المساعد الشخصي الرقمي

مشاهدة النسخة كاملة : يا شوية همج يا متخلفين


شريف
10-09-2011, 10:38 AM
طبعا ... طبعا طبعا
لازم يحصل كده طبعا

ما هو الاعلام لمع الشاب اللى تسلق السفارة و حرق العلم الاسرائيلي
اسم الشاب ده بقا بيرن في جميع أبواق الاعلام التافه اللى بيهتم بالتوافه و يضخمها

فكل الشباب عجبهم التلميع الاعلامي للشاب ده
فأخذوه قدوة ... فالكل رايح بشواكيش عشان يهدم الجدار
ليه ؟؟؟ عشان يطلع بعد كده في التليفزيون !!!!!!!!!

شوية شباب تافه فاضى ..
عيال صغيرة من سن 12 سنة لعشرين و لخمسة و عشرين
خلاص ... مبقاش في دولة
مبقاش في مصر

ايه يا مصريين !!! ايه اللي حصلكوا يا مصريين
كل حيوان عايز يعمل اي حاجة ينزل يعملها
ايه يا بلد

ايه التخلف اللى احنا فيه ده

اللى حصل امبارح ده وصلنى لمرحلة شنيعة من اليأس

أنا خلاص

مش طايق مصر باللى فيها
أول فرصة هتجيلي للهجرة هغور في داهية
حاسس انى عايش وسط شوية همج
شوية رعاع

شوية شباب صايعة مش لاقيين اللى يلمهم
و العيب مش عليهم

العيب على الايادي المرتعشة
العيب على الراجل الذكى اللى أعطي قرار ببناء جدار حوالين السفارة الاسرائيلية !!
قرار غبى مالوش أى تلاتين لازمة
العيب مش عليكو يا شباب يا صايع يا ضايع ياللى مش لاقي حاجة تعملها
العيب مش عليكو يا شباب عاطل مفكرش يستغل الطاقة دي في حاجة تنفعه
العيب علي مصر
اللى مش لاقية راجل يحكمها

بقول الكلام اللى جوايا ... و اللى مش عايز يسمع الحقيقة يا جماعة
يقفل الصفحة ولا كأنه شاف حاجة

بس انا مش هسكت
مش هنقعد نتفرج كده كتير

عايزين الحقيقة المرة ؟؟؟
مصر مافيهاش راجل


مافيهاش راجل بمعني الكلمة يعرف يمسك البلد من حديد
و بدون ظلم

معادلة صعبة عايزة راجل ... و للأسف مش شايف راجل فيكي يا بلد

حتى المجلس العسكري ... الناس العسكريين يا ربي
مرتعشين ... مش عارف ليه

حتي دول مؤمنين بضبط النفس مع اسرائيل !!!!
ما هو لو كانوا خدوا قرار بسحب السفير علي الاقل
بطرد السفير علي الاقل
بقطع العلاقات علي الاقل

مكانش حصل الهمجية دي
مكانش حصل البله و العته و التخلف اللى حصل امبارح ده

عشان كده مصر ماينفعش يحكمها .... ناس مالهاش موقف !!!!!

شوية الشباب دول يتطوعوا في الجيش
و يروحوا علي الحدود مع اسرائيل

يورونا شطارتهم

مش رجولة انك تقتحم مبني جوه بلدك
حتي لو سفارة أنجس اهل الارض
برضه مش من حقك

استفدت ايه ؟؟؟
حصل ايه اخر اليوم
غير اصابات و دماء و دمار و تخلف و منظر زبالة للمصريين

حصل ايه و استفدنا ايه اخر اليوم
غير جرح غائر مازال ينزف بين الشرطة و بين الشعب

استفدنا ايه
امتي بقا هتبصوا لمصلحة مصر
امتي بقا هتفوقوا لنفسكوا و تشوفوا الناس بره بتعمل ايه عشان بلادها
تبقي في الصدارة و المقدمة
هنفوق امتي من ثقافة قلة الادب و الصوت العالي و الهمجية
هتفوقوا امتي و تشوفوا النمور الاسيوية بتعمل ايه و عايشين ازاي

رجالة اوي بصراحة لما هدمتوا الجدار

لأ رجالة

طب ورونا نفسكو ع الحدود

اقسم بالله العظيم لو حسني مبارك لسه في الحكم
ما كان عيل منكم هوب بس جنب الشارع اللي فيه السفارة

