الفصل الأول مفاهيم الإنترنت
الفصل الأول
مفاهيم الإنترنت
فى هذا الفصل سنتعرف على بعض المفاهيم والمصطلحات التى سنستخدمها عند التعامل مع الإنترنت .
لكن قبل كدة لازم نعرف مراحل تطور الإنترنت ، ومراحل تطوره بمعنى نموه زى مراحل نموك بالظبط.
مراحل تطور الإنترنت وإنتشاره :-
من 1843إلى 1956
كانت هنا أهمية ملحة (ضرورية ) إلى وجود إتصالات سلكية و لاسلكية أثناء الحرب العالمية الثانية لمعرفة كافة الأخبار فبدأ التفكير فى ربط الكمبيوترات مع بعضها البعض.
من 1957إلى 1969
قامت الحكومة الأمريكية بإنفاق مبالغ هائلةلربط الكمبيوترات مع بعضها البعض وتوصلوا إلى ما يسمى Network
من 1979إلى 1984
إنتقال الشبكات إلى الجامعات وأصبح الإتصال بين الجامعات عبر الإنترنت.
من 1991إلى 1994
انتشار سريع للإنترنت من خلال شبكة WWW
من 1995إلى 1998
أصبح لكل شخص قدرة للإتصال بالآخرين عبر الإنترنت.
خلاص عرفنا كدة مراحل التطور ياللا بينا نتعرف على المفاهيم والمصطلحات
طبعاً لازم نعرف أول حاجة معنى كلمة الإنترنت نفسها اللى طول التيرم هنتكلم عنها وعن كل حاجة خاصة بها.
**الإنترنت Internet
عبارة عن شبكة تربط آلاف وملايين شبكات الكمبيوتر عبر العالم
**البروتوكول Protocol
قبل ما نكتب المصطلح عشان نحفظه لازم نفهمه ، كلمة بروتوكول بمعنى نظام ، إتيكيت ، زى كدة لما تكون عارف إنك من الواجب عليك تقف لمدرسك لما يدخلك الفصل أو إن من الإتيكيت والواجب إنك تتصل بزميلك بالتليفون أولاً قبل ماتزوره
فهمنا كدة كلمة بروتوكول يالللا بينا بقى نعرفها
البروتوكول Protocol
قواعد إتصال مُتَفَق عليها لإتصال كل أجهزة الكمبيوتر المتصلة بالإنترنت مع بعضها البعض .
أشهر البروتوكولات فى الإنترنت
1- بروتوكول TCP/IP
2- بروتوكول FTP
أولاً بروتوكول TCP/IP
ويتكون من بروتوكلين مهمين جداً
أ-بروتوكول TCP
Transmissim Control Protocol
دا اسمه بالإنجليزى وما تتخضش كدة دا هنا بيقولك أنا
المسئول عن التحقق من صحة توصيل البيانات من جهاز كمبيوتر لآخر .
ب- بروتوكول IP
Internet Protocol
المسئول عن نقل البيانات من جهاز لآخر.
ثانياً بروتوكول FTP
File Transfer Protocol
خلاص بقى بتتخض تانى ليه ؟؟ هو إحنا مش قولما إن دا اسمه بالإنجليزى وإنه هنا بيقول لنا أنا
المسئول عن تبادل الملفات من الإنترنت وإليها .
ناخد بالنا من حاجة إذا جانى سؤال سواء مصطلح أم إختيارى أول ما أشوف كلمة ملفات أعرف على إنها بروتوكول FTP أما البيانات فهى بروتوكول IP.
**موقع الويب Web Site
**هو المكان الذى يتم زيارته لمعرفة المزيد عن الجهة التى تملك هذا الموقع ويضم صفحة أوأكثر .
معناه إيه هذا الكلام ، بص لما أقولك تعالى نروح لمدرسة صديق لنا ونسلم عليه ، ولما نروح المدرسة كدة إحنا روحنا الموقع فكلمة الموقع هنا تبقى هى المدرسة وبعد كدة متوقع نشوف إيه ؟؟؟؟؟ طبعاً مبنى مدرسة وطلاب ومدرسين وكمان إذا دخلنا داخل المدرسة هنلاقى المكاتب والأثاث والفصول وقوائم الفصول والكتب وكل ما يدل على إنها مدرسة وكمان كله هنشوفه ونلمسه ، فى الإنترنت بنلاقى كل دا بس على صفحات إلكترونية يبقى لما أقوللك موقع الويب تبقى عارف إنه قصده مكان .
معايا وألا........؟؟؟؟؟؟؟؟؟
لأ هأزعل إزاى مش معايا ؟ بلاش هزار
** عنوان موقع الويب URL أو Address
Uniform Resourse Locator
هو عنوان الموقع الذى ترغب فى زيارته .
بص هو إحنا عشان نروح مدرسة صديقنا مش كان لازم يكون معنا العنوان ؟؟؟؟؟ هنا أيضاً عشان نروح موقع ويب لازم يكون معانا عنوانه
URLوبيكون على شكل معين أصل مش معقولة هأقولك عنوانه اسكندرية ، محطة الرمل ، عمارة ..
مثال موقع وزارة التربية والتعليم المصرية
http://www.moe.gov.eg
وما تخافش فى الفصول القادمة بإذن الله هنعرف إزاى نكتب عنوان موقع ومعنى كل حاجة فيه .
**الصفحة الرئيسية للموقع Home page
Home page Of aweb Site
هى أول صفحة بموقع الويب والتى من خلالها يسهل الإنتقال لباقى صفحات الموقع.
يعنى زى الواجهة بتاعة المدرسة ومن خلال لبوابتها بنقدر ندخل المدرسة ونشوف الفصول وكل حاجة جواها .
**الإرتباط التشعبى Hyperilink
شفت لما تكون فى شارع عمومى وتدخل منه على شارع جانبى ويوديك على حارة وبعدين زقاق وإلى ما شاء الله..... بس كلهم مرتبطين بنفس الشارع العمومى ، هو دا
تعريف الإرتباط التشعبى Hyperilink
*هو نص أو صورة فائقة فى صفحة الويب عند الضغط عليها تنقلنا إلى
أ- مكان آخر فى نفس الصفحة
ب- صفحة ويب أخرى بنفس الموقع .
ج- صفحة ويب أخرى فى موقع آخر .
د – إنزال ملفات من الإنترنت .
**المُستعرض Browser
هو برنامج يسمح لك بإستعراض صفحات الويب المتاحة على الإنترنت .
وفى الفصل التالى بإذن الله هنعرف كل حاجة عنه
** تحميل الملفات للإنترنت Upload
هو نقل ملف أو برنامج من جهازك إلى الشبكة .
أنا كتبت موضوع حلو قوى عن فلسطين وعايزة ناس كتير تقراه على الإنترنت دا إسمه رفع أو تحميل يعنى بأرفع أو أحمل من جهازى للشبكة
** إنزال ملفات من الإنترنت Download
لنقل أو نسخ ملف من الإنترنت وإنزاله على جهازك الشخصى .
مش محتاجة شرح، صح؟؟؟
تعالوا بقى نشوف
ماهى خدمات الإنترنت ؟؟؟
1-البحث Search
محتاج عمل موضوع أو بحث مثلاً عن نجيب محفوظ .
2- الدردشة Chat
تتواصل مع صديقك بالصوت والكتابة وكمان الصورة عن طريق
كاميراويب Web Camera
وهى كاميرا فيديو متصلة بجهاز الكمبيوتر
3- البريد الإلكترونى E.mail
إرسال وإستقبال رسائل " يعنى كدة بديل للبوسطة وكمان سريع جداً فى ثانية تبعت الرسالة وتلاقى الرد جالك فوراً بدل البوسطة اللى الرسالة بتاخد فيها أكثر من اسبوع للوصول للمستلم فقط"
4- التجارة الإلكترونية
شراء وتبادل السلع عبر الإنترنت .
انتهى الفصل الأول
بحمد الله
 |
رد مع اقتباس
شكر هذه المشاركة 
معجب بهذه المشاركة 
المفضلات