الفصل الخامس" البيانات والمعلومات والعنصر البشرى "

الفصل الخامس
البيانات والمعلومات والعنصر البشرى
قبل ما نبدأ نتعرف على البيانات والمعلومات فيه مصطلح بنسمع عنه كتير اسمه
تكنولوجيا المعلومات أو تقنية المعلومات Information Technology
واختصاره بالرمز IT
سمعاك يااللى بتقول يااااااااه كل دا اسم ،
هأرد وأقولك له حق طبعاً يكون المصطلح بالإسم اللى إحنا شايفينه فوق ليه بقى ؟؟؟كلنا بقينا عارفين إن العالم أصبح قرية صغيرة وإن الحدث اللى كان ممكن تسمع عنه ويوصلك فى شهر بقى بيوصلك وقت حدوثه وإن المعلومات كل ثانية بتزيد فكل دا محتاج تنسيق وتخزين وحفظ ومعالجة عشان توصلنا وهو دا معنى المصطلح اللى كتبناه ، ياله بقى نعرفه بطريقة علمية
تكنولوجيا المعلومات أو تقنية المعلومات (Information Technology(IT
* مجموعة الأجهزة التى من خلالها تتم المعالجة وتخزين المعلومات التي تحتوى على صوت ، صورة ، حرف أو نص.
* الإهتمام بالدمج بين الحاسبات والربط بينها وبين شبكة الانترنت .

نبدأ بقى نخبط على الباب عشان ندخل ونتعرف على البيانات والمعلومات والعنصر البشرى
لما أقولك أنا معايا 300 ياترى فهمت من كلامى دا حاجة؟؟؟
إنت هتسألنى 300 إيه، جنيه وألا قرش وألا 300 كراسة وألا قلم ؟؟
يعنى ما قلتش لك حاجة مُحدَدة وما فهمتش حاجة صح ؟؟
يبقى دا اسمه بيان .
تسمع عن المناجم؟؟دى بتكون تحت الأرض وبيستخرجوا منها المعادن وزى الحديد مثلاً ، وبيكون حديد خام عايز يدخل المصنع ويتجهز ويتقطع وتحصله عملية معالجة وفى الآخر يطلع فى الصورة اللى بنشوفها
معايا وألا..................؟؟؟؟؟؟؟؟؟؟؟؟؟؟؟؟
بص بقى الحديد وهو لسة مادة خام عامل زى البيانات وعشان كدة بنعرف البيانات بإيه؟؟
البيانات Data
هى المادة الخام للمعلومات وتشمل حقائق ليس لها معنى
يعنى مالهاش قيمة وزى قلتها ولها اسم تانى ( الدخلات )
أنواعها
صوت ، صورة ، حرف ، رقم

طيب لما الحديد يتجهز ويطلع فى الصورة اللى بنشوفها كدة بيكون زى المعلومات
المعلومات Information:-
هى ناتج معالجة البيانات
ولها اسم تانى ( المخرجات )

خلاص عرفنا البيانات ( المدخلات ) والمعلومات ( المخرجات )
ممكن بقى نعرف إزاى بتتحول البيانات إلى معلومات ومين المسئول عن هذا التحويل . طيب هو أصلاً عملية التحويل أو التجهيز سميناها إيه؟؟؟؟؟؟؟؟؟
شاطرين كلكم
اسمها المعالجة
يبقى بقى فاضل لنا نتعرف على المعالجة
المعالجة بتكون عن طريق جزئين رئيسين هما
1- الذاكرة Memory
2- وحدة المعالجة المركزية CPU

أولاً الذاكرة Memory
هى أيضاً بتنقسم لجزئين
أ- الذاكرة المؤقتة Ram
ومن اسمها نعرف إنها
*مؤقتة
* متطايرة
* يمكن التعديل فيها
*يتم التخزين فيها ولكن تفقد محتوياتها بعد غلق الجهاز .

ب- الذاكرة الدائمة Rom
وأيضاً من اسمها نعرف إنها
* دائمة
*لايمكن التعديل فيها
* للقراءة فقط
*يتم التخزين فيها ولكن بواسطة الشركة المصنعة و لا تفقد محتوياتها بعد غلق الجهاز .

ثانياً وحدة المعالجة المركزية CPU
واشمعنى هى اللى مش هتتقسم جزئين ، هى جات عليها يعنى
أ- وحدة التحكم Control unit
*هى شرطى المرور الذى يوجه تدفق البيانات .
* هى تتحكم فى جميع الوحدات الأخرى .

ب- وحدة الحساب والمنطق (Arithmetic and Logic Unit)
*تقوم بالعمليات الحسابية والمنطقية .
كيف إذن يُعالج الكمبيوتر البيانات ؟؟؟؟
1- يتم إدخال البيانات فى صورة رقمية بواسطة وحدات الإدخال .
2- يتم تخزينها فى الذاكرة الرئيسية حتى يقوم الكمبيوتر بمعالجتها .
3- يتم معالجتها داخل وحدة المعالجة المركزية لإجراء عمليات حسابية ومنطقية .
4- بعد معلجتها يتم تخزينها فى وحدات التخزين أو طباعتها من خلال وحدات الإخراج.

يعنى كدة بتكون مراحل المعالجة هى
إدخال بيانات ............. معالجة البيانات .............إخراج معلومات
والمعاجة بتكون أكثر من عملية من العمليات التالية
التصنيف ، الحساب ، التخزين ، المقارنة ، التلخيص

الحمد لله قربنا نخلص فاضل باب واحد ندخله ونتعرف على اللى وراه وبس
يا ترى إه هو الباب دا ؟؟
تعالوا نسترجع مع بعض أجزاء أو مكزنات نظام الكمبيوتر
1- الأجهزة
2- البرمجيات
3- البيانات
4-..........فاضل مين ؟؟؟؟
صح ، مظبوط ، فاضل العنصر البشرى
العنصر البشرى
ودا سهل وبينقسم إلى
1- المصمم Designers
الذى يقوم بتصميم الرسومات
2- المصنع Builders
الذى يقوم بتصنيع جهاز الكمبيوتر .
3- المبرمج Programs
الذى ينشئ البرامج والتطبيقات التى نستخدمها

انتهى الدرس الخامس