اهلا ومرحبا بكم في نوسه لاند

حيث المتعه والترفيه والاكلات اللذيذه الشهيه يجتمعون في مكان واحد

احبائي اعزائي فلذات اكبادي

انه ليسعدني بل ويشرفني كلا بل ويحزنني

ان اقدم لكم اشهي الاطباق والذ الاكلات

حصريا فقط لمنتداكم الحبيب الغالي

كما احب ان اتوجه بخالص الشكر والتعازي

للاستاذه نعمه الصديقه العزيزه علي هذه الهديه الرائعه

واتمني من الله ان اقدم لكم احلي ماعندي من اكلات ووصفات
تنال اعجابكم ان شاء الله

والله الموفق



اول اكله احب افتتح بيها رحلتي معاكم

هي اكله بسيطه وسهله جدا

وذلك مراعاه لظروف الساده الرجال اللي موجودين معانا
واللي اكيد مالهومش في المطبخ

الاكله دي يقدر اي رجل ينفذهابسهوله واكيد اي ست كمان تنفع للعشا او الفطار

ولو جربتوها بجد هتبقي الاكله المعتمده عندكم

يلا نبتدي بسم الله





الفريتاتا هي عباره عن قرص بيض عادي بس بشكل مختلف
وده للتجديد يعني لو عندك ضيوف علي العشا او علي الفطار وحاببه تجددي
يبقي عليكي وعلي الفريتاتا
يلا نبتدي باسم الله



طبعا الاساس فيها البيض



والكميه حسب عدد الاشخاص

نكسر البيض في بوله غويطه ونضيف عليه ملح وفلفل اسود ونقلبه كويس


في طاسه نشوح بصل تقطع صغير لحد مالونه يصفر فقط


ونضيف البيض

وبعدين نضيف زتون اسود حلقات وفلفل اخضر حامي او رومي متقطع صغير و سوسيس متحمر ومتقطع حلقات

ومانقلبش خالص ونسيبه يستوي شويه



نضيف جبنه رومي او شيدر او موتزاريلا مبشوره علي الوش

ندخل الطاسه الفرن تكمل سواها

تزين وتقدم



تكات نوسه

1- ممكن نضيف لبن او كريمه لباني للبيض بيخلي قوامه اخف وهش ولكنه مش اساسي


2- البصل يقطع قطع صغيره ولكن مايبقاش مبشور او مفروم لانه بيغير الطعم خالص

3-الطلاينه بيعملوها ب البانشيتا او اللحم المقدد وده زي البسطرمه عندنا كده بس بيبقي كله دهن
فبيحمروه الاول علشان ينزل الدهون اللي فيه لكن انا باحب اعملها بالسجق او السوسيس وده بيبقي خطوه اختياريه ممكن نستبدله باي نوع لحوم تاني ممكن بسطرمه اولانشون مقطع مكعبات او لحمه مفرومه او فراخ مفرومه او حتي مشروم ولكن لازم تكون مستويه قبل مانضيفها وطبعا ممكن الاستغناء عنها خالص والاكتفاء بالبصل والفلفل والزتون والجبنه


4- لو الطاسه بيد فايبر وممكن تتحرق لودخلت الفرن ممكن نكمل سواها علي البوتوجاز بس نوطي النار خاااااااااااالص ونغطيها
علشان ماتتحرقش من تحت ويكون الوش لسه ني
ولو حسينا انها ممكن تتحرق نحطها تحت الشوايه علشان الوش يستوي اوحتي نقلبها في صينيه اكبر ونكمل سواها


5- الاكله دي ميزتها انها زي البيتزا تتعمل باي مكونات موجوده وتقدري تخترعي فيها كتير وانتي وزوقك

6-بالهنا والشفا