الموضوع ده لطلبة إعدادى طب الفم والأسنان
أولا المواد

النبات (botany):
- genetics .. وراثة
-microbiology .. كائنات دقيقة
-topics in physiology .. موضوعات فى فسيولوجيا النبات
-enzymes .. انزيمات النبات
-systemetic botany & anthophyta .. تقسيم النبات

الحيوان (zoology):
-physiology .. وظائف الأعضاء
-cytology .. علم الخلية
-invertebrates .. لا فقاريات
-mammalia .. الثدييات
-chordata .. الحبليات
-histology .. علم الأنسجة

الكيمياء (chemistry):
-inorganic .. كيمياء غير عضوية
-organic .. عضوية
-physical .. فيزيائية

الفيزياء(physics):
-properties of matter .. خواص المادة
-electricity .. كهربية
-waves .. موجات
-radiation .. اشعاع
-optics.. بصريات و ما يتعلق بالعدسات
-statistics .. احصاء

الانجليزى(english):
-terminology .. مصطلحات
-toefel .. تويفل
الطريقه المثلى للمزاكره فى إعدادى أسنان

لازم تعرفوا ان المذاكرة فى الكلية مختلفة تماما عن مذاكرة ثانوى
ازاى ؟؟ هقولكم ..
يعنى مش لازم تركز فى كل (فتفوتة ) فى المنهج
لأ المهم تفهم المضمون العام وتعرف تتكلم عن كل عنوان
لأن الاسئلة ( خصوصا فى علم الحيوان والنبات ) بتكون عنوان ومطلوب منك تتكلم عنه
فلازم يكون عندك فكرة عن كل عنوان وتقدر تتكلم عنه وطبعا الاخطاء الاملائية وفى القواعد مش مهمة
ومش مهم برضه الارقام والفتافيت الصغيرة


يعنى باختصار ::
مذاكرة الكلية هى over view يعنى نظرة كلية مش للنقط الصغيرة
يارب تكون الفكرة وصلت

ثانيا :

مهم جدا انك تذاكر من مصدر واحد مش من اكتر
مهم للغاية للغاية
يعنى متشتتش نفسك فى اكتر من حاجة
وخلى بالك انك تذاكر من مصدر واحد نص نص أحسن ألف مرة انك تذاكر من اكتر من مصدر ممتازين
يعنى اول السنة اختار أفضل مصدر ( كتاب او ملزمة ) و هى دى تثبت عليها طول السنة حتى فى المراجعة


ثالثا :

حاول تذاكر من مصدر بتاع السنة دى ( مش قديم )
لأن فى حاجات بتتغير وبتفرق

رابعا :

لازم تفهم انك مش داخل جامعة يعنى تلعب بقى وخلصت المذاكرة وسنينها
لأ خالص
اه هو مفيش ستريس زى ثانوية عامة
بس لازم تذاكر من أول يوم لحد اخر يوم
حتى لو بتذاكر فى اليوم ساعة
حتى لو يوم اه ويوم لا
بس تفضل مواظب طول السنة على انك تقرا وتفهم اللى بتاخده
وحاول قدر الامكان انك تحضر المحاضرات والسكاشن بنفسك


مهم أوى أوى ..

الامتحان من المحاضرات
الامتحان من المحاضرات

وهى دى ميزة اعدادى .. ان اللى بيشرحلك بيحطلك الامتحان
يعنى اللى هو قاله هو اللى جاى فى الامتحان
يعنى المحاضرات اهم الف مرة من الكتاب
دى شوية نصايح تانيه
عشان أي حد يعرف يمشي كويس في الكلية وفي المذاكرة لازم يحب الكلية وإذا اعتبرنا انك دخلت الكلية برغبتك فبكدة مفيش مشاكل لاكن المشكلة بتكون عند اللي أدخله مجموعه الكلية فعليه أن يتذكر الرضا بقضاء الله وقدره ويحاول انه يؤقلم نفسه ويحب الكلية ( بصراحة أنا شفت ناس واجهتهم مشاكل بسبب الموضوع ده )

ثانياً : بالنسبة لمن كانت دراستهم بالعربي فزي ما قالوا الدكترة من قبلي جزاهم الله خيراً ان هو الموضوع شهر كدة وتتعود على اللغة ،
أضيف اقتراح ان القاموس الناطق ممكن يفيد جدا في التغلب على الصعوبة في اللغة وعلى الحصول على معاني الكلمات في وقت قليل

أما بالنسبة للدروس الخصوصية فعن تجربة مفيش حاجة ليها والمهم حضور المحاضرات والتركيز فيها
لكن لازم كل واحد يشوف قدرته على الفهم من كل دكتور أخبارها ايه وعلى حسبها يحدد حاجته الشخصية للدروس

أما الملازم : في مواد أحسن حاجة انها تتذاكر من المحاضرات فقط وبكدة نوفر وقت وجهد مثل
cytology , embryology, & mechanics
وعشان كدة محاضرات المواد دي مهم جدا جدا حضورها

ومواد أحسن حاجة من الكتاب مثل ال electricity في أول 3 شباتر( إلا إذا أكمل الدكتور تغيير الكتاب )

ومواد لازملها ملازم مثل ال waves بالتعاون مع المحاضرات

ومواد من الكتاب مع متابعة ما يتم حذفه في المحاضرات من الكتاب زى histology, physiology

أما النبات فمهم جدا حضور المحاضرة ولو قدرت تكتب كل المحاضرة وتذاكر منها يبقى ممتاز هذا يتوقف على قدرتك على متابعة المحاضرة وكتابتها أو الملازم

والكيمياء أنا مجربتش الملازم فيها لأني كنت بذاكرها من الكتاب بس لا أعرف هو كان صح ولا غلط المذاكرة من الكتاب !!!

هذا بالنسبة للترم الأول فقط لأن في الترم التاني بيتغير الدكاترة( ماعدا الفيزياء والE) وبيتغير من فين تذاكر تبع كل دكتور ..
واستنوا شرح كل فرع فى المواد
ودمتم سالمين


طبعا منقووول