ماتفتكروش دي بطولة
ده جبن و استغلال للمواقف

عارفين ان مافيش شرطة
و ان الجيش كمان سابلكوا الحبل ع الغارب

فروحتوا تهدوا الجدار
ايه الرجولة في كده ؟؟؟؟

تبقوا رجالة صحيح لو عملتوها ايام مبارك
لكن محصلش

يبقا اتنيل انت و هوا علي عين اهلك و اقعدوا في بيوتكم
و كافية خراب

اللي محروق اوي علي مصر
يعمل حاجة تفيد مصر

محروق اوي يا خويا من اسرائيل
حاسس انها مدياك علي قفاك ؟

ماتتنيل تشتغل وتنتج عشان تعرف توصل لربع اقتصادها و تحاربها
حاربها بالعلم
حاربها بتصنيع أحدث الاسلحة
حاربها بالانتاج
أعد لهم ما استطعت

مش بشاكوش يا معتوه منك له

اتفرجت امبارح علي مراسل القناة الاولي يا عين امه
و هوا بيحاول ينقل الصورة عشان مايقولوش عليهم اعلام حكومي مضلل

المراسل يا عيني كان هيتفعص
حواليه شوية شباب و عيال وشوشهم غريبة
تحس انهم مش مصريين
فرحانين بالكاميرا
و بيتخانقوا علي اللي يظهر ادامها الاول
و بيتخانقوا ع الميكروفون
شوية همج
منظرهم عار
منظر زبالة

هيا دي الثورة يا بلد ؟؟
هما دول اللي راحوا يهدوا الجدار ...؟
لو شوفتهم هيجيلك احساس بالقئ !!!!!!
وشوش سودة مقرفة و اللي مربي شعره
و اللي بيتخانق بهمجية عشان يظهر في التليفزيون


غثاء كغثاء السيل

صدقت يا حبيبي يا رسول الله

شوية عيال بتوع شوارع بيلعبوا طول النهار في الحارة و في الطين
بقوا هما صورة مصر !!!!!!!!!!
الله يرحمك يا مصر

كل قوي الثورة المحترمين بتوع 25 يناير و 26 و 27 و 28
أعلنوا ان مكانتش دي اهداف الثورة

وائل غنيم نفسه قال ... مكونتش بحلم بكده لمصر !!!!!!
السلفيين و الاخوان تبرأوا من يوم 9 / 9
و أعلنوا عدم مشاركتهم
و استغربوا .... ايه هدف اليوم ده ؟؟؟؟

ناس واقفين في التحرير
اتحدي اي واحد في مصر يقول لي ... ايه مطالبهم ؟؟؟
بيهتفوا بايه
عايزين ايه ؟؟؟؟؟

طب انا افهم شوية مدرسين نازلين يطالبوا بحد ادني 1200 جنيه !!
افهمها دي
و ده حقهم و اقل حد للكفاف
و حتي بيني و بين نفسي بقول
يا عيني عليكم ... والله العظيم انتو ناس قنوعة
هما اصلا ال 1200 دول اللي بتطالبوا بيهم

يكفوا شوية عشا بالليل للعيال طول الشهر ؟؟؟؟؟

طب دول نفهمهم ... و طلبهم عادي و عادل و اقل من العادي كمان

انما الناس في التحرير

مطالبهم ايه
عايزين ايه
جريوا زي الغجر ع السفارة ليه ؟؟؟
كده حاربتوا اسرائيل و انتصرتوا عليها ؟؟؟

يا بلد عايزة ولد
راجل يلم الناس دي كلها
و يهزأهم
و يعرفهم يعني ايه أمن مصر
و يعني ايه مؤسسات و يعني ايه دولة و لها هيبة

عصام بيه شرف قال ايه ... ناوي يعمل اجتماع عاجل
و الاجتماع العاجل ده امتي ؟؟؟
النهاردة بعد الضهر طبعا اكيد
بعد ما السادة الوزرا يصحوا من النوم
بعد خراب مالطة


معقولة يا عالم

85 مليون مصري
مافيهومش مصري واحد
عليه العين
يحكم البلد دي؟؟؟


جبتوا فلوس الجدار و الحديد منين يا حكومة ...
دانتو مش لايقين تاكلوا

ايه اهمية بناء الجدار ده يا عقلاء مصر !!!
و ايه قيمة انه يتهد بالهمجية دي يا مصررريين !!!!!!


