الفصل الرابع " البرمجيات "
الفصل الرابع
البرمجيات Soft ware
فى الفصل السابق تكلمنا عن الأجهزة Hard ware وعرفنا إنها الأجزاء الملموسة
طيب هو فيه أجزاء مش ملموسة ؟؟
أيوة ، هو إنت لما بتشوف فيلم فى التليفزون بتمسكه بإيدك؟؟ أو لما تحفظ مثلاُ كرتون توم وجيرى على إسطوانة وتمسك الإسطوانة بتبقى شايف اللى جواها وماسكه؟؟؟ لأ طبعاً
دى حاجة الحاجة التانية
إنت فى أيام الدراسة تبدأ يومك إزاى من وقت ما تصحى إلى أن تنام ؟؟؟
هتقوم من النوم ، تتوضأ وتصلى ، تلبس وتفطر وتمشى للمدرسة ، هتحضر حصصك فى المدرسة ( وخللى بالك بتدأ من الحصة الأولى ثم الثانية ثم الثالثة وهكذا، وما ينفعش تاخد الحصة الثالثة قبل الأولى يعنى فيه ترتيب) ، وبعد كدة بترجع للبيت ، تغير ملابسك ، تتغدى ، تكتب واجبك ، تحضر دروسك ، وفى النهاية تنام .دا كله اسمه برنامجك اليومى مترتب ومتنظم وفيه حاجات ما ينفعش تتعمل قبل التانية ، معايا وألا لأ وكمان عشان إنت إنسان ولك عقل فيه حاجات بتعملها من نفسك ، ما فيش حد هياخد بإيدك مثلاً ويوصلك المدرسة أو يأكلك بإيده ؟؟؟؟؟ لكن الكمبيوتر جهاز ومالوش عقل والإنسان هو اللى بيدخله ويعمله كل حاجة وبيديله أوامر عشان ينفذ اللى هو عايزه مش كدة أهى الأوامر دى هى البرنامج أو البرمجيات Soft ware ، يارب تكون الفكرة وصلت .
من هنا نبدأ نعرف
البرنامج أو البرمجيات Soft ware
هى مجموعة من الأوامر تُعطى للكمبيوتر ليقوم بالمطلوب منه وتُعتبر وسيط بين المستخدم والكمبيوتر
هتقولى لأ استنى بقى أنا فهمت الجزء الأول من التعريف اللى هو " مجموعة من الأوامر تُعطى للكمبيوتر ليقوم بالمطلوب منه" لكن الجزء الثانى مش مستوعبه " وتُعتبر وسيط بين المستخدم والكمبيوتر" هأرد وأقولك إنت إنسان والكمبيوتر جماد وعشان يحصل بينكم تفاعل أو كلام لازم حد فى النص ياخد منك الأمر اللى عايز الكمبيوتر ينفذه ويوصله للكمبيوتر فيروح الكمبيوتر منفذه على طول ، والحد دا هو البنامج وعشان كدة بنقول عليه وسيط ، فهمناها؟؟؟؟
أنواع البرامج
1-نظام التشغيل Operating Systems
2- التطبيقات Applications Programs
3- البرامج الخدمية service programs
4- أدوات P D F
5- مضادات الفيروسات Anti Virus
أولاً نظام التشغيل :-
لما نشترى جهاز الكمبيوتر و نفتحه بنلاقيه شغال ونلاقى الشاشة الزرقاء ظهرت وبتبقى خلفية ، هتقول الله هو أنا لسة عملت فيه حاجة، مين اللى حط الحاجات دى فيه ؟؟؟ آه السؤال كدة مظبوط مين اللى حط الحاجات دى فيه ؟ الشركة أيوة الشركة ، اللى صنعته وانتجته وبنسمى الحاجات اللى الشركة حطاها نظام التشغيل
ممكن دلوقت تقولى بقى تعريف نظام التشغيل ؟؟؟
التعريف
هو خلفية تقوم بخلق بيئة الكمبيوتر وتضعه الشركة المنتجة
الإستخدام
1- مراقبة العمل ومتابعته.
2- إدارة العمل على الأقراص والملفات .
3- تخصيص الأماكن لتخزين البيانات بطريقة منظمة .
أنواع نظام التشغيل
أ - نظام Dos " كان موجود زمان ودلوقمت لأ لإنهم طوروه"
ب – نظام الويندوز Windows
ثانياًالتطبيقات Applications Programs
بعد ما نلاقى نظام التشغيل بأحتاج مثلاُ إنى أكتب ونظام التشغيل يقولى لأ ماليش فى الكتابة فأضطر أشوف برنامج للكتابة ، وكذلك لما أحتاج أسمع قرأن أو أفلام يقولى كذلك لأ ماليش فى الصوت فأضطرأشوف برنامج للصوت وهكذا البرنامج اللى بأستخدمه كدة اسمه تطبيق ،
تعريف التطبيقات
برنامج يعمل من خلال برنامج التشغيل
الإستخدام
1- تؤدى مهمة معينة مثل الكتابة ، الرسم
2- عمل قوائم العناوين
أنواع التطبيقات Applications Programs
1- برنامج الجداول الحسابية Excel
والذى يُستخدم فى
* تخزين المعلومات المالية .
* استخدام المعادلات .
* عمل رسم بيانى
2- برنامج منسق الكلمات
والذى يُستخدم فى
* كتابة الكلماات
* كتابة المقالات
* كتابة القصص
3- برامج الترفيه
* موسيقى
* فيديو
* ألعاب
4- التعليم
* برامج تعليم
* ألعاب تنمية المهارات
5- قواعد البيانات
* القوائم البريدية
* عناوين الكتب
6- برامج أخرى
* برامج استعراض وتصفح مواقع الويب
ثالثاً البرامج الخدمية service programs
البرامج التي تساعد المستخدم على تنفيذ عملية خاصة بالجهاز
* برامج تهيئة الأقراص
* برامج تحويل البيانات من صيغة لأخرى
رابعاً أدوات P D F
* برامج تتعامل مع ملفات النصوص والصور التى على شبكة الانترنت .
* يمكن طباعة الصور والنصوص بها .
خامساً مضادات الفيروسات Anti Virus
بنسمع كتير عن فيروس دخل الكمبيوتر
الفيروس Virusهو برنامج ضار يصيب الكمبيوتر ويتلف الملفات به
ولكى نحمى الكمبيوتر من الفيروس نستخدم مضادات الفيروسات Anti Virus
مضادات الفيروسات Anti Virus
هى برامج تساعد المستخدم على الحفاظ على بياناته بشكل سليم وحماية جهازه من الفيروسات
ماشى الحمد لله لغاية هنا
لكن كيف تعمل البرمجيات من خلال نظام التشغيل ؟؟؟
1- التطبيقات بترسل أوامر إلى نظام التشغيل .
2- نظام التشغيل يستقبلها ويرسلها للمكونات المادية للمعالجة ( ياترى فين هتتعمل هذه المعالجة فاكرين؟؟)
3- يقوم بعد ذلك نظام التشغيل بإسترجاع الأوامر على شكل سلسلة من الأحداث
انتهى الفصل الرابع
 |
رد مع اقتباس
شكراً لهذا
أعجبني هذا
المفضلات