التاريخ سيقف طويلا أمام ثورة الغضب المصرية التي هزت العالم وإليكم البيان التالي :

[محمد عبد العظيم وسية]

بسم الله الرحمن الرحيم والصلاة والسلام على أشرف المرسلين سيدنا محمد صلى الله عليه وسلم وعلى آله وصحبه أجمعين
ثم أما بعد

حققت ثورة الغضب المصرية آمالا عظيمة وجددت شباب الأمة العربية والإسلامية
وأثبتت أن هذا الشعب المصري وأن الأمة الإسلامية عندما تستيقظ فهي طوفان مهلك لا يقف أمامه أحد.

تأثرت كثيرا باتصل عجوز سعودية تقول : بارك الله فيكم يا شباب مصر أعدتم الأمل لنا في الأمة الإسلامية .

وأيا كانت النتائج برحيل مبارك أو بقائه
فإن الشعب قال كلمته وعلا صوته ولم يقف أمامه أحد مهما كان

أين رموز الفساد في الدولة ؟
لم يتخيلوا أبدا ما حدث . ولم يتوقعوه
ظنوا أننا سنبقى نعاجا صامتة على نهبهم وفسادهم وإفسادهم
وأتساءل : ما شعورك الآن يا أحمد عز ؟ ويا حبيب العدل ؟ وما شعور كل الجبناء الآن .
تذكرت مقولة جدتي رحمها الله : يا محمد يا ابني الكفن مالوش جيوب .
هياخدوا ايه معاهم في القبر ( ذهب .. ياقوت .. مرجان ) أحمدك يارب أنك نصرت الشباب وخلصتنا منهم .

أرجو من الله أن أطمئن عن كل أحبابي وأصدقائي وطلابي في بوابة التعليم المصري .

وسأوافيكم بقصيدة ليست ككل القصائد .... بعد الفاصل .
والسلام عليكم ورحمة الله وبركاته
إنها إرادة الله

[شريف]

اهم شئ يا استاذ محمد حالة البلد
ربنا يستر علي مصر
الهوجة خلصت
و الرسالة وصلت
و المستحيل حصل
كفاية بقا مظاهرات عشان حالة البلد ما تدهورش اكتر من كده
انت في السعودية يا استاذ محمد
مش حاسس باللي حاصل

بنقول ان الشباب دول حققوا المستحيل
لكن في عقل بقا و حكمة بقا

حققوا مطالب كانت في الخيال
خلاص بقا
مانسوقش فيها لحد ما البلد تتدمر
و احنا مرصودين يا جماعة

الكلاب كلهم اللي ذلوا البلد اتذلوا
يبقا خلاص

نرجع من ميدان التحرير
و كفاية مظاهرات بقا
و نشوف شغلنا و نشوف اكل عيشنا

الراجل قال مش هيرشح نفسه تاني
ايه المطلوب بقا ؟ نخنقه ؟ نعدمه ؟ نذله ؟
ياريت نفتكر اي قرار حكيم او موقف ايجابي له

او علي الاقل دفاعه عن ارض مصر في حرب اكتوبر

انا مش مع قلة الادب اللي بتحصل من البعض اللي بيشتموا الريس

انا مع تداول السلطة
مع تغيير الوجوه
مع الثورة علي الفساد

لكن مش مع ان مصر اقتصادها ينهار
مش مع ان المحلات تولع
مش مع ان راجل عجوز بيتعالج مش عارف يقبض معاشه لحد دلوقتي
مش مع كل ده
حرااااااااااااااااااااام
كفاية كده
لازم يكون في عقل و حكمة

رجاءا كل واحد من اللي في ميدان التحرير يرجع بيته
انا كنت وسطهم
من يومين
بشوف ايه اللي حاصل في البلد
و معاهم حق
و عملوا اللي كل الناس بتتمناه

و جابوا جزء من حقوق المظلومين
لكن

That's enough
في لحظة معينة لازم نقول فيها كفاية
عشان لو فضلنا ساعة كمان في المظاهرات دي
الساعة دي اقتصاد مصر فيها بيتدمر
و الالاف بيتأذوا

الراجل حسني مبارك ده رمز للوطن
مهما غلط و مهما كان فاسد و مهما كان ظالم

ارتحنا لما عرفنا انه هيمشي
لكن يمشي باحترام لانه رمز

بستغرب اوي من كل المنافقين اللي كانوا بيمدحوا فيه
و دلوقتي بيطعنوا فيه

احمد عز و الحزب الوطني و الشلة الفاسدة دي تغور في داهية
سرقتنا و نهبتنا

لكن مبارك رمز
لازم يخرج من السلطة بشياكة

لاننا شعب محترم
لازم نحترم الكبير
و نفتكر له اي شئ كويس عمله
و ربنا يحاسبه بقا علي اي ظلم في عهده

و لي تعليق اخر

و ربنا يحفظك يا مصر
ربنا يحفظك يا مصر

ربنا يحفظك و يحفظ امنك يا مصر
من اللي بيزيطوا في الزيطة

[المهندس هشام كمال الدين]

السلام عليكم
الرساله وصلت كفايه كده لازم ننتبه لمن يركب الموجه ولنعلم أن الاصلاح لن يأتي في يوم وليلة
أرجوكم ارحموا البلد.............. ارحموا البلد
يا جماعه من له اي قريب واقف في ميدان التحرير أرجوكم أتصلوا بيه وخلوه يرجع
كل اللي عايزينه أتنفذ لسه في ايه تاني
ولازم مبارك ينهي المتبقي من فترة رئاسته بكل شرف وهيخرج
هنضيع والله أحنا مش بنام من صوت الرصاص ورائحه قنابل الغاز المسيل للدموع
أرحمونا.

[أشرف السيد]

الرسالة وصلت ويكفي ذلك يا شباب مصر المخلصين

وفعلا ما يستطيع قائد فعله

[س ا يوسف]

لابد من حل المجالس لعدم شرعيتها
لابد من حكومة موسعة
لابد من تعديل 88 من الدستور قبل 76 و77
ان ما حدث لم ولن يحدث مرة اخري

[محمد بن عباس]

الحمد لله فعلا الرسالة وصلت وكفى مظاهرات فاللهم احفظ مصر من كل سوء

واجعل مصر واحة للأمن وألامان

[sherena]

انا معاكم وفعلا الرسالة وصلت وكفاية كدة وبعدين لازم نقدر ان الراجل ده كان حاكمنا 30 سنه اكيد له انجازات وبعدين احنا عايزين التغيير فى مصر مش فى شخص

[ياسر الدقاق]

بالطبع كلنا مع التغيير
كلنا ضد التوريث
كلنا ضد الفساد
ولكن ايضا
كلنا مع الإستقرار
كلنا مع الأمن الذي عدمناه في الأيام الماضية
كلنا ضد النهب والتخريب الذي يحدث في البلاد

[أستاذ السيد على]

نعم للتغيير لا والف لا للتخريب والتدمير

اضم صوتى لصوتكم جميعا حققتم ماتريدون ياشياب مصر

فلماذا العناد فلننتظر ونتريث حقنا للدماء وحفاظا على الوطن