يا أبو وش شراب مقلوب !

[شريف]

ياللى انت ضارب بوووووز
على طول وواد منحوس
افرد فى خلقة أهلك
مش طالبة منك بوووز

...............

مش ناقصة تمد فى وشك
و كفاية مدة كرشك
وشك جابلنا احباط
هديك بونية تفشك !


...............

يا ابو وش شراب مقلوب
و الهم عليك مكتوب
تفضل تجاهد تكسب
و برضه تنام مغلوب !

...............

رخم ... غلس و كئيب
وبقك شكله غريب
اعمل فيك ايه عشان تضحك ؟
اجيبلك شاى بحليب ؟

...............

الهم فيك محفور
جفنك معووج مكسور
بقك مضموم ممدود
جواه شراب محشور

...............

يا أخى دى الدنيا جميلة
و نسمة هواها عليلة
افردها شوية يا عم
معووج على ايه ... بلا نيلة

...............

اتنيل قوم اتفسح
اركب مراجيح و اتمرجح
ليه ايد اهلك على خدك ؟
ليه فى ركن الاوضه متلقح ؟

...............

افتح بقك مفتوح
شيل اى نكد و جروح
غنى و زأطط و اتنطط
لو جاتلك حفلة ... روح

...............

نعمة ربنا حواليك
و الكون كله فى ايديك
شوف بس الحاجة الحلوة
قوم اغسل وشك و عنيك



بقلمي

قصدى بكيبوردى

[نعمه محمود]

ههههههههههههههههههههههههههه .مش. ممكن .تسلم. ايدك .قصدى. كيبوردك .ياشريف .بجد .ضحكتنى. والمشكلة .بقي .ان. كل. مقطع .فكرنى .بحد. أعرفه
معلش
النقط. دى .من. الكيبورد. اللي. يسامحها. دعاء .بقي. جايبالى .كيبورد. ومش .عاوزةتبعتهالى

[خالد سعد]

تصدق بالله
انا زعلت منك بجد


لازم تحرجنى على الهواء كدا
كنت استر على ربنا يكرمك
ما كله بالمقلوب

بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت .. قارب نجاة

قالوا مفيش
غير بس هو الحب قارب نجاه
عجبي !!!

***
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين .. يا جدع
قال من بعيد و لسه رايح بعيد

عجبي !!!

مرات أفوق و يحل عني غبايا

و أفتكر إني فهمت كل الخبايا

و افتح شفايفي عشان أقول الدرر

ما قولش غير حبة غزل في الصبايا

و عجبي.
..
يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!


أنا قلبي كان شخشيخة أصبح جرس

جلجلت بيه صحيوا الخدم والحرس

انا المهرج , خفتوا ليه, قمتوا ليه

لا في ايدي سيف ولا تحت مني فرس

وعجبي



ولدي نصحتك لما صوتي اتنبح
..
ما تخافش من جني ولا من شبح ..

وان هب فيك عفريت قتيل اساله ..

ما دافعش ليه عن نفسه يوم ما اندبح ..

وعجبي



يأسك وصبرك بين ايديك وانت حر

تيأس ما تيأس الحياة راح تمر

أنا دقت من دة ومن دة وعجبي لقيت

الصبر مر وبرضه اليأس مر

عجبي



علي بــعد ملـــيون مــيل من أرضنا

من الفــراغ الــكوني بصــيت أنـا

لا شفت فرق ما بين جبال و بحور

ولا شفت فرق ما بين عذاب أو هنا

عجبي




أنا كل يوم أسمع .. فلان عذبوه

أسرح ف بغداد والجزاير واتوه

ما أعجبش م اللي يطيق بجسمه العذاب

وأعجب من اللي يطيق يعذب أخوه

عجبي!!


أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!


انا كل يوم أسمع ........ فلان عذبوه

أسرح في بغداد و الجزاير واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!



يا طير يا عالي في الســــــما طظ فيك

ما تفتكرشي ربنا مصطــــــــــــــــفيك

برضـــــــــــك بتاكل دود و للطين تعًًًًودً

تمـــــــــص فيه يا حلو .. و يمص فيك

عجبي !!!


يا عندليب ماتخافش من غنوتك

قول شكوتك و احكي عن بلوتك

الغنوة مش هتموتك إنما

كتم الغنا هو اللي هيموتك

!عجبي

**************************************
يا للي بتبحث عن إله تعبده
بحث الغريق عن أي شيء ينجده
الله جميل و عليم و رحمن رحيم
إحمل صفاته ... و انت راح توجده
!عجبي

*****************************************

غمض عينيك و امشي بخفة و دلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك ... تقع
!عجبي

**********************************

أوصيك يا ابني بالقمر و بالزهور
أوصيك بليل القاهرة المسحور
و إن جيت في بالك ... اشتري عقد فل
لأي سمرا ... و قبري إوعك تزور
!عجبي

********************************

لو فيه سلام في الأرض و طمان و أمان
لو كان مفيش و لا فقر و لا خوف و جبن
لو يملك الإنسان مصير كل شيء
أنا كنت أجيب للدنيا ميت ألف ابن
!عجبي

