مالكش حجه بقى يا ميدو

[دعاء شديد]

ايه الحكايه بقى
اقولكوا
الموضوع علىامتحانات الثانوية العامه

الكل فرحان اوى ان الامتحانات سهله جدا
وطبعا كل ام واب يا عينى
دفعوا دم قلبهم فى الدروس ... فرحانين اوى
واول حاجه هيقولوها
"مالكش حجه بقى يا ميدو"

دروس ومقصرناش معاك
كل طلباتك مجابه
وادى كمان الامتحانات سهله جدا
يعنى ايه
عايزين مجموع كبير

انا بقى موضوعى تحديدا "بخصوص الامتحانات السهله"

دى كارثه لما الامتحان يجى سهل
ده معناه ان
مفيش تمييز بين واحد بيفهم وواحد بيحفظ
مفيش تمييز بين واحد طلع عينه مذاكره طول السنه وواحد استهتر وذاكر فى الاخر وبس

الامتحان سهل
دى جمله مؤذيه جدا لو وعينا لما بعدها
ده معناه ان المجاميع هترتفه جداااااااااااااااااااا
ونواجه مشكله ان الطالب يا عينى جايب 95%
ومش عارف يدخل الكليه الي هو عايزها
او يلحقها بالعافيه اقاليم

مهى دى نتيجه منطقيه حتميه لسهوله الامتحان

الامتحان سهل
معناه ان يعتمد على استرجاع المعلومات المحفوظه ... وليس الفهم
ودى كارثه حقيقيه
لانك ساويت الكل ببعضه وده ظلم

الاكتر من كده ... هتلاقى
فى الكليات الى بتعتمد على الفهم
طلبه حفيظه
وتكون النتيجه ... فشلهم
وتسمع بقى
الولد كان متفوق فى الثانويه العامه

سبحان الله
محدش فكر وقال
عايزين امتحان معتدل
مفيهوش تعجيز بس كمان مش سهل
امتحان يميز المتميز
امتحان ينجح الي قدرته حفظ وبس
امتحان يدى كل طالب حق الي يوديه مكانه المناسب

مش امتحان تكون نتيجته "اضطراب مجتمعي"
طبيعى
مهو كل واحد اصلا مكانش فى مكانه الصح

يا ترى المشكله عند مين !!!!!!!!!!!!!!!!!!!!!!!

اولياء الامور ... الي عايزين امتحان سهل
لانهم دفعوا دم قلبهم فلوس وتعب وصبر

ولا
الطالب ... الي مشتت بين قدراته وميوله
وبين ضغط اهله وبين امتحان ملخبط

ولا
واضعى الامتحانات
الي بيبصوا تحت رجلهم
الي مش متخصصين
الي معندهمش اسس لوضع الامتحان المعتدل

ولا
نظام التعليم
الي كل طرف فيه بيفكر بمعزل عن التانى
التعليم الاساسى فى اتجاه
والتعليم العالى فى اتجاه

موضوع محتاج مناااااااااااااااااقشة
يمكن نوصل لحلول ونتايج
نقف بيها على اول الطريق الصح

اسفه
كتبت الموضوع بالعاميه
علشان نحس واحنا بنقراه او بنرد
اننا اعدين مع اصحابنا او اهلنا
مش لازم نلبس الاسموكين وبدله وكده
الموضوع اصله من قلب قلب البيوت

بس

[ياسر الدقاق]

موضوع في منتهي الأهمية أستاذة دعاء
فعلاً الموضوع دا فكرت فيه كتيييييييييييير
ليه يكون الامتحان سهل للدرجادي طب كل الناس هتحل الامتحان صح ميه ميه بسبب الاستعدادات الهايلة للامتحانات من دروس ومذكرات وغيره
وهتكون النتيجة كارثة حقيقية
الكل حاصل علي مجموع مرتفع بس مش عارف يدخل كليه مناسبة
دا طبعاً كان نتيجة الثورة وإن محدش عايز يكون فيه توترات لكن هتكون نتيجته عكسية
حتي في امتحانات الدبلومات الفنية كانت الامتحانات سهلة جداً جداً جداً
وكتير من الطلاب ممكن يحصلوا مجاميع عالية جداً ويطالبوا بكليات
بصراحة أعتقد دا فكر مش صح
كان المفروض تكون الامتحانات فعلاً تميز بين المجتهد وغير المجتهد
ليحصل كل طالب علي ما يستحقه علي الأقل في الشهادات المؤثر
ومش مهم سنوات النقل
ربنا يستر