ليه يتبني و ليه يتهد يا بلد ؟؟؟؟
يا عالم فاضية مش لاقيين حاجة تعملوها
يا ناااااااااااااااااس

عايز اهاجر
حد يساعدني اهاجر

عايز امشي و الله العظيم من البلد دي عايز امشي

لو سافرت عيشت بين شوية حيوانات في غابات الامازون
هبقا مرتاح نفسيا عن كده !!!!
شريف
10-09-2011, 11:30 AM
سؤال واحد عايز أسأله لأى واحد عاقل فى مصر و لسه عنده عقل

ايه وظيفة الشرطة و الجيش في مصر !!!!!!!!!!!
خايفين ليه ؟؟؟ مرعوبين ليه ؟؟؟ ليه يتم اخلاء ميدان التحرير
من الشرطة و الجيش
ليه يتم اخلاء الاماكن الحيوية الهامة في مصر من الشرطة و الجيش
هيا دي ديمقراطية الثورة ؟؟؟
ان لما يكون في مليونية او اعتصام ؟؟؟ الشرطة و الجيش يسيبوا لهم البلد و يمشوا ؟؟؟
طب و انا كمواطن مصري اعيش في امان ازاي في بلدي
في حين ان اي متخلف عايز يعمل اي حاجة بيعملها
اعيش في امان ازاي
ووزارة الداخلية نفسها بيتم الاعتداء عليها !!!!
اعيش في امان ازاي و المؤسسات الحيوية بتتهاجم ؟


يا شوية بهايم ارفعوا ايديكم عن مصر !!!!!!!!!!
ارحموا مصر

اي حيوان يهاجم مؤسسة حكومية يتقبض عليه فورا
ده المنطقي

عايزين مظاهرات ... تبقا مظاهرات سلمية
و يتنيلوا يقعدوا في اي ركن علي اي رصيف يمارسوا هوايتهم

انما يدخلوا مؤسسات و يقتحموها و يخربوا و يحرقوا و يرموا اوراق هامة و تحقيقات
و الجيش و الشرطة بيتفرج!!!!!!!!
ايه الجبن ده
ايه الخوف ده



ما يحدث في مصر
بقا قمة في القذارة



وَإِذَا قِيلَ لَهُمْ لا تُفْسِدُوا فِي الأَرْضِ
قَالُوا إِنَّمَا نَحْنُ مُصْلِحُونَ *
أَلا إِنَّهُمْ هُمُ الْمُفْسِدُونَ وَلَكِنْ لا يَشْعُرُونَ
شريف
10-09-2011, 12:03 PM
1000 مصاب و حالتين وفاة فى احداث السفارة يا شوية مجانين

اسرائيل خسرت ايه و احنا كسبنا ايه يا حبة معتوهين

طيارة عسكرية اسرائيلية في مطار القاهرة

جات عشان تاخد السفير زي الباشا و اعضاء السفارة

و هما حاطين رجل علي رجل

و اولعي يا مصر

خلي شبابك يولع في نفسه يا مصر

ألف مصاب يا مصر

بالظبط زي ما يكون كوهين ضرب حسن بالقلم و مشي

راح حسن جاب سكينة و قعد يعور في نفسه و قطع شرايين ايده ( ايد حسن نفسه )

انتقاما من كوهين !!!!!!!!!!!


