طاجن حنتس

اولا سلام عليكم
ثانيامعايا ابن مطلع عيني وجنني وابني ده ليه دور كبير في الاكله بتاعه النهارده
ثالثا احكيلكو حكايه حنتس

حنتس ده اسم الدلع بتاع احمد ابني كان مطلعه عليه المقروص ابن اخويا الصغير اللي لسانه قد كده وطبعا الاسم لزق فيه خلاص
رابعا انا عملت اكله بس تحفه انا اللي اخترعتها

ولما عجبت العيله هنا عندي كلهم اتهبلوا عليها

ده حتي بابا اللي مش بيحب الاكل المسبك والتقيل

قعد ياكل ويقوللي منك لله ويااااكل ويقول منك لله

طب ماتوقف ياعم الحاج انا زنبي ايه

المهم قعدنا نختارلها اسم مش عارفين
فقلت خلاص انا هاسميه طاجن حنتس


ومن هنا كان اسم طاجن حنتس


والكل اقترح عليا اني انزلها في مطعم (كل وأنتخ)

اللي هافتحه قريب انشاء الله انا واخويا

طبعا انا هاطبخ واخويا هاياكل
(احكيلكو حكايه المطعم الاول ... موضوعي بقي وانا حره فيه...

انا طبعا مشهوره في العيله بان اكلي حلو واخويا الصغير بالذات بيموت في اكلي

وبيقوللي انتي لازم تفتحي مطعم

وقعدنا نسرح بقي بخيالنا ويقوللي طب في مشكله ان اللي بياكل من اكلك بيبقي عاوز ينام

فبدل مانعمل كراسي نعمل سراير وكل اللي ياكل يأنتخ علي السرير
ومن هنا كانت فكره الاسم> مطعم كل وأنتخ <


خامسا واخيرا ماتقلقوش

الطريقه
بتعملي تخديعه بصل وطماطم وتسبكيهم كانك هاتعملي محشي والتوابل طبعا اللي تحبيها


وتحطي فلفل حامي ورومي اخضرمقطع صغير

وتكوني مجهزه سجق او سوسيس او لحمه مفرمه او لانشون مقطع مكعبات ومحمر او شرايح لحم او فراخ مشوحه او ... او ....

او اي حاجه انتي عاوزاها او منغير لحوم خالص مش هاتفرق كتير

المهم تحطي التخديعه اللي هي بصل مشوح ومتسبك مع طماطم

وعليه فلفل اخضر في صينيه تفرديها وتوزعي فوقها نوع اللحوم المتاح عندك او بلاش لحوم خالص زي ماتفقنا


وبعدين تروحي كاسره علي الوش بيض صحيح بيبقي زي العيون

عدد البيض حسب حجم الصينيه ممكن 5 او 10 او 15 وكمان حسب مقدرتك ورغبتك

وتدخليها الفرن

طبعا كل حاجه مستويه اصلا ماعدا البيض

تسيبيها لحد مالبيض يستوي والطاجن يبقبق يبقبق يبقبق

كده خلاص الف مبروك بقي عندك طاجن حنتس

وبالهنا والشفا
جربوه مش هاتبطلوا تعملوه http://files.fatakat.com/bigsmilies/mood4.gif