طبعا شوربه السي فود من اصعب الشوربات لانها بتتعمل علي مرحلتين

بس النتيجه تستاهل بجد انا عملت كميه صغيره علشان ماتقعدش في قرابيزي

لقيت الكل بيتخانق عليها

الطريقه

اولا ...البيز


قشر الجمبري ورؤوس السمك

يتغسلوا كويس قوي بالدقيق والخل ويتشوحوا مع بصل وتوم مفرومين في الكبه ونحط عليهم ميه ونحط جزر وكرفس وياريت لو زعتر فريش ونسيبهم يغلوا

وبعدين يتصفوا كويس

وده مش الشوربه ده البيز او الاساس اللي هانعمل بيه الشوربه

ثانيا الشوربه


نشوح بصل مفروم ومعاه جمبري وسبيط متقطعين رفيع ولو في بقي شويه كابوريا وممكن حتتين سمك فيليه نقطعهم ونحطهم

بعد ماكله يتشوح نحط معلقه دقيق ونلفهم بيها علشان تتقل الشوربه شويه

وبعدين نحط البيز اللي عملناه ونسيبهم كلهم يغلوا علي النار

ونتبل الشوربه ملح وفلفل وفي الاخر نحط كريمه لباني وتقدم طبعا ساخنه





والان مع فقره تكات نوسه




1-انا عامه باحتفظ براس السمك الفيليه وكمان قشور الجمبري في الفريزر ولما تتكون كميه كويسه باعمل عليها الشوربه



2-في العزومات باعمل البيز قبلها بيوم وتاني يوم باكمل الشوربه عادي

او تتعمل كلها قبلها بيوم وتتسخن لكن انا بافضل انها تكون فريش



3-الكريمه اللباني اساسيه ولكن لو مش موجوده ممكن نحط وش اللبن مع شويه لبن



4- ممكن نقدم جنبها توست مقطع مكعبات ومقلي بيبقي طعمه خرافه

وده عامه بيتقدم مع اي شوربه





واخيرا وليس اخرا اشوفكم علي خير الموضوع القادم