[موناليزا]

والله يادعاء مشكلة الثانويه العامه من زمان وانا حاسه

ان مفيش حد قادر يحلها ولا يفهما عامله زي اللغز

يااما الامتحانات سهله و المجاميع في العلاليلي والنتيجه يدخلوا كليات قمه

وتاني سنه تلاقيه حول كليه عاديه

يااما صعبه وبتفرز طبعا المستويات وتلاقي الاغلبيه مجاميع وسط وضعيف

لكن المرحله الوسط اللي تطلع 3 مستويات نووو مفيش

تعرفي انا اختي في 3 ثانوي السنه ده بتقولي الامتحانات غريبه تحسي في الظاهر انها سهله اوي

بس اول ماتطلع تكتشف ان في دهاليز في الامتحان وكل شويه علي ده الحال

لا والبعبع جاي يوم السبت ((((((( الفيزياء ))))))) بتحظي بقي هذه الماده عبر سنوات الثانويه العامه

بشهره عريضه جدا من انها العقده طب ليه متبقاش زي بقيت المواد استقبلها زيهم لا لازم تموت وتفطس قبلها وكمان بعدها ويوم النتيجه كمان

وبعد كده يقلك اصل لازم الامتحان يبين مستوي الطالب طيب ماتبينه بس في ماده واحده ماتخليها شامله

انت عارفه انا ممكن اقعد اكتب في الموضوع ده لغاية لما ارجع للثانويه العامه بتاعتي اصلها وحشه خدعتني الوحشه هههههههههه


دعاء تسلم ايديك علي موضوع الساعه وكل ساعه

وانا كتبت بالعامي والله يعينك بقي ههههه

[Nm100]

موضوع ليه اكتر من بعد
الوزارة جايبة امتحانات سهلة لانها تتبع نفس سياسة الحكومة اللي هيا
اطبطب وادلع
واولياء الامور نفسهم ان ابنهم يطلع دكتور او مهندس مش مهم بقى يفشل او ينجح في حياته العملية بعدين المهم انه دكتور

[حبيبه المصريه]

موضوع ليه اكتر من بعد
الوزارة جايبة امتحانات سهلة لانها تتبع نفس سياسة
اطبطب وادلع

ايوووووه برافو عليكى
هو ده اول الخيط
بمعنى يا دعاء
تيجى الامتحانات سهله
فالكل يطلع مبسطوط وحالل تمام
والاهالى تتبسط ماهو مفيش صعوبه ولا شكاوى
وابنهم بيقولهم كله تمام
تيجى بقى المجاميع ايه خرااااافيه
هما مش الاهالى عاوزين يفرحوا بالمجموع
نفرحهم بس كده

يجى بقى فى نهاية المرحله
والدخول للكليات
تلاقى مجموعه ده بيصارع بيه
عشان يدخل بيه حاجه تليق بتعبه ده
بس الكارثه ان فى ظل ارتفاع المجاميع الرهيب
مجموعه ده ميجيبش حاجه
وتلاقيه دخل كليه
مكنتش فى ترتيب اولوياته بتاتا

ويبقى حققنا اننا نكسب الاهالى
ونبسطهم بمجاميع اولادهم
كسبنا الرأى العام فى صفنا
لكن يدخل بقى ولا ميدخلش مش قضيتنا
نطلع جيل فاهم اكتر منه حافظ مش موضوعنا
المهم نرضى الرأى العام وخلاص من غير مشاكل

طبعا دى اوااامر جايلنا كلنا
الامتحانات تبقى سهله جداااااا
مش عاوزين تعقيدااااات
عاوزين السنه دى تعدى وخلاص من غير مشاكل
كفايه حال البلد اللى كل يوم فى تظاهرات

