ميرندا برسيم ـــــــــ طلع الحمار اللى جواك

[شريف]

مش كل ما واحد يقول كلمة تفتكرها علي نفسك !!

كنت دايما بحب أخلى الـ main idea (( الفكرة الاساسية )) بتاعة كل موضوع بكتبه ... آخر جملة أو فى آخر فقرة فى الموضوع ... انما المرة دي كتبتها فى أول الموضوع ...
من باب التغيير ... اختصارا للوقت .
ــــــــــــــــــــــ
المهم ... النهاردة حصل معايا موقف لذيذ ... كنت بتكلم أدام ناس عن واحد كلهم عايزين يشتكوه و بقولهم يا جماعة طب بلاش تعملوا فيه شكوي و تعالوا نتكلم معاه بالعقل واحدة واحدة ... مين اللي كان بيمر و سامعني ؟؟؟ واحد تاني علي راسه بطحة و افتكرني بتكلم عليه ... !! عنها و قامت الدنيا و مقعدتش ... قعد يهدد و يتوعد ... و لو اشتكتوني هلبسكوا قضية و لو كذا هعمل كذا ... و الناس تقنع فيه انهم مكانوش بيتكلموا عليه !! مافيش فايدة ... يهديك يرضيك !! برضه مصمم ...
لدرجة قولتلهم ... خلاص يا جماعة ... تعالوا نشتكيه هوا ... ههههههههه ده اكيد وراه مصيبة ... ده علي راسه بطحة م النوع التقيل ...

السؤال بقا

ليه يا عم الحج ؟
ليه يا حبيبي كده ؟
ليه يا بابا ؟
ليه حاسس دايما بنظرية المؤامرة و ان الناس كلها ضدك او بتتكلم عليك او تقصدك ؟ ليه دايما اي كلام يتكتب باسلوب غامض شوية او مش فاهمو تفتكر انه عليك ؟؟؟؟؟؟
طب ما تحسن الظن بالناس !! افترض حتي فيهم حسن نية بنسبة 5% انما علي طول الناس دي وحشة و مستقصداك و متتبعاك ؟
ريح دماغك ... و خد بنصيحتي و اعمل عبيط ... ترتاح
أو ... شيل البطحة اللي علي راسك و امشي عدل
يحتار عدوك فيك
الموضوع فكرني بنكتة لذيذة
عن واحد من اللي علي راسهم بطحة دايما بيحكي بيقول

كنت في مطعم و دخلت الحمام
لقيت واحد في الحمام اللي جنبي
بيقولى ازيك و سكت
و بعدين لقيته بيقول يابني سامعني
بقولك ازيك
............قلتله الحمد لله
قالي ايه الاخبار
قلتله كويس
قالي انت بتعمل ايه
قلتله هكون في الحمام بعمل ايه يعني
قالي لوحدك ؟
ضحكت و قلتله اه لوحدي
قالي طب انا جاي
قلتله تيجي فين ياعم انت عبيط؟
لقيته بيقول
طب اقفل يا احمد دلوقتي
عشان في الحمام اللي جنبي
واحد حمار فاكرني بكلمه

[دعاء شديد]

مهو الي يعمل عبيط ده
حاجة من كتير
يا ضعيف مش بيقدر يواجه
با راسه عليها بطحه ومعندوش اى دفاع حتى ولو بالكدب
يا مش فارق معاه الي بيتكلمواااااااااا

اما الي هيقرر يشيل البطحه الي على راسه
هو كمان حاجه من كتير
انه انسان قوى قادر على المواجهه ... بجح يعنى
او انسان عارف غلطه بس ضعيف واجبر عليه وبيجاهر بذلك
من منطلق ((( اربط الحمار مطرح ميقول صاحبه )))
او انه كان على راسه بطحه لكنه بدأ يدارويها ويصحح مساره

اما الاخ الي انت بتتكلم عنه ده مش من النوعين
ده نوع تالت واخد الهجوم وسيله للدفاع عن نفسه
او يهجم عشان الناس تخاف تقرب منه
وغالبا بيبقى ((( كلمنجى وبس )))
يعنى تلاقيه يجعجع ويعلى صوته وفى الاخر
ولا حاجة ولا يقدر يعمل اى حاجة

ههههههههههههههههه
موضوع حيوى جدا
والساحه دلوةقتى مليانه بالناس المبطوحه
وطول ما الواحد ماشى فى الشغل بيقابلهم

رصد رائع لحال الواقع
شكرا ليك ولدماغك ولكيبوردك
بس

[نعمه محمود]

هههههههههههههه فعلا ياشريف فى ناس عايشة على طول بمنهج نظرية المؤامرة
لوعملت حاجة تبقي تقصد تضايقهم حتى لو مجرد حاجة بسيطة انت مش قاصدها
بس دايما الناس دول بيبقوا متخيلين إن هما محور الكون وأى كلام لازم يبقي حواليهم
نصيحتى ليك اعمل زى أنا ما عملت
طنشهم

[عزة المصرى78]

معك حق فأصبح الظن السىء سمة هذه الفترة
ربما لأن الرؤوس كلها مجروحة وتتألم فلا أحد يخلو من الجراح فالكل يظن أن كل ضغط يكون على جرحه
والنفوس أصبحت ضعيفة ومفككة لا تشعر بالأمان تغلب عليها الوساوس وتظن كل كلمة عليها
وانعدمت الثقة والمودة والمحبة فى كثير من النفوس

عافى الله صاحب كل جرح وأصلح القلوب والنوايا وطهر النفوس

أدام الله ابداعاتك فى اختيار الموضوعات وسياقتها وعرضها الجميل وحسن التعبير والطرح

[سميرة محمد بركات]

كلمك صح لازم نعدى حجات كتير علشان نعرف نعيش

[سميرة محمد بركات]

http://www.vip70.com/smiles/data/dd6.gif