آه يا بلد
حبيبه المصريه
10-09-2011, 01:33 PM
انا قريت المشاركه الاولى من موضوعك
هكمل قراية الاجزاء التانيه بعدين
انا كمان جوايا حاجات عاوزه اقولها
زى اى حد تابع اللى حصل وقعدت اتابع لحد قبل الفجر
كنت بمووووووووت من الحسره على اللى بيحصل فى مصر
مش دول المصريين دول شوية بلطجيه على عيال صايعه سورى بقى بس هما كده فعلا مصر بقت شكلها وحش اووووووووووووى بقى دول المصريين
شوية بلطجيه وهمجيه وحيوانات يسوقوها
تخرب وتدمر وتحرق
لمصلحة مين شكل مصر يبقى كده
مش دى مصر ابدااااااا ولا تستاهل كده
انا قلبى بيتقطع على مصر ولا يمكن افكر اسيبها
مهما يحصل فيها
عارفه ان الخراب فيها كتيرررررررررر
وبقينا شعب همجى بس مش كل الشعب
دول ناس اكيد مدفوع ليهم يعملو كده مع شوية شباب من الشعب غير مسئووووووول فاضى ضايع بين البطاله والقهاوى والفراغ ملهومش طموحات ولا مثل ولا قدوه
لقو الاعلام عمال يلمع ويدى شقق ووظايف
ويكرم ورئيس الوزراء يستقبل اللى رفع علم وحط علم
بقى ده الميزان عندهم
الناس دى لو يجندها الجيش
يبقى احسن من انها فى الشارع كده
على الاقل تتربى فى الجيش كان منظر فظيع
الوضع صعب والحمل اصعب على المشير
والكل مش عارف ياخد قرار مع الرعاع دول
والشرطه ووزيرها ملهومش لازمه اصلا
غير ان الشرطه كمان مش راجعه تشتغل زى الاول
عشان تعلمنا الادب
المفروض اللى ميشتغلش ننهى خدمته
ونعين خريجين حقوق مثلا
لو مش عندنا دفعات شرطه
ماهما متلتلين من غير شغل
مفيش حد بياخد قرار حاسم صارم
الكل خايف يتصرف يقولو الثوره والحريه وقمع المتظاهرين وكلام يفضل يرن فى الاعلام الفاسد
ثورة ايه بقى لو اقتصادنا بقى صفر
هتنفعنا الثوره بإيه لو شحتنا ومدينا ادينا لامريكا
والبنك الدولى من الخراب اللى بنخربه فى مصر
فى ناس ليها مصلحه ان مصر متشوفش الاستقرار
ولا تقوم ليها قومه وتتخرب
وللأسف شباب مننا مش فاهم ماشى وراهم الوضع صعب ومش محتاج تهاون عاوزين قرارات صارمه
وناس تقرر وتحقق على ارض الواقع
مهما كان القرار صعب محتاجين نظبط مصر ونحكمها
والا مصر هتضيع مننا
ويبقى باى باى ثوره
باى باى مصر
اكيد ليا رجوع تانى هنا
حبيبه المصريه
10-09-2011, 03:28 PM
لأسف حسنى وحاشيته
كانوا سارقين مصر وناهبينها وخاربينها
واحنا دلوقتى بنعمل ألعن منهم
بنخرب مصر بإيدينا ونهد ونحرق
فرقنا ايه عنهم بقينا افظع
على الاقل هما سارقينها من تحت لتحت
احنا بقى خدنا الوسام عنهم فى الخراب والدمار
والسرقه والنهب
هى الشطاره والجدعنه نوقع علم ونحط علم
ونقتحم مبنى اى ما كان وضعه
يا خيبتنا عاوزين نمحى اسرائيل
نمحيها بتطورنا وتقدمنا
نقدر نعد ليهم زى ما بيعدوا لينا
اسرائيل مش علم وسفاره دى خيبه اس 100
لا وفرحانين ولا كأنهم غزوا اسرائيل
بلا خيبه بتخربوا فى بلادكم بإيديكم
لا وعمالين يحدفوا الامن بالطوب
ولا كأننا بنحدف الصهاينه
فى ايه يا ولاد مصر مش دول اخواتكم برضه
عمالين نضرب فى بعض وكأنهم اعدائنا
مش ولاد بلدنا ايه القرف اللى بقينا فيه ده
الوضع ده لازم يبقى ليه أخر
وبصراحه لازم البلد تتحكم صح
مش عارفه ليه المشير
سايب الوضع عايم كده
خايف يحكم صح يقولوا
من مبارك للمشير الاتنين زى بعض
ونقول حكم العسكر
لا المشير مش زى مبارك
والا كان سمع كلام مبارك وسوى التحرير بالارض
المشير اللى شوية ناس مش محترمه
تطلع تكتب يسقط المشير
مشير مين يا مجانين اللى يسقط ده
اللى بجيشه حماكم بعد الله
من اللى كان عاوز يعمله فيكم مبارك
كان زمانكم زى سوريا
هو مبارك ساب الحكم والكرسى بالسااااااااهل
انا عارفه ان فيه حاجات بتتعمل مش صح
بس احنا عاوزين دلوقتى حكم صح
حتى لو كان الحكم العسكرى
لو الحكم العسكرى هيظبط مصر يبقى اهلا بيه
عاوزين مصر يبقى ليها كبير
ما دام الرعاع دول
اللى يجى على هواه حاجه يعملها
ولاحد يقف قصاده
ايه الهمجيه اللى وصلنالها دى
كل ده من اللين والقرارات العايمه
عاوزين يد من حديد على الهمجيه
والخراب والعشوائيه دى
مش عارفه ليه المشير خايف يمسكها صح
يقولو زى مايقولو المهم مصررررررر
ولا خايف الشعب اللى فضل 30 سنه يتحكم بالقوه
لما يحكمه المشير بالقوه لانه شعب همجى
وفاكر الحريه غلط وهيدمر مصر ويخربها
يثوروا عليه زى مبارك
الشعب ده لازم يتحكم بقى
والا مصر هتضيع
قلبى عليكى يا مصر وعلى اللى بيحصل فيكى
لله الامر من قبل ومن بعد
يا اما الشعب يعقل
يا اما يتحكموا بالحكم العسكرى
مصر امانه ولازم ولاة الامر يحافظوا عليها
حبيبه المصريه
10-09-2011, 03:37 PM
وبقى الموضوع مقرف قوووووووى
كل شويه نسيب بيوتنا وفى الشارع
هو فيه ايه بقى الشارع مكنا الحقيقى
فيه ايه نزهه هيا ولا فسحه فاضيين يوم الجمعه نفكر بقى ونعصر مخنا هنطلع جمعة ايه النهارده ونهتف بقى ونعلى صوتنا والقنوات تصور خيبتنا
بقينا عندنا حساسيه لو مطلعناش جمعه نبقى هنموت ونفكر الجمعه الجايه نطلع ونسميها جمعة ايه هو خلاص الجمعه بقت جمعة المظاهرات وياريتها سلميه الا ولازم ننهيها بخرااااااااب بقينا شعب خايب كلمه توديه وكلمه تجيبه
شريف
10-09-2011, 05:26 PM
بأيدك في كل حرف و شكرا علي مشاركاتك ا / حبيبة

