أولا كل سنة وحضراتكم طيبين والأمة الإسلامية كلها بخير وسعادة
ورمضان كريم وربنا يعيده علينا بخير وميمرش علينا إلا واحنا متثبتين
أنا كنت سمعت خبر كده إن عدم صرف الكادر للمعلمين المساعدين لحد دلوقتى
بسبب وزارة المالية وانها مش مستعدة تصرف فلوس فى الوقت الحالى وعشان كده بيتحججوا
بإن الكثير لم يأخذ شهادة الرخصة الدولية لقيادة الكمبيوتر
وبعدين قلت لنفسى وماله نستحملهم شوية لما ربنا يفك زنقتهم والناس لبعضيها
وبعدين قعدت أحسبها مع نفسى لقيت إن إحنا 70 ألف معلم نضربهم فى 70 جنيه
يعنى قول حوالى خمسة مليون في الشهر يعنى حوالى 60 مليون فى السنة
بيتهيأ لى كتير علينا مش كده
طيب لما تعرفوا بقى أن الدولة انتجت حوالى50 مسلسل أو أكثر وان مسلسلات رمضان السنة دى
مكلفة خزانة الدولة 750 مليون جنيه وبعض الاقوال مليار جنيه
وان اجر نجم واحد من نجوم المسلسلات يعدى 14 مليون جنيه فى بعض المسلسلات
وأقلهم ممكن تقول 5 أو 6 أو 7 مليون تعمل أيه
يعنى مستخسرين في 70 ألف معلم 60مليون جنيه فى السنة
وبيدوا ممثل واحد 14 مليون جنيه فى مسلسل واحد بالذمة ده حلال ولا حرام
بالمقارنة بدولة غنية تانية زي قطر عارفين بتعرض كام مسلسل فى رمضان حوالى 9 مسلسلات فقط و6 برامج
قطر ياخوانا انتجت مسلسل القعقاع بن عمروبيحكى عن تاريخ المسلمين وأمجادهم واحنا بننتج مسلسلات تلهى الشعب
وتضيع صيامهم
مش هقول غير حسبى الله ونعم الوكيل
ونصيحة ياأخوانى رمضان شهر عبادة مش شهر أكل وشرب ومشاهدة مسلسلات.
واذا كانت الحكومة بتستخف بعقول الشعب فلازم يبقى إحنا أعقل من كده بكتير لإن إحنا أصحاب رسالة .
وأنا بدعوكم لمقاطعة مسلسلات رمضان ولو حد مدمن مسلسلات يبقى يسمعها بعد رمضان
وكل سنة وانتم طيبين.