ثورة ثورة حتى آخر مواطن فى مصر

[نعمه محمود]

ثورة ثورة حتى آخر مواطن فى مصر


الثورة جميلة وبنت ناس والكل بيشكر فيها إلا الفلول
اللى أنا منهم....... لكن للأسف اللى قاموا بالثورة معرفوش يحموها
لأنها جت معاهم by luck ومقدروش يحافظوا عليها
طبعا محدش ينكر إننا اتخلصنا من الفساد اللى كان متوغل فى كل حاجة
وخلصتنا من عصابة كانت بتحكم البلد ماشي لحد كده جميل
طيب وبعدين؟؟؟؟؟؟؟؟ الخطوة الجاية يعنى
عاوزة بقي أحس بالتغيير بجد .عاوزة ارجع أمشي فى الشارع وأنا مطمنة
مش عاوزة أخاف على ولادى وهما وحدهم فى البيت
ليه الناس بتقول تمن الحرية غالى؟؟؟؟؟ أنا مكنتش من العبيد
ولا أى مواطن فى مصر كان عبد لحد
ليه مطلوب منى أدفع تمن سلعة أنا مااشتريتهاش
هنتظر لحد ايمتى عشان الحياة ترجع لطبيعتها
احنا فعلا قضينا على نظام فاسد
لكن الفساد موجود فى كل حتة
اتخلصنا من الشرطة و الحمد لله
البلطجية ملوا البلد
حتى عقلنا اتخلصنا منه وبقينا نعلق أى حاجة على شماعة الفلول
لأننا معندناش حلول واقعيه ومش عاوزين نواجه نفسنا
ان نص الشعب بقي بيبلطج على النص التانى
أى موقف مش على هوانا نقول الفلول
نفسي أفهم أهالى الشهدا قاعدين ليه فى التحرير
هل ده هو اللى هيرجع الشهدا ليه وقف الحال ده
والغريبة ان مذيعة العاشرة مساء بتقول لقد بدأ
أهالى الشهداء يتململوا من نمط حياة الباعه الجائلين فى الميدان
ده على أى أساس ؟ على أساس ان الميدان بقى ملك لاهالى الشهدا
يرضى ربنا إنى أنزل النهاردة أودى ولادى استشارة بعد عملية جراحية
وبعد ما اوصل ميدان التحرير الاقى الناس بتجرى تحذرنا
ارجعوا بسرعه هيموتو ولادكم ويكسروا العربية
ليه ياسيدى؟؟؟؟ خناقة بين أهالى الشهدا والبائعين
ياحلالالالاوة على رأى مظهر أبو النجا
ابص ألاقى انابيب بوتجاز بتنفجر وشوم وعصي
كل ده فى ميدان التحرير ونعم الثورات بجد
طيب بالله عليكم اقتنع بيها ازاى
لما شفت المشهد ده قلت


عارفه سواد العسل؟
اهو ده اللى حالك ليه وصل
يابلد معانده نفسها
ياكل حاجه وعكسها
انسينى انا صبرى انتهى
ومش هشوف فيكى امل
وحسيت ان شعار الثورة اصبح ثورة ثورة حتى آخر مواطن فى مصر
بعد أن كان شعارها ثورة ثورة حتى النصر


ملحوظة رفيعه
ياريت النقاش يكون عقلانى بلا تشنج
مش عيب ابدا اننا نختلف
العيب اننا نخسر بعض عشان مختلفين
وياريت مش ألاقى عضو مسجل النهاردة داخل يرد
على الموضوع
معلش أنا ديكتاتورة

[دعاء شديد]

بصى يا نعمه
كل حاجه بعد الثورة زادت ... اه والله
كنا بنقول زمان قبل 25 ان مفيش ديمقراطيه ... لان الي حاكمين البلد ديكتاتورين
دلوقتى بسم الله ما شاء الله ......... احنا الي بنصادر على رأي بعض
فزادت الديكتاتوريه بس بغباء

***********
زمان كان الموظفين بيقولوا ايه "هنشتغل على اد فلوس الحكومه"دلوقتى الحمد لله محدش بيشتغل وعايزين فلوس من الحكومه
هو كده

**********************
زمان كان الاعلام فاسد وفى تعتيم ولما
يقولوا 300 جريح معناها انهم اكتر من 1000
دلوقتى بقى كله فبركه واخبار لا صحه لها

*************
زمان كنا بنزهق من كتر اعلانات رجال الاعمال الي فى الجرايد
دلوقتى بنزهق من صور الصحفين الي لازقه فى كل مقال مهما كان حجمها
على اساس ان الديمقراطيه ان الصحفى ينزل اسمه وصورته
مش مهم كاتب ايه المهم الصورة يا بيه

*******************
زمان كنا بنكره المدير ضعيف الشخصيه
دلوقتى مفيش حد قيادى الا علشان شخصيته ضعيفه

****************
يبقى الطبيعى ان اهالى الشهدا بعد مكانوا يظهروا فى اى برنامج ويطالبوا
بحق دم الشهيد انهم ينزلوا ميدان التحرير
كل حاجه بقت زياده لدرجه انها بقت ماسخه
وكل واحد له سلطه على الاقل
وعايز يقهره ... والنبى دى الديمقراطيه والحريه ؟؟؟؟
ملعون الي فهمهالهم كده

المفروض يغيروا اسمه ميدان التدمير
بقى نقطه انطلاق للتدمير مش للتعمير

*********************
حمد الله على سلامتكوا من ميدان التدمير
وربنا على القوى والمفترى والغبى

من فلوله من الفلول

[جمال سراج]

aشوفى يا نعمة هأقول رأيى اللى هو مش كيميا باختصار زى ما بتقولى الثورة دى جت كدا مكنش فيه تخطيط هناك سلبيات كتير بعدها أهمها محاكمات الشرطة وعفوا أنا مش هسميهم شرطة أبدا لأن المفروض إن الشرطة تحمى الشعب لكنها كانت تحمى النظام ولصالح النظام فقط وعشان نكون واقعيين مش الشرطة وحدها ... الجيش برضوا كان يحمى النظام لأن رئيس الجمهورية كان واحد من الجيش المهم المفروض الحال يتغير لكن دا صعب على بتوع الشرطة اللى فى يوم وليلة دخل الأسياد بتاعهم السجون والمعتقلات وتحول الحال وانقلب البلطجية اللى هما أصلا ربوهم وعملوهم عليهم لأن بالتأكيد مين ربى البلطجية غير بتوع الشرطة سواء بتوع مخدرات او سلاح او غيره دا رأيى كانوا يعملون بمدأ نفع واستنفع المهم الآن رجال الشرطة والجيش وقد تغير الحال فيه منهم ناس كتير خصوصا بالشرطة مش قادرين يفرقوا بين البلطجة وبين الحفاظ على البلد ومقدراتها وحماية كيان الدولة يعنى بيتصوروا انهم لو بلطجى مات هيتحاكموا ويلاموا والحل فى إيد الجيش والحكومة انها تدعم الناس دى وتقف معاها وتمنحهم صلاحيات التصدى للبلطجة دون مساءلة بس قبل ما يحصل دا يطهروها الأول لأن الغالبية منهم مازلوا يتعاملون بمبدأ العهد الماضى ... نظام الفردة يعنى والبلطجة على الغلابة بس أصحاب الحقوق انما مش بيقدروا يقفوا أمام البلطجية الحقيقيين برأيى أن اللى مش شايف شغله منهم يمشى فى ستين كاسحة وهناك من الشرفاء الكثير اللى يقدر يخدم بلده بأمانة ولو كنت صريح شوية أقولك إن بلدنا دى عاوزة أحكام عرفية ويمسك الجيش الحكم سنتين تلاتة وتتم محاكمات سريعة كعادة الجيش الحزم والسرعة فى أمور البلطجة لكن للأسف هناك معارضات شديدة لكدا من أعوان الغلب اللى بيدخلونا فى حتة الديمقراطية والحريات والأفلام والشعارات اللى مش وراهم غيرها والبلد عمالة تولع والبلطجة فى تزايد وزى ما بيقول وزير الداخلية المحترم إن البلد تشهد انفلاتا أخلاقيا وأمنيا لو جينا لأهالى الشهداء برأيى أنهم عندهم حق --- طبعا بتكلم عن الناس المحترمة مش البلطجية ومش كل البلطجة الحاصلة الوقتى من اهالى الشهداء ولكن من المندسين بينهم اللى عاوزين البلد تولع واللى المفروض يبادوا فورا ودون اى مساءلة او محاكمة لان دول وباء على مصر انما اهالى الشهدا عندهم حق فى المطالبة بالاسراع بالمحاكمة مش كل شوية تاجيل تاجيل برغم ان القضايا واضحة زى الشمس فى حين ان فيديو يتعرض على النت فى ثانية يحول الموظف اللى بيعلم الولاد فى الحضانة وبيعاقبهم للجنايات اى عدالة هذه واى قانون دا هل الاحكام والقوانين فى مصر تنفذ على الغلابة بس!!!!!!!!!!!!!!!! أعتقد أنها إلى الأن وبالطريقة دى تبقى كدا!!!!!!!!!!!!!!!!!!!!!!!!!!!!!!!!!!!!! شكرا يا نعمة وربنا يجيب العواقب سليمة وغسلمى يا بلادى

[شريف]

[Mr:M.Kamal]

no comment

[المهندس هشام كمال الدين]

بسم الله الرحمن الرحيم
أبدأ ردي علي الموضوع بالكلمة الخالدة .. لأبي القاسم الشابي إذا الشعب يوما أراد الحياة.. فلا بد أن يستجيب القدر كلمات مبهرة ساطعة في سماء الحرية لان الثورات لا تولد عن طريق الصدفه بل هي وليدة حاكم ظالم يقود مجموعة من متخصصي السلب والنهب لمقدرات شعب مسالم تحمل الظلم والفقر فإنتفض ليتحرر..وعن رأيي الشخصي لا أعتبرها أنتفاضة شعب بل ثورة شعب. والثورة تعني التغيير وتعني الأستمرار حتي تتحقق او الموت دونها. والمصري هو المصري الذي أحب عبد الناصر لأنه أنحاز للفقراء وهو نفس المصري الذي كره مبارك الذي أنحاز للأغنياء ومكنهم علي شعب بسيط.. لذا تعددت ردود الافعال بعد الثورة يقودها فلوله في محاولة شبه مستحيله للعودة بنا الى الوراء مستترين بين الشرفاء ولكن الله غالب على أمره وسيرد كيدهم. وبنظره واقعية للأحداث نجد أن العيب فينا وليس في الثورة العيب في كم الهمج من الشعب الجاهل الغير مدرك لعظمة ما أنجبته الثوره من الإطاحة برموز الفساد والأتجاه لمستقبل أفضل وأن الثوار ليس لهم دخل فيما يحدث من تصرفات الغوغاء. ولانستطيع القول أن الثوار هم من تمتلأ بهم الشوارع يبيعوا ويشتروا ويسببوا الهرج والمرج في كل الأحياء. أري أن نصبر قليلا فالثوره لم تأتي ثمارها في أيام قليلة. حما الله مصر وأعز شعبها. وشبعه بيتزا وريش بالباربيكيو كمان
مجرد رأي...

[حبيبه المصريه]

تعليق مبسط جدااا
فوضى فوضى فوضى
لآخر شبر فى مصر
لى عوده لتواصل اكبر
سلمت أناملك
وبجد مش عارفه السيرفر بيودى الصفحه فين
ولا صندوق الادوات اللى يخلينا نقرر اعتزال الكتابه

[Mr:M.Kamal]

هو انتوا يا جماعه بتحذفوا الاراء اللى مش على هواكوا شكرا كتير ليكم ولتحيا الثورة

[شمس بياض]

دى نتيجة واحدة من نتائج حكم مبارك والناس زعلانة علشان الثورة قامت
فيه ناس بتاكل بيتزا وسكالوب وبانيه ومعرفشى ايه
وناس بتاكل بقاياهم وناس تانيه بتاكل بالجزم فوق راسها

لو قالت الحقيقه من الشرطة ومن النظام الباغى ومصر خيرها كتير
لكن رايح للاسف للغيرمثل اسيادهم امريكا واسرائيل


عايزة اعرف بقى رايكم ايه فى الصورة

هل مصر مفيهاش خير ياكل
الاولاد دى ؟؟؟
ولا حلال لاسرائيل وشويه حراميه وحرام على المسلمين اهل البلد
والمسيحيين ايضا

[نعمه محمود]

معلش ياجماعه مش هلتزم بالترتيب فى الرد

هو انتوا يا جماعه بتحذفوا الاراء اللى مش على هواكوا شكرا كتير ليكم ولتحيا الثورة

معلش يا مستر M kamal هو فين رأيك اللى أتحذف
انا رجعته بنفسي حالا وهو اتحذف مش لأنه رأى مخالف لينا لا اطلاقا
هو اتحذف لأنهلا رأى
كلمة no comment عمرها ما كانت رأى

[Mr:M.Kamal]

هل حضرتك لم تفهمى شئ من كلمة no comment!!!!!!!!!!!

[شمس بياض]

الاستاذ جمال سراج اخى الفاضل اثلجت صدرى بردك البارع انت والمبدع القدير الباشمهندس هشام واسمحوا لى بالرد وتقبلوا ا الرد انا لا انتقد اشخاص بل افكار

[نعمه محمود]

لا حول ولا قوة الا بالله
واضح ان مفيش فايدة
طيب يامستر بدل الغلط طالما الموضوع مش عاجبك
ممكن متدخلوش
وكنت اتمنى اشوف لك رأى
ونتناقش
افضل من اللا رأى والغلط
شكرا

[شمس بياض]

منعلهش عقبال ما اكتب الرد نقرا سوا ابداع وراى اخر لاحد الشعراء ان اسف يا ريس ... انا آسف وبصراحة .. اصلى ماكنتش اصيل يا معلمنى الأباحة .. نفسى ارد الجميل يا مظبط اهل بلدك .. اكتر من اسرائيل هتقولى ايه اللى فيها .. هقولك فيها فيل ...فيه اكتر من حريقة .. وفى كل بيت شهيد فاكر اهل الدويقة .. فاكر قطر الصعيد طب سرطان الخضار .. والعيشه الغاليه نار والمعبر والجدار .. ولا الفكر الجديد اسف لجمال وعزمى .. ولصفوت ولسرور كل الى مصو دمى .. ولسه فى القصور اسف علشان سايبكو .. وحياة بلدى لاجيبكو وفى التحرير حابنيلكو .. احلى واجمل ...... تييييييت

[نعمه محمود]

ههههههههههههههه
والله طول مافى كده
وثقافة القطيع دى مسيطرة علينا
البلد دى ماهتتقدم
منورة يا اخت شمس

[نعمه محمود]

معلش ياجماعة واضح ان الموضوع أكبر من ادراك البعض
وشافوا منهم مايتناسب مع افقهم الضيق بس
فرجاء الموضوع مش خناقة اللى قادر يناقش باحترام اهلا وسهلا
واللى مش قادر بلاش يتعب نفسه
السيرفر مشغول ومش فاضى

[Mr:M.Kamal]

انا غلطت فى اية دا انا مكتبتش غير no comment فين الغلط اما انا كتبت الكلمة دى قولتى افق ضيق امال لو رديت هيبقى ردك اية شكرا على اسلوب الحوار الراقى

[نعمه محمود]

معلش يادعاء مش عارفه اعمل اقتباس
هرد عليكى من غيره ههههههه
لما قريت ردك قلت فى نفسي العلم نور برده
فعلا دكتورة ماشاء الله حللتى الموقف صح
تسلمى ياقمر وربنا يكملك بعلمك وعقلك
فعلا العقل نعمه

[نعمه محمود]

مستر جمال احترم وجهة نظرك جدا فجهاز الشرطة قد استشرى فيه الفساد
وتوحش وقلنا كثيرا أنه لايحمى الا النظام ولذلك حدث ما قد كان
اتمنى اعرف رأيك فى باقى الموضوع لان قضيتنا اليوم ليست الشرطة بل البلد

[نعمه محمود]

الذين يشاهدون الموضوع الآن: 14 (4 من الأعضاء و 10 زائر)

• نعمه محمود
• دعاء شديد+
• Mr:M.Kamal
• شمس بياض+

ياترى بقى ال 10 زوار اللى فى الموضوع ثورة ولا فلول هههههههههه