بسم الله الرحمن الرحيم
والصلاة والسلام على خير الخلق أجمعين
سيدنا محمد وعلى آلة أجمعين
بصراحة بعد الأخوة اللى عرفوا نفسهم
أحس بأننى قزم فى بلد العمالقة
لكن معلش يلا
الأسم : أحمد حمدى محمود محمد حماد
تاريخ الميلاد : 23 - 10 - 1980م
المهنة : مدرس علوم
الإقامة : محافظة البحيرة - كفر الدوار - العكريشة
الهوايات :
1- الكمبيوتر وخاصة ألعاب الإستراتيجى ذى ريد ألرت وكوماندوز وأى جى أى
2- الرياضات العنيفة فلعبت بوكس منذ صغرى ثم كاراتية ثم كونغ فو وأخدت بطولة إسكندرية
ولعبت كمال أجسام وبعد الزواج بطلت كل شئ الا اوقات بسيطة ألعب كرة قدم مع طلابى
3- أحب أن أتقن عملى فهذا من هواياتى
4- وأحب الرسم وعندى فية موهبة كويسة والحمد لله
وأول مرة أرسم رسمت الأبلة بتاعتى وكانت لبسة خمار وانا فى 3 إبتدائى تقريبا ويومها الدنيا
اتقلبت عشان يتفرجوا على الرسم بتاع الطفل دا والأبلة فرحت قوى بيا وبعدها بقيت أرسم
كرتون سلاحف النينجا لزملائى مقابل ورقتين فاضيين من نصف الكراسة يعنى اللى عايزنى
ارسملة بيجيب ورقتين للرسم وورقتين تمن الرسم وفى الوقت دا ظهر بعض الطلبة السماسرة
اللى يطلبوا الرسم بالألوان مقابل انه حيبيعة لكن طبعا باعة من غير ما اخد شئ
وبعد كدة رسمت كاركاتير فى جريدة أخبار اسكندرية
5- أحب كلمة الحق ودا جلب لى المشاكل لأنى إكتشفت ان اللى يقول الحق يقع فى الشق
وعشان كدة كنت متحمس للحق فقلت احارب الفساد لأن الساكت عن الحق شيطان أخرس
فإلتحقت بأخبار إسكندرية وعملت مقالات دينية ورسمت كاركاتير وكنت صاحب فكرة عمل صفحة
تعليمية فلم يلتفت لكلامى خصوصاً لأنى كنت وقتها 19 سنة ورد على الأستاذ أحمد رجب
صاحب الجريدة وقالى انت عارف الصفحة دى بتتكلف عليا قد اية ؟ 17 الف جنية
بعدها بفترة لقيت ان نزلت صفحة تعليمية
الظاهر القراء طلبوها وطبعا طلبات القراء أوامر
وقام بوضع الصفحة التعليمية موجهين كبار
وفى يوم ذهبت للجرنال وقابلت أ / أحمد رجب وقلتلة أديكوا عملتوا فكرتى " الصفحة التعليمية "
قالى الموجهين مجبوش المادة اللى حتنزل فقلتلة أعملك انا الصفحة التعليمية
فقالى بجد ؟ قلتلة اجيلك امتى ؟
قال العدد لازم يكون جاهز يوم الأحد وكنا فى يوم الخميس قلتلة طيب اجي لحضرتك امتى ؟
قالى بكرة
رحت يوم الجمعة التى لا انساها وكان شتاء غزيرا وبالمناسبة دا كان اخر عدد حيصدر قبل
الأمتحانات لأنها كانت بتصدر كل 15 يوم يعنى مراجعة نهائية
فرحت هناك وعمل لى شاى بنفسة مع انى مش مغرم شاى بس شربتة لأنى بشرب الشاى لو
الغير عملة وخلاص وقدملى تفاحة صفراء
وقعد جنبى لحد ما خلصت
وبعدين وصلنى بالسيارة لحد موقف العوايد
وركبت منه لكفر الدوار
وبعد كم يوم رحت الجرنال قالى على فكرة الموجهين جابوا المادة
قلتلة خلاص نزلهالهم مفيش مشكلة عادى
قالى لا انت تعبت وحنزلك المادة بتاعتك انت
والحمد لله نزل العدد واللى توقعته بالضبط جاء حتى الرسمة الوحيدة وكانت رسمة الصورة المتكونة
بواسطة الميكروسكوب البسيط وانهالت الإتصالات على الجريدة تشكرة على توقعات الموجة
العبقرى اللى حط التوقعات
وبقى أ / أحمد مستغرب ازاى " عيل " صغير ينال كل الاعجاب دة لأنه كان بطبيعة حاد وقوى
الشخصية وليس من السهل ان يعجب بأحد
ومن يومها أصبحت مشرف الصفحة التعليمية فى الجريدة وكنت أصغر مشرف صفحة
ونزلت بها جيويوجيا وأحياء ثانوى عام وكنت أيامها فى أولى كلية وكنت ادرس الأحياء والجيولوجيا
لكن بعد كدة أصبحت الأحياء مادة مش مهمة لأن مبياخدهاش الا اللى ناوى على طب
ودول طب من بقك عددهم قليل جدا غير ان الطالب اللى بيدخل علمى ويجيب مجموع مش
كويس بقى يحول أدبى فقررت انى مشتغلش احياء تانى وانى اشتغل علوم لأن الاعدادى عدده
كويس والطالب مش بيختار حياخد اية والحمد لله
وظل الحال سنتان نزل لى المنهج كامل ولم اعد احتاج لذلك خصوصا انى لاحظت ان أ / أحمد
يطلب منى انى اجيب اعلانات وانا مبعرفش اكون منافق ولا اذل نفسى عشان اعلان
اقعد اكلم دة ودة معرفش ولاحظت ان الجريدة بل كل الجرايد تشن حملة فساد على مصنع كذا
فيعمل اعلان فى الجرنال فتتوقف فتركت الجرنال وذهبت لجريدة اخبار البحيرة والأقاليم
ونزل لى تحقيقات وصفحة دينية وحاجات كتيرة لكن بعد فترة لاحظت حملة على مصنع الكارتية
اللى اسمة صعيدى والدلع ديدى وقاموا بحملة يحذروا الأمهات من الميكروب السبحى ويجيبوا
رأى أطباء وان الكارتية والشيبسى فية مواد حافظة ومواد ناسية وكلام من دة
ثم فوجئت بتوقف الحملة وأثناء تصفحى وجدت اعلان كبير يعنى غالى لصعيدى والدلع ديدى
فتركت الجرنال وذهبت لأخبار الدلتا ولم اعمل بة سوى وقت قصير نزل لى موضوعين عن من
سيربح المليون وعن المظاهرات فى جامعة الإسكندرية
بعدها وفى عام 2000 ظهر النت بكثرة عندنا
فقلت ولما الانتظار لعمل موضوع ومهاجمة اللصوص والفاسدين ؟ لما الانتظار 15 يوم حتى تصدر
الجريدة التى قد يوافق رئيس التحرير على الموضوع وقد لا يوافق
فقررت ان اعمل من خلال الإنترنت
وها أنا ذا معكم
طبعاً صدعتكم
أسف جدا
المفضلات