تعرفى بقى انا عن نفسى
مش بتبع السياسه دى فى وضع امتحاناتى
يعنى لازم اجيب كام نقطه فى كام سؤال كده
تحتاج بجد الطالب المتميز فعلا
اما باقى الامتحان
فيكون بمستوى الطالب المتوسط

حتى المستر بتاعى وهو بيعتمد الامتحان
قالى النقطتين دول هيقع فيهم كتير
قلتله ما انا قاصده ده فعلا
ان ميجيبش الخمسين الا المتميز بجد
اللى يستاهل ياخدها
لكن المتميز يلاقى المتوسط جايب خمسين زيه
بسبب ان الامتحان سهل جدااااااا
يبقى كده نحبط المتميز
وميبقاش فيه تحقيق للفروق الفرديه والقدرات
الامتحان سهل اه
الكل ينجح اه
لكن المتميزين هما بس
اللى يستاهلوا يجيبوا الدرجه النهائيه بس
وده صراحه منتهى العدل
انا مش هيفرحنى ان كتير جايبين خمسين
انا اللى يفرحنى
ان فعلا كام واحد يقدر يجيب الخمسين

موضوع جميل وحيوى وعصرى جدااااااا
يارب واضعى السياسات يفهمو بقى
ان مش لازم الامتحان كله يبقى تافه
عشان الكل يرضى
عاوزين متميزين بجد
ومش هيحصل حاجه لما تبقى
كام نقطه فى كام سؤال تخص الجانب ده
بس بصراحه
طول ما التعليم فى مصر عاوز ينتج ناجحين بس
مش متفوقين ومتميزين
يبقى هنفضل نعانى من المشكله الازليه دى

متميزه دايما يا دعاء بطرح موضوعاتك
دمتى لنا دوما بقلمك وفكرك الراقى

[شريف]

بصي يا دعاء

ليس بعد الكفر ذنب
التعليم بااااااااااااااااااااااااااااايظ
المنظومة كلها علي بعضها عايزة تترمي في اقرب زبالة

ماجيش انا لواحد منكر لوجود الله و ملحد
أقوله انت ما بتصليش ليه؟

عايز اقول بمعني اوضح

التعليم في مصر بتنجان يا دعاء
مناهج غبية تجيب تخلف عقلي
قديمة جدا
و اسلوب التلقين المقدس
و عبادة الورق و الاختام

ماتقوليليش ايه علاقة كلامي بالثانوية و المجاميع

هرجع اقولك ليس بعد الكفر ذنب
انا عملت موضوع
جبت فيه م الاخر

مصر مش هتتقدم طول ما فيها وزرا و مسئولين ((( موظفين )))
مش ((( مفكرين ))) و ((( مبدعين )))

مافيش مسئول في مصر بيحلم لمصر يا دعاء ... تخيلي ؟؟
مافيش وزير عنده حلم
مافيش وزير عنده رؤية
مافيش وزير عنده خطة جهنمية يغير بيها اوضاع متخلفة
مافيش وزير عنده فكرة مطرقعة

كلهم شبه بعض
مسخ
كلهم نسخة واحدة
مش شايف حد بيفكر
و لا حد بيشغل مخه

كله باصص تحت رجله

لما يطلع عشرة احمد زويل يفكروا لمصر يا دعاء بوطنية
و اخلاص و حب
ساعتها نبقا نناقش موضوع الثانوية و غيره

الثانوية و غيرها نتاج طبيعي لمقدمات ... نهايتها بله مغولي
و تخلف عقلي يسود كل العقول المصرية

اسف علي كم الواقعية و القسوة اللي في كلامي
بس دي الحقيقة

و لو مش عارفين كده يبقا بنضحك علي نفسنا

[جمال سراج]

