ما تربطش الحمار مطرح ما يقولك صاحبه علي فكرة
كتير بسأل نفسي السؤال ده ... و للأسف اجابته بتبقا عادية جدا ! ..
(( احنا ليه عادي أوي كده ؟ ))
بمعني آخر ... ليه تقليديين في كل حاجة ... و منين هييجي التغيير إذا كان العادي بتاعنا عادي .. و مافيهوش شئ غير عادي ؟ ازاي هتبقا نتيجة التجربة مختلفة و خطواتها هيا هيا بعملها بدون تغيير زي كل مرة عادي ؟
و ليه دايما بنشتكي من كل حاجة و كل حاجة بنعملها بنفس الطريقة عادي زي كل يوم عادي ؟ و ليه دايما متوقعين نتيجة غير عادية في حين اننا بنتبع نفس الاساليب العادية و نفس الجو العادي و نفس اليوم و الميعاد العادي
و الدنيا عندنا عادي جدا عادي ؟ و ليه دايما بنقلد الراجل ده و بنقدس طريقته في الحياة ؟ :
كان هناك رجل ولد بطريقة عاديه من أب و ام عاديين
وعاش في بيت عادي ،و كانت طفولته طفوله عاديه ثم دخل المدرسه الابتدائيه
بطريقه عاديه
والمرحله التي تليها بطريقه عاديه
وكانت درجاته عاديه الى ان تخرج من الثانويه العامه بمعدل عادي
ليدخل جامعه عاديه و تخصصا عاديا ليتخرج بطريق عاديه
ثم توظف في وظيفه عاديه براتب عادي ، و كان عليه أن يختار امرأه ليتزوجها
و المفاجأة أنه اختار امراه عاديه، و انجب اطفال عاديين
ورباهم تربيه عاديه و دخلهم مدرسه ابتدائيه عاديه
ثم تقاعد من الشغل بطريقه عاديه
وفي يوم عادي ليه صباح عادي
مات عادي جدا
زي ما أي حمار بيموت عادي
الغريب ان جنازته كانت عادية !!
و كان عليه ديون عادي
و ما سابش أي أثر في الحياة
و كان زائد علي الحياة عادي جدا زي كل شخص عادي
اسئلة عادية نطرحها بشكل عادي
ليه دايما نقدس التقليد حتي و إن كان من نقلده شخص عادي
بل شخص جاهل متخلف زيرو في الحياة مالوش أثر؟
ليه ما بنجربش نعمل حاجة مختلفة يمكن النتيجة تطلع مختلفة؟
ليه أي حد يحاول يغير اللي حواليه و يغير نفسه
الدنيا تقوم عليه ولا تقعدش
و يبقا هوا الانسان الشاذ الساعي وراء الشهرة و الاختلاف؟
ليه دايما بننظر للشخص الغير تقليدي
علي أنه الخروف الذي شرد عن القطيع؟
و اللي لازم يندبح ع العيد ؟
ليه كل ما حد فينا يحاول يعمل حاجة مختلفة
بيسقط من عيون الاخرين
برغم انه تجديده في حياته لا يخالف شرعا و لا دين
؟؟؟
طب بلاش
ليه دايما ردودنا علي بعض في الموضوعات
تقليدية جدا لدرجة اني اقدر دلوقتي اكتب موضوع بردوده كاملة
متوقعها هتتكتب و الاقيها فعلا اتكتبت ؟
ليه ما بنستخدمش عقولنا بشكل متفتح أكثر و نستفيد من كامل الطاقة
اللي وهبها ربنا لينا ؟
ليه بنكره التغيير ؟
ليه بنستغرب لما رئيس دولة يقعد في الحكم أكثر من تلاتين سنة
و نندهش انه مازهقش و مش عايز يسيب الكرسي
مع اننا لابدين في مكاننا
و كل واحد فينا قاعد علي كرسيه
بيحارب كل انواع الكراسي التيفال
تعالوا نغير الدنيا بقا يا جماعة
ع الأقل في محيط بيئتنا الصغيرة
ع الأقل هنا في منتدانا نتدرب هنا
تعالوا نغير بقا موضوعاتنا التقليدية و ردودنا التقليدية
و صورنا الرمزية التقليدية و توقيعاتنا العادية التقليدية
تعالوا نغير مشاركاتنا المحفوظة
تعالوا نغير القالب العادي التقليدي اللي زرعنا نفسنا جواه
مخنا مليان أفكار خطيرة مسجونة ورا أسواره
و في ايدينا المفاتيح
و بندور عليها بحمق شديد
تعالوا نحول الكلام لفعل
كرهت أوي ان حد يقرا الموضوع و يضع رد عادي
و يمشي في هدوء غير عابئ بما يقال
عندك ردود غير عادية ؟؟؟؟؟؟؟؟؟؟؟؟؟
او افكار جديدة لحياتك كلها و لينا هنا في المنتدي
ماتكونش عادية ؟
ارجوك لا تضع حدا لردك و انطلق في مشاركاتك و لا تخش حذفا و لا نقلا
ولا ايقافا و لا حد يزعل منك مادمت لا تجرح أحدا و لا تعص الله
اضرب رصاصة الابداع علي دماغك التقليدية
يمكن يتولد من بين حطامها مخ غير عادي
اتمني الاقي رد واحد من بين الردود
يكون غير عـــــــــــــــــــادي
 |
رد مع اقتباس
شكراً لهذا
أعجبني هذا
وطبعا بعد تانى مرة تراجعت وقلت مفيش داعى 
المشاركة الأصلية كتبت بواسطة شريف
المفضلات