يوميات أم من البلد دى .............!!!!!!!

[نعمه محمود]

النهاردة يوم صعب فى كل تفاصيله
طول النهار بسف تراب فى الشارع
ياساتر أيه الجو البشع ده
هروح اخمد ثورة الجياع وارتاح شوية وارجع لكم احكى

[نعمه محمود]

النهاردة بقي السبت أجازة عندى لكن الولاد بيروحوا المدرسة أجازتهم يوم الحد صحيت الساعه 6ونصف والولاد نزلو المدرسة وانا قعدت ساعتين كده على الكمبيوتر وبعدين نزلت لأبدأ رحلة شقاء جديد فى شوارع القاهرة العامرة لإنهاء مشاوير صعب تتعمل في يوم عمل
بدأت بمدرسة حبيبة رحت عشان أدفع فلوس حاجات فى مدرسة حبيبة الطريف بقي اننا بنحايل عليهم ياخدوا الفلوس لاننا مش فاضين نيجى أيام تانية وعجبي المهم لم أتمكن من دفع كل الطلبات لانى لازم أروح بسرعه مدرسة عمر اتفقت مع السكرتيرة انى هرجع لها الساعه 2 عشان ادفع باقي الفلوس
جريت على مدرسة عمر أفندى عشان أقابل مدرسة الانجلش عشان
لاء لازم أحكى لكم حكاية مدرسة الانجلش الأول
يوم الخميس وانا باخد عمر قالى مامم أنا جبت فى امتحان الانجلش 23 من25 قلت كويس وجميل لانه بيدرس حوالى 5 مناهج انجلش المهم قابلت المدرسة قالت لى لاء عمر جايب 18 بس المهم أنبت عمر وعاقبته والولد منهار والله انا جايب 23 المهم قلت لازم أشوف ورقة الامتحان لانى عارفه ان المدرسة دى مضايقة من الولد عشان مبياخدش درس
معلش طولت عليكم يلا قولوا طولى
المهم جبت ورقة الامتحان واذ بي أفاجأ ان كلام عمر هو اللى صحيح والولد فعلا جايب 23 وعينكم بقي ماتشوف الا النور على اللى عملته فى المدرسة والمديرة وأنا أصلا بروح للمدرسة دى اشراف فانتقمت منهم شريرة أصلي ههههههههههههه
استنوا كل ده لسه ماخلصتش يووووووووومى الطووووووووووويل
نزلت من مدرسة عمر رحت اشتريت لهم هدوم شتوى للشتا اللى هجم فجأة ده اشتريت لهم حاجاتهم ورجعت تانى على مدرسة حبيبة عشان أدفع باقى الفلوس اللى حكيت لكم عليها فوق
المهم نجحت أخيرا ودفعت الفلوس وخلاص بقي هروح أهو المفروض إنى خلصت
لالالالالاء إزاى ودى تيجى مايصحش تليفون من أخويا عاوزنى اشترى له بوكيه ورد وشيكولا كويسين عشان رايح يزور واحد صاحبه
طيب وأنا مالى هو صاحبي ولا صاحبك
عيلة غريبة بجد
المهم رحت اشوف الورد احترت قلت له تعالى اختار قالى نص ساعه واكون معاكى طبعا النص ساعه بقت ساعه وانا مزروعة فى العربية باكل تراب من الجو واخيرا الاستاذ وصل وماعجبوش الورد
يلا أحسن
الله يكون فى عونكم
أنا تعبت
بصراحه أنا لو منكم مش هقرا اليوميات الكئيبة دى