موضوع حلو يا دعاء
بس هنقول إيه ولمين!!!!!!!!!!!!!!
الأول حابب أقول إن حلم كل أب وكل أم يشوفوا ولادهم أحسن ناس فى الدنيا دا حلم مشروع بيأجروا عليه ثوابا من الله
بس حابب بردوا أتكلم فى كذا نقطة
1- طول ما الثانوية العامة عندنا عنق زجاجة للدخول لكليات بعينها فعمرنا ما هنتعدل وهتمشى كدا بركاوى
وهتلاقى ممكن طبيب فاشل او مهندس بليد وهكذا لانه كله داخل بمجموعه مش برغبته عشان يشتغل شغلة ممكن توفرله حياة بالوظيفة او باى مشروع لو عمله
2- مهم جدا نعرف ان العقول هى هى مش بتتغير - ربنا خلقنا كلنا عندنا فروق فردية وبرايى لو كان الامتحان صادق وبيقيس فعلا القدرات هتلاقى النسب والدرجات معقوله ومتفقة مع الفروق اللى ربنا خلقهالنا ولكن الناس مش حابة تعرف كدا ليه او عارفة وبستهبل ولا ايه
ممكن قوى تلاقى الطالب بياخد درس واتنين وثلاثة ودا تربويا مش صح لاختلاف الطريقة و فى الاخر بيجيب 70 او 80 فى المية مثلا بعد كل دا لان امكاناته كدا والله لو مخدش دروس خالص واستعان بالله وذاكر هيجيب كدا بردو

3- نظرة التعالى الغلط اللى بيبص بها الوزير للمعلم وكذلك مسؤلى وزارته والطريقة اللى بيعاملوا بيها المعلم بتكون سبب فى فشل عملية التعليم
بمعنى ان المعلم دايما مدان
لدرجة ان الولاد اتعودت على طريقة واحدة فى الامتحان وهو الحفظ ثم استرجاع المعلومة وقتيا فى الامتحان وبعدها انسى يا عمرو - ولو جه امتحان مطابق للمواصفات صح او فيه حاجة من سنة ماضية يتخرب بيت اللى عمله مما دفع كتير من واضعى الامتحانات انهم يكبروا دماغهم ويمشوا العمليه آلية زى التفريخ كدا

تدنى الحالة الاجتماعية للمعلم - مرتب زهيد - وضع اجتماعى متردى من وسائل الاعلام وبتصوره كانه نكته الناس بتضحك عليها - وتصويره بانه جزار لو كان بيدى دروس رغم انه مش بيغصب حد ولكن سياسة التعليم هى اللى بتفرض كدا فى حين ان الدكتور بيفتح عيادة وبياخد اللى عاوزه وهو دا الجزار فعلا لانه يتاجر بالصحة ومحدش بيروحله الا المريض اللى مش قادر
ورغم ان المهندس ممكن يشتغل بمرتب كبير اويفتح مكتب او يشتغل عمل اضافى - ورغم انه فيه ناس ليسانس حقوق بيشتغل شغلانة مرموقة اجتماعيا وبحصانات رهيبة وواحد ببكالوريوس تجارة بيشتغل فى جمرك او شركة بترول او فى الضرايب او ... وهكذا
بس نيجى على المعلمين اللى 95 فى المية منهم بيدى درس ب 10 جنيه فى الشهر او ب20 فى الاقاليم ونصورهم كانهم مافيا
صحيح فيه ناس مدرسين فى المدن مفترية وجزارين وكل حاجة بس النبة دى لا تتعدى 5 فى المية وربما اقل
وكل دا يتصلح لو كان هناك عدالة مرتب مناسب + مكانة اجتماعية للجميع متساوية
يعنى متسمحش للدكتور يفتح عيادة وتقول للمدرس متديش درس مثلا او المهندس يشتغل الصبح فى مجلس المدينة وبعد الظهر يفتح مكتب
لا خلى الناس كلها زى بعضها يتصلح حال الدنيا

المهم الكلام دا اتقال كتير اكيد وهيتقال كمان كتير بعد كدا
لكن الظاهر انها الدنيا وحالها عمره ما هيصلح
شكرا دعاء على موضوعك اللى فى وقته
تحياتى واحترامى لكى وللجميع

[دعاء شديد]

موضوع في منتهي الأهمية أستاذة دعاء
فعلاً الموضوع دا فكرت فيه كتيييييييييييير
ليه يكون الامتحان سهل للدرجادي طب كل الناس هتحل الامتحان صح ميه ميه بسبب الاستعدادات الهايلة للامتحانات من دروس ومذكرات وغيره
وهتكون النتيجة كارثة حقيقية
الكل حاصل علي مجموع مرتفع بس مش عارف يدخل كليه مناسبة
دا طبعاً كان نتيجة الثورة وإن محدش عايز يكون فيه توترات لكن هتكون نتيجته عكسية
حتي في امتحانات الدبلومات الفنية كانت الامتحانات سهلة جداً جداً جداً
وكتير من الطلاب ممكن يحصلوا مجاميع عالية جداً ويطالبوا بكليات
بصراحة أعتقد دا فكر مش صح
كان المفروض تكون الامتحانات فعلاً تميز بين المجتهد وغير المجتهد
ليحصل كل طالب علي ما يستحقه علي الأقل في الشهادات المؤثر
ومش مهم سنوات النقل
ربنا يستر

للاسف يا استاذ ياسر
كل واحد عايز يريح دماغه
والاسوء من كل سنه السنه دى
طبعا ده من اهم انجازات الثورة ان الامتحانات تيجى تافهه
مش بس سهله ... علشان محدش يبلطج ولا حد يعمل مظاهرات
والناس تقول والله ده شيء جميل ما المتحانات اهى ممكن تيجى سهله

الغريب بقى
حد بيقولى لااااااااااا سهله ايه ده الانجليزى اشتكوا منه
قلتلهم الانجليزى مهما جه سهل
المشكله فى ترجمه معنى السؤال للي مش عارف انجليزى اصلا
وبالتالى عمر مشكله الانجليزى مهتتحل وهبيفضل مصدر ازعاج للسلطات
الا لو كان فى مترجم فى كل لجنه للتسهيل على الولاد

رحمتك يا رب
سعيده جدا انت حضرتك شاركت فى موضوعى
واتمنى قريبا الاقى موضوع لحضرتك فى العام
نورت يا مستر

[نعمه محمود]

يا ترى المشكله عند مين !!!!!!!!!!!!!!!!!!!!!!!

اولياء الامور ... الي عايزين امتحان سهل
لانهم دفعوا دم قلبهم فلوس وتعب وصبر

ولا
الطالب ... الي مشتت بين قدراته وميوله
وبين ضغط اهله وبين امتحان ملخبط

ولا
واضعى الامتحانات
الي بيبصوا تحت رجلهم
الي مش متخصصين
الي معندهمش اسس لوضع الامتحان المعتدل

ولا
نظام التعليم
الي كل طرف فيه بيفكر بمعزل عن التانى
التعليم الاساسى فى اتجاه
والتعليم العالى فى اتجاه

موضوع محتاج مناااااااااااااااااقشة
يمكن نوصل لحلول ونتايج
نقف بيها على اول الطريق الصح

المشكلة عند كل دول
مش عند طرف واحد
الأول ولى الأمر اللى عاوز ابنه يتفوق بأى وسيلة وأهم حاجة إنه يدخل كلية قمة ومش مهم
هيكون ناجح عمليا ولا فاشل ومش مهم كمان ايه قدراته
لا لازم ابنى يبقي دكتور او مهندس
اشمعنى ابن فلان وابن فلان
طيب الأسوأ من كده
ولى الأمر اللى بيشجع ابنه على الغش
اه والله ويقوله ربنا يعمى المراقب عنك يابنى

تانى حااجة الطالب يريد كبسولة بها الخلاصه
مش عاوز يوجع دماغه ومش فاضى
عاوز ملزمة فيها البهاريز
وعشان تكتمل الحلقة
بنظام تعليمى فاشل يكرس للحفظ دون الفهم
نظام يدعو للغباء المحكم
وبذلك تكتمل منظومة الفشل
رافعه شعار
ذاكر تنجح غش تجيب مجموع

[دعاء شديد]

والله يادعاء مشكلة الثانويه العامه من زمان وانا حاسه
ان مفيش حد قادر يحلها ولا يفهما عامله زي اللغز
يااما الامتحانات سهله و المجاميع في العلاليلي والنتيجه يدخلوا كليات قمه
وتاني سنه تلاقيه حول كليه عاديه
يااما صعبه وبتفرز طبعا المستويات وتلاقي الاغلبيه مجاميع وسط وضعيف
لكن المرحله الوسط اللي تطلع 3 مستويات نووو مفيش
تعرفي انا اختي في 3 ثانوي السنه ده بتقولي الامتحانات غريبه تحسي في الظاهر انها سهله اوي
بس اول ماتطلع تكتشف ان في دهاليز في الامتحان وكل شويه علي ده الحال
لا والبعبع جاي يوم السبت ((((((( الفيزياء ))))))) بتحظي بقي هذه الماده عبر سنوات الثانويه العامه
بشهره عريضه جدا من انها العقده طب ليه متبقاش زي بقيت المواد استقبلها زيهم لا لازم تموت وتفطس قبلها وكمان بعدها ويوم النتيجه كمان
وبعد كده يقلك اصل لازم الامتحان يبين مستوي الطالب طيب ماتبينه بس في ماده واحده ماتخليها شامله
انت عارفه انا ممكن اقعد اكتب في الموضوع ده لغاية لما ارجع للثانويه العامه بتاعتي اصلها وحشه خدعتني الوحشه هههههههههه
دعاء تسلم ايديك علي موضوع الساعه وكل ساعه
وانا كتبت بالعامي والله يعينك بقي ههههه

فعلا يا موناليزا
فى امتحانات بقت ماركه مسجله خطر
يعنى مسبقا الكل عارف انها هتيجى صعبه
ومحدش يحاول ههههههههههههه

وانتى لفتى نظرنا لبعد تانى للامتحان السهل
ان ممكن يكون ده الظاهر بس
انما هو فى صعوبه
وطبعا دى مبيعفهاش غير الطالب الفاهم

ربنا ينجح اختك وبتفوق
ونورتينى

[دعاء شديد]

موضوع ليه اكتر من بعد
الوزارة جايبة امتحانات سهلة لانها تتبع نفس سياسة الحكومة اللي هيا
اطبطب وادلع
واولياء الامور نفسهم ان ابنهم يطلع دكتور او مهندس مش مهم بقى يفشل او ينجح في حياته العملية بعدين المهم انه دكتور

عجبنى اوى وزارة اطبطب وادلع دى
فعلا هم عاملين كده
واولياء الامور المهم عندهم او من وجهة نظرهم
ان طب او هندسه هو ده النجاح وانهم كده ادوا رسالتهم صح
وللاسف هم والولاد بيتحملوا النتيجه

تعرفى انا كنت براقب مره فى ثانويه عامه ومنازل
وولد اعد ساكت بس شكله ابن ناس ... فبكلمه واقوله حاول تحل اى حاجه
واذا بالولد بيعيط ويقولى
اصل انا مبحبش المواد العلميه وبابا وماما مصممين اكمل علمى
صعب عليا جدا ... هل هم مش حاسين بانهم وهم بيسقط كذا مره
مش عارفه بس فعلا شيء بشع التفكير ده

نورتى ولو انك بقيتى عامله زى هلال رمضان
مره واحده فى السنه

[زهره المدائن]

ههههههههههههههه هو ميدو بس اللي ملوش حجة
ده ميدو وتوتو وكيمو وميزو
وكل الشباب الحلوة يا دودو
بس ربنا يكرمهم للنهاية يااختي
ونشوف بعد التناقض الشديد ده هنوصل لفين وازاي
امتحانات سهلة ...الشعب يفرح
نروح الجامعه .....وممكن ننجح
ونتخرج نشتغل وظائف منفصلة تماما عن الدراسة
و هي دنيا ماشية
الشاطر بقي اللي يفهمها ويقدر يعيشها زي ما هو عايز
مش زي ما هي عايزة