عفريت 2010 !!!!!
لقيت الفانوس مرة و دعكتة طلعلى عفريت قاللى شبيك لبيك.
قلت : خلاص الذل انا ودعتة و يا عفريت بالطلبات هاهريك ....
قالى : هاها يا انسان دة انا عفريت مارد ابن جان مايهمنيش مكان و لا زمان .... و اطلب و انا عندى البرهان ...
قلتلة : عاوز قمح زرع فى مصر .... و مسئولين يبطلوا فشر ... و حكومة متعصرنيش عصر ... و مرتب يكفى لاخر الشهر ... و عاوز عيش بدون طوابير ... و انفاق حكومى بدون تبذير ... و عاوز فى بيتى شيكارة دقيق ...و سبب مقنع لاى حريق ...و مجلس شعب بدون تصفيق ... و فى كأس العالم لينا فريق ... و عاوز مرة ازور شرم الشيخ ... و صابعين كفتة م اللى فى السيخ ... و اشرب مرة عصير بطيخ ... و اخرج من القسم بدون تلطيخ ...و نفسى الضحكة ترجع تانى ... و حتة لحمة كندوز او ضانى ... و جنية مصرى زى البرانى ... و رصيف للمشى انا و خلانى ...
رد العفريت و قال : يا مصرى ماكنش العشم .. بص ...
انا ممكن انقل لك الهرم ...و اسد لك الاوزون اللى اتخرم ... و ارجعلك الاكل اللى اتهضم ... و تمأمأ البقرة زى الغنم ...و اعملك قصر من العدم ... و اقولك معنى شرم برم ...بس طلباتك طلبات ملحوس ....عقلة خلاص اكلة السوس ... و احنا بناخد منكم دروس ...ازاى نخلى الجن متعوس... و يا ريت ترجعنى تانى الفانوس .... و زى بعضة اعيش محبوس ...بدل ما اخرج و اتبهدل زيك ... و يتلم موكوس على متعوس
 |
رد مع اقتباس
شكراً لهذا
أعجبني هذا
المشاركة الأصلية كتبت بواسطة egyptian-girl
المفضلات