يا مساء الفل عليكم جميعا
النشاط الحالي : يكتب رد علي موضوع ...........
طبعا كلنا بنشوف الجملة دي في الملف الشخصي للعضو
أنهي عضو ؟؟؟
العضو اللي دايما بندور عليه كل يوم
بندور علي مشاركاته
بيوحشنا
بنتنشأ علي رد منه أو كلمة منه
أو حتي يدخل يطمنا علي حاله
بصراحة اللي خلاني اكتب الموضوع ده
اني حسيت ان مسيو وليد عسكر واحشني جدا
أكيد حضرتك زيي
بيوحشك عضو معين أيا كان اسمه
بتحب تشوفه في المنتدي كل يوم
بتدور عليه
بتدخل الملف الشخصي ليه في اليوم بتاع خمستاشر تمنتاشر مرة
أجمل خاصية أو صلاحية ممكن تحصل عليها حضرتك في المنتدي
هيا صلاحية انك تدخل الملف الشخصي بتاع اي عضو انت بتحبه
و تعرف هوا فين بالظبط
حالته ايه النهاردة
داخل علي انهي موضوع؟
بيفكر في ايه
حابب يقرا في ايه النهاردة؟
طب بيعمل ايه دلوقتي؟
طب اخش معاه الموضوع الفولاني اشوف ردوده
ولا استناه لما يرد عليا في الموضوع الفولاني
جو تاني خالص
بيفرضه علينا شئ اسمه
الحب في الله
الحب الخالي من الكولسترول
قصدي الخالي من المصالح الشخصية
موضوعي ده من شقين
الشق الأول :
لو عايز تجاوب علي السؤال ده يبقا خير و بركة
لو مش عايز مش هتطفل علي حضرتك ....
بس برضه نحب نسمع رأيك
السؤال بيقول
هل فعلا بتدخل كتير علي الملف الشخصي
لعضو معين من شدة حبك ليه و اهتمامك باهتماماته !!!؟؟؟
مين الشخص ده؟؟؟؟ ((( لو حابب تقول يعني )))
و سرك في بير يا ريس
الشق التاني
انت حالتك ايه النهاردة؟؟؟؟؟
كتير مننا بيبقا داخل مخصوص عشان يشوف العضو الفولاني
و يتطمن عليه
و يعرف ايه احواله لو غاب عننا
ليه ما نعملش موضوع
كل واحد فينا يدخل كل يوم يكتب حالته؟؟؟؟؟
معلش حضرتك ممكن تحس ان الموضوع تافه شويه
بس انا بقولك لا والله
مش تافه ولا حاجة
ده غاية في الاهمية
كفاية انك تدخل موضوع معين في المنتدي تطمن علي كل الناس فيه
ايه رأيكوا نخلي موضوعي ده متجدد
و كل واحد يخش كل يوم أو كل ييومين او حتي كل اسبوع
يطمن الناس في المنتدي علي حالته و احواله؟
ولو بكلمة واحدة
هتقولي ازاي يعني بكلمة واحدة؟
اقولك يا سيدي
اختار كلمة واحدة من الكلمات اللي جاية
كل يوم عشان توصف بيها حالتك
واحنا بنفهم والله
حالتك ايه؟
مبسوط
مزأطط
فرحان جدا
طاير م الفرحة
زعلان
متضايق جدا
هطق
حاسس بالملل
مخنوق
لسه كنت بعيط حالا
عادي
مزاجي عالي
كويس والله الحمد لله
مشاغل الدنيا يا ابو شريف
عيان
لا مبالاة
أهي حياة يا با
مرهق
شغل و مشغول
عايز انام
متنيل بنيلة
حالة ابداع
بيات صيفي
وحشتوني
وغلاوتك لاجي
قرفان
روتين روتين اخر حاجة
قشطة يا معلم
احنا ليلتنا فل ولا حاجة؟
مصدوم
مسبهل
مندهش
موجوع
في الساقية يا ريس
عايش حالة طرقعة
انا في اسكندرية النهاردة !!!
روشنة
رايح زيارة عائلية
عندي عزا ((( بعد الشر يعني )))
حالة غريبة
دنيا تانية يا عالم
لسه جاي م الشغل
عصبي
متنرفز
مكتئب
فخور
مستفز بشكل غبي
حاجة تفقع
انا جعان يا ناس
عندي انتفاخ
و النبي منا عارف
محبط جدا
انفلونزا ((( بس بتعالج )))
كده يعني
طمنونا عليكوا يا جماعة
بتوحشونا والله
خلينا ندخل كل فترة الموضوع ده
نقول حالتنا ايه النهاردة
و كل يوم
و لو عايز تقول حالتك ...و تشرح انت في الحالة دي ليه
....يبقا كتر خيرك وربنا يجبر بخاطرك
ليلتكوا زي العسل ان شاء الله
المفضلات