**********************************

جالك أوان و عرفت مشي الجنايز
كيف شفتها يا عبد رب اللذايذ
قال: شفت شيل بالحيل فقير أو أمير
كما شالوا في الحمامير فواضي القزايز
!عجبي

*************************************

يا للي انت بيتك قش مفروش بريش
تقوى عليه الريح. يصبح مفيش
عجبي عليك حواليك مخالب كبار
و ما لكش غير منقار و قادر تعيش
!عجبي

**********************************


يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
!عجبي

***********************************



أنا قلبي كان شخشيخة أصبح جرس
جلجلت بيه صحيوا الخدم و الحرس
أنا المهرج ... قمتو ليه خفتو ليه
لاف إيدي سيف و لا تحت مني فرس

!عجبي

حبيت...لكن حب من غير حنان
وصاحبت لكن صُحبه مالهاش أمان
رحت لحكيم واكتر لقيت بلوتي
إن اللي جوّه القلب مش ع اللسان
!عجبي



إيش تطلبي يا نفس فوق كل ده

حظك بيضحك وانتي متنكدة

ردت قالت لي النفس: قول للبَشَر

ما يبصوليش بعيون حزينة كده

!عجبي




بحر الحياه مليان بغرقى الحياه

صَرَخت خش الموج في حلقي ملاه

قارب نجاه!...صَرَخت قالوا مفيش

غير بس هو الحب قارب نجاه

!عجبي


إنشد يا قلبي غنوتك للجمال

وارقص في صدري من اليمين للشمال

ماهوش بعيد تفضل لبكره سعيد

ده كل يوم فيه ألف ألف احتمال
!عجبي



زحام وأبواق سيارات مزعجة

إللي يطول له رصيف...يبقى نجا

لو كنت جنبي يا حبيبي أنا

مش كنت أشوف إن الحياة مبهجه؟

!عجبي


إيديا في جيوبي وقلبي طِرب

سارح في غربة بس مش مِغترِب

وحدي لكين وَنسان وماشي كده

وبابتعد...ما اعرفش...أو باقترِب
!عجبي



فتحت شباكي لشمس الصباح

ما دخلش منه غير عويل الرياح

وفتحت قلبي عشان أبوح بالألم

ما خرجش منه غير محبة وسماح

!عجبي




أنا الذي عمري اشتياق في اشتياق

وقطر داخل في محطة فراق

قصدت نبع السم وشربت سم

من كتر شوقي وعشمي في الترياق

!عجبي




اتمنى ان الاشعار تعجبكوا وياريت تدوروا على المعانى الضائعة وسط الكلام حقيقى جميلة


رحمك الله يا صلاح جاهين ...

[شريف]

اقتباس المشاركة الأصلية كتبت بواسطة نعمه محمودههههههههههههههههههههههههههه .مش. ممكن .تسلم. ايدك .قصدى. كيبوردك .ياشريف .بجد .ضحكتنى. والمشكلة .بقي .ان. كل. مقطع .فكرنى .بحد. أعرفه
معلش
النقط. دى .من. الكيبورد. اللي. يسامحها. دعاء .بقي. جايبالى .كيبورد. ومش .عاوزةتبعتهالى


ههههههههههه
انا كده جالى نقطة من كتر النقط

[دعاء شديد]

اتنيل قوم اتفسح
اركب مراجيح و اتمرجح
ليه ايد اهلك على خدك ؟
ليه فى ركن الاوضه متلقح ؟

ههههههههههههههههههههههههه
بجد انا موت من الضحك الصبح وانا بقرا خاصة الجزء ده
حلو جدا
ربنا ميحرمنا من ابداعاتك
ولا انت تحرمنا منها
بلاش بخل فى الاشعار سواء
شعر عامى او خالى او حتى جدى

[شمس بياض]

ههههههههههههههههههههه
ضحكتنى ولا كانش لازمنى
تسلم واضحك الله سنك وازاح همك
لكن بعد ماضحكت
فكرت فيما كتبه
استاذ خالد سعد
فغصب عنى
رجعت وفكرت فحزنت

[زهره المدائن]

ده كلام موزون في الجون

ياما شوفناوشوش شراب مقلوب

وغصب عنك تصبح وتمسي عليها

كأنها فرض عليك مكتوب

تقولشي يا خويا دعوة

وادعت عليك

بس في الاخر نقول ايه

حكمة ربنا وبيها راضين

ومهما قولت وعدت عليها

خلااااااااااااص

ده مبدأ وش مقلوب وبوز

ومفيش تغير

مهما حاولت يا غلبان

ده قسمة ونصيب

انك تقابل وتشوف

شراب مقلوب وبوز

ياريت ما تحرمنا من
ابداااااااااااعك
اصل نبعت لك شحنة شربات مقلوبة
هدية احتياطية

[ضياء الدين سعيد]

أسلوب تهكم رائع
وكلمات جميلة

تسلم يا أستاذ شريف
وبجد ضحكتنى من القلب

تقبل تحياتى ،،،،