قوم دلوقتى ... روح لمراتك ... بوس ايديها
و دى أقل حاجة هطالبك بيها ... هتقول لى : يا عم روح اركن على جنب ...
دى موريانى الويل ... هتقول لى : دى نكدية ..
هتقول لى : دى بوزها شبرين ... هتقول لى : اصلك ماتعرفش حاجة انت لسه مبتدئ
و متفائل و مش عارف اللى فيها ... هتقول لى : دى ستات عاوزة الحرق ...
قول زى ما تقول ... برضه هقولك :
اركن كل اللى انت قلته ده على جنب ... و قوم بوس ايديها و حطها فوق راسك
أنا معاك هما نكديين و زنانين .. كيدهن عظيم ... و دموعهن تماسيحية
معاك ... ان احيانا بيبقا بوزهم شبرين ... و أحيانا ممكن يخلوك تنط م البلكونة من الغيظ
لكن ... جرب ... مراتك تتعب و تعيا عيا يخليها ماتقدرش تقوم لا قدر الله
لمدة شهر
لأ لمدة اسبوع
لأ لأ .... لمدة يومين بس
و اعمل يا بطل حاجة و لا اتنين من اللى هيا كانت بتعملهم
و الله العظيم هتروح تبوس رجليها تقديرا للجهود العظيمة اللي بتقوم بيها
جرب تغسل الاطباق و الصوانى و الحلل و تقف ادام الحوض لحد ما تلاقي ضهرك اتلوح ..
جرب تدعك هدوم و انت بتغسلها او تقف تنشر في البلكونة و تشطف و تنقع
جرب تعمل الاكل مرة و تقف ادام البوتاجاز و الفرن طول النهار
جرب تروح الشغل و تركب مواصلات و يطلع عينك
و مش تروح بعدها ترتاح ؟ لا ... تروح عشان تواصل مسيرة الشقاء
عيال عايزين ياكلوا و زوج راجع م الشغل عايز اهتمام و غدا و و و
جرب تمسح الشقة
جرب تكنس و تنضف
جرب تفرش السراير
جرب تنظم بيت و ميزانية و تفكر في مليون حاجة فى نفس الوقت
و الله أبطال و ليهم الجنة
الجنة تحت اقدام الامهات مش من شوية
و ياااه بقا لو كانت مرأة عاملة
سبحان الله
بيجيبوا الطاقة دي منين
و بيستحملوا ازاي
و ايه كل التضحية و التفاني ده
يعني مثلا
ترجع من الشغل تلاقي المدام عاملة الاكل و بتغسل و بتنضف
كله في نفس الوقت ... مع انها راجعة من الشغل زيها زيك
بس انت رجعت من الشغل صليت و ريحت جسمك
و يمكن قعدت بكل تناكة ادام الكمبيوتر حاطط رجل علي رجل
انما هيا لا ... رجعت من شقاء العمل الي شقاء البيت
يوم كامل 24 ساعة شقاء في شقاء
30 يوم في الشهر و 365 يوم في السنة السيناريو بيتكرر
يبقا مين بيشتغل اكتر ؟؟؟؟
للانصاف فقط اقول ... الراجل ده باشا و بيه
و الله ما بيتعب نص تعبها
و يا أخى سبحان الله ... عندهم صبر رهيب
عمر ما الواحد لاقاهم مقصرين أو بيتدلعوا أو بيشتكوا
كل يوم كل يوم ... نفس الهم كل يوم
و الله و بدون مبالغة
يستحقوا مليون كلمة شكر
كل ما اقول كده لحد من زميلاتي
تقول لي يااااااااااه اول مرة اشوف راجل بيشكر و بيمدح فينا
لا يا جماعة
ازاي الرجالة ما تشكرش بعد كل ده
ده كفاية طلقة واحدة من طلقات الولادة ...
كفاية مشوارين تلاتة للاولاد و السوق و و و
مش بقول الراجل مابيتعبش
اكيد طبعا بيطلع عينه برضه
لكن تعبه ... عمره ما هيوصل واحد علي مليون من تعب المرأة
ربنا يديهم الصحة و الصبر و الجنة و نعيمها