لكِ الله يا مصر
محمد بن عباس
10-09-2011, 08:38 PM
والله يا شريف يا أخى الحبيب فعلا الواحد وصل لمرحلة القرف والحالة السيئة للغاية من ال بيحصل فى مصر

وأنت عندك حق فى كل كلمة كتبتها مفيش موقف قوى من الحكومة مما أدى للمهزلة ال حصلت امبارح

وقرار البيه محافظ الجيزة ببناء الجدار حول السفارة قرار فى منتهى الغباء والوقت مش مناسب خالص

لقرار زى ده

وللأسف الشديد إحنا كمصريين فى طريقنا للقضاء على ثورة 25 يناير التى دقع فيها الشباب أرواحهم الغالية

وبنثبت للعالم إن الديمقراطية فى مصر معناها البلطجية والصياعة وقلة الأدب

وكمان بنثبت للعالم إن حسنى مبارك والداخلية كان عندهم حق لما جكمونا بالكرباج والديكتاتورية
مستر محمد يوسف
10-09-2011, 09:22 PM
ﺍﻟﺼﻬﺎﻳﻨﺔ ﻳﻘﺘﻠﻮﺍ 6 جنود مصريين ﻋﻠﻰ الحدﻭﺩ بين ﻣﺼﺮ و اسرائيل

ﻓﻤﺼﺮ ﺗﺮﺩ ﺑﻜﻞ ﺣﺰﻡ ﻭﺗﻘﺘﻞ 3 ﻭﺗﺠﺮﺡ 1024 ﻣﺼﺮﻳﻴﻦ ﻋﻠﻰ ﺣﺪﻭﺩ ﺍﻟﺴﻔﺎﺭﺓ



والله حاجه تحرق الدم

تقبل مرورى اخى العزيز
شريف
10-09-2011, 09:25 PM
الحريه في يد الجاهـل
كالخنجر في يد المجنون


و دول شباب فى قمة الجهل يا استاذ محمد
امتلكوا فجأة حرية بيفسروها علي مزاجهم

هيهدوا بيها مصر

كل شاكوش كان ممسوك و بيتضرب بيه النهاردة

كانوا بيضربوا بيه في أمن و هيبة و استقرار مصر مش في مجرد جدار

شكرا استاذ محمد نورتني
تسلم ايدك
شريف
10-09-2011, 09:29 PM
شكرا مستر محمد يوسف علي مرورك أخى الحبيب

و الله يا اخي احنا وصلنا لمرحلة من البلاهة و الحماقة لا نحسد عليها

هكذا يفكر شباب مصر للانتقام من اسرائيل !!!!!!!!

ربنا يرحمنا و يرحم مصر يارب
مستر محمد يوسف
10-09-2011, 09:31 PM
لما كل واحد من ال85 مليون يبتدي بنفسه يشتغل بضمير مهما كان مرتبه , ما يخالفش اشارة مرور ولا يكسر على عربية علشان يعدي الاول , يبلغ عن اللي بيطلب رشوة ،ينضف قدام بيته ،يعلم اولاده الادب ،ينتج اكتر ما بيستهلك ، ما يعلقش اخطائه على شماعة حد, يبص لنفسه قبل ما ينتقد غيره ....
لما كل واحد يسقط النظام اللي معشش جواه .. و يبتدي بنفسه .. ساعتها بس حيبقى الشعب فعلا اسقط النظام
نعمه محمود
11-09-2011, 12:18 AM
فعلا أقل وصف انهم همج ومتخلفين وغجر
شوية صيع مش لاقيين حد يلمهم
الله يرحم أيام زمان لما كان التخين منهم بيخاف
يعدى من الشارع اