالك
وحي الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
إذا حد جاب لك سيرتهم
تبسمل تكبر
وتهتف كذلك
يعيش التنابله
يعيش يعيش يعيش
يعيش أهل بلدي
يعيش الغلابه
فى طي النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح يا صانع
يا شحم السواقي
يا فحم المصانع
يا منتج
يا مبهج
يا آخر حلاوه
يا هادي
يا راضي
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيله الرضا
لأن إحنا طبعا
عبيد القضا
ورزقك ورزقي ورزق الكلاب
دا موضوع مؤجل ليوم الحساب
كمان الصحافه
حتكتب فى حالتك
وتنشر مناظر لخالك وخالتك
وتتطلع يا مسعد عليك الغناوي
وتسمع باسمك
فى قلب القهاوي
تحبك مشيره وبنات الجزيره
وقصه غرامك
تشيع فى الرداوي
يعيش عم مسعد
يعيش يعيش يعيش
يعيش أهل بلدي

http://www.samysoft.net/forumim/nehaya/ffryrty.gif

أحمد نجم بجد أى نعم هو له بعد الأفاظ الخارجه فى معظم شعره لكن
بجد بيعبر عن اللى كل واحد بيحلم يقوله
بيعبر عن الأصوات المكبوته

رحم الله احمد فؤاد نجم

يعيش الشعر
مدام من نجم


شكرا علي الموضوع

اقتباس:

---

المشاركة الأصلية كتبت بواسطة سيف سالم

رحم الله احمد فؤاد نجم

---

اذا كنت تقصد رحمته فى الدنيا تمشى ولكنه مازال على قيد الحياه

اقتباس:

---

المشاركة الأصلية كتبت بواسطة باسم ابو المجد

اذا كنت تقصد رحمته فى الدنيا تمشى ولكنه مازال على قيد الحياه

---

استاذنا
خلاص
احمد فؤاد نجم بتاع زمان مات
كل باع القضية