فى التاكسى الابيض ابو عداد
الأول : يا بنى و الله مصر فعلا أم الدنيا ... حضارة 17 الف سنة ... ده الجديد ....
باحث امريكي تقريبا قدر الرقم ده و انتهى الحوار بقا بتاع 7000 سنة لان مصر
حضارتها اكتر من كده بكتير
الثانى : بس منهوبة يا خالد
الاول : معاك .. هيا منهوبة اه ... بس الصورة مش وحشة اوى زى مانت متخيلها كده
الثانى : لا وحشة ... بدليل انك اعترفت انها منهوبة
الاول : ماهى برغم انها منهوبة 7000 سنة ... قصدى 17 الف سنة ... بس لسه فيها خير
و ده اكبر دليل ان مصر بخير
الثانى : مصر لو بخير مكانتش الناس جاعت
الاول : لا .. لا .... ماتصدقش ... محدش بينام من غير عشا
الثانى : ههههههه ... لا فى كتير و الله ... و فى كمان ناس مش عارفة تعمل ايه بالفلوس
الاول : شوفت ياض امبارح الجو و التراب كان عامل ازاي ؟
الثانى : شوفت يا اخويا ... اصلها حكومة بنت ........
الاول : ههههههه طب و الحكومة مالها يلا ؟
الثانى : هيا السبب فى كل البلاوي اللي احنا فيها
الاول : اهو ده عيبنا ... كل مصيبة نعلقها على شماعة الحكومة
و حياة ربنا العيب فينا احنا ... هيا الحكومة دي ايه؟ ما هي ناس زيي و زيك و من الشعب
الثاني : شعب ؟ شعب مين يا ابو شعب ... دول هاى لايف ... سكان القصور
الاول : ايه يعنى يا اخى مش بيتعبوا ؟
الثاني : بيتعبوا ... مايتعبش عليك غالى
الاول : بلاش النظرة السودة دي
الثانى : و النبى يا اخويا ما في اسود من الايام اللي جاية
احنا بقالنا بتاع خمسة و تلاتين سنة عايشين في سلام بدون حروب
و شوف اقتصادنا عامل ازاي ... متدمر يا ريس ... اومال لو فى حرب و لا اتنين
كان حالنا هيبقي ايه ؟
الاول : عندك حق ... بس بلاش تكأبنى و النبى و سيبنى متفائل و لو لحد ما ننزل م التاكسى
الثانى : طب شوف العداد عامل كام يا خويا في المتين متر اللي ركبناهم
الاول : يا نهار اسود ... ايه يا باشمهندس ... انت عامل ايه في العداد ؟
عشرة جنيه علي الحتة دي؟
السواق و هوا بيضحك : ايه يا عم المتفائل ... هوا انا جايب حاجة من عندي ؟ حد قالك تركب التاكسى الابيض ابو عداد ؟
الاول اللي كان متفائل : عشرة جنيه ؟ علي النعمة دي حكومة بنت .........
الثاني : ههههههه طب و الحكومة مالها بقا يا عم الوطنى ؟
ده حوار يا جماعة بين اتنين بالكتير اوي في ثانوية عامة من يومين
رايحين مدرستهم الصبح
و انا كنت راكب قدام جنب السواق و سامعهم
الشباب الصغيرين فاهمين اوي وواعيين
و الشعب المصرى كله ساكت اه و متنح .... بس عارف و موجوع
 |
رد مع اقتباس
شكراً لهذا
أعجبني هذا
المفضلات