قصتي مع رياض الاطفال

[رناد و محمد]

بسم الله الرحمن الرحيم
طبعا الجواب باين من عنوانه زي مابيقولو...انا بنتي بقدملها في kg1 السنه دي باذن الله...وبادور من شهر 4 اللي فات..زي كل الأمهات اللي بتستنى اليوم ده كدليل على بداية مشوار حياة طفلها العمليه...وكان يوم بصراحه ماتمناش لحد يعيش مرار التجربه...احساسك انك بتتسول مكان لطفلك في كافة المدارس وكأن الحكومه نسيتنا و الخاصه مستغنيا عن فلوسك...
طبعا انا باتكلم عن المدارس التجريبيه الحكوميه ومدارس اللغات الخاصه...بعد جوله عامه في شهر 4 توصلنا لقرارات أوليه...ان المدارس الحكوميه تعتمد على السن بشكل اساسي...لكن مدارسنا الخاصه ليها شروط غريبه...يعني مثلا اتفقت مدرستي المستقبل للغات ومدرسة المدينه...((احنا من الغربيه-طنطا وماجاوارها))..اتفقتا على ايه بقى انهم مايقبلوش غير الاطفال اللي ليهم اخوات في المدرسه...وياللروعه يعني اجيب طفل منين يبقى اخو بنتي الكبير اذا كانت دي اول فرحتي يعني؟! وتعالي قدمي ويتنج ليست يا مدام بس ماتأمليش انها تقبل...
مدارس السلام الخاصه للغات..حدث ولا حرج يعني عن التجاوزات في قبول الاطفال فيها عن طريق المعارف والعلاقات الشخصيه يعني قدمنا وطلعت عينا وقالو لو اقل من 4 سنين قدمو في اماكن تانيه واحنا معديين السن وقلنا نقدم برضه..قالو السن كبير فوق 5 سنين واتفاجأنا بناس اتقبلت اقل من كده بكتير بس عادي من حكم في ماله ماظلم..طيب نقدم بيبي كلاس قالولنا بعد العيد في اول شهر 9..ورحنا نقدم بالضبط يوم الاتنين اللي بعد العيد مباشرة...لقيتهم بيقولولي انتي لسه فاكره احنا قفلنا باب الحجز يوم السبت..سالت اي سبت يعني؟! قالولي ماحنا لقينا الناس واقفالنا على الباب يوم السبت وفتحنا التقديم من 9 لحد 9 ونص والعدد اكتمل...وبرضه قدمي ويتنج ليست وربنا يسهل...والله العظيم فتحو التقديم نص ساعه يعني الملفات دي اتباعت في نص ساعه والناس قبلت في يوم...مع العلم انهم الاحد اجازه...وبرضه ناس اقل من السن بكتيييييييير مقبوله هناك...
مااااااشي طيب نيجي للحكومه وكله اتفق طبعا ان التقديم اخلاقيا في شهر 7...قلت ماشي...ومن شهر 6 لفيت على كل المدارس التجريبيه اللي حوالينا مدرسة الجلاء التجريبيه المتكامله ومدرسة النصر التجريبيه ومدرسة الامام الشافعي التجريبيه..اشتريت الملفات طبعا تتراوح الاسعار من 20للجلاء و 17 للنصر و 12 للامام الشافعي...ويخلوك تشتري الملف و بمجرد ماتدفع الفلوس يقولك ايه بقى...احنا ادارة شرق يابيه انت تبع ادارة غرب...او العكس طبعا...و بمجرد ماتيجي تقدم الملف وبعد ماتدفع دم قلبك 10صور ب 16 جنيه و 7 جنيه شهادة ميلاد كومبيوتر وتصوري بطاقتك وبطاقة الزوج و نسيت وصل النور ورجعت اجيبه تاني وآدي مواصلات مضاعفه كمان اهو...لقيت الميس الي بتستلم الملفات بتقولي على فكره بنتك مش هاتقبل هنا روحي قدميلها في مدارس الارياف...طيب ليه يعني علشان تبيع ملف تقديم مش مكلفك 3 جنيه بعشر اضعاف وتكلفني كل المصاريف دي وشوف بقى على كام مدرسه غير اكبر تلفيات بتبقى المتاجره في احلام الاهالي..لما المدارس الحكوميه مافيهاش مكان اصلهم فصلين...والمدرسه الوحيده اللي فيها مكان مدرسة الاورمان بمصاريف 5000 جنيه غير اليونيفورم غير باص بالف جنيه..يعني مصاريف جامعه مش رياض اطفال ده غير بعد المسافه على طريق سريع كمان...
انا مش باشتكي منتظره شيء انا باسال انا واللي زيي ولادنا يروحو فين؟!لاحكومه قابلانا ولا خاصه طايقانا يعني نوديهم فين؟مش من حقنا نحلم بولادنا في مستوى تعليمي كويس ومصاريف معقوله؟!لو وديت بنتي بحوالي 7 الاف في السنه لرياض اطفال طيب كمان سنتين على اقل تقدير ابيع ايه علشان ادخلها ابتدائي؟! قولولي لما لسه الواسطه بتتحكم في مصيرنا ومصير اولادنا ايه اتغير .؟.! ولنا الله من قبل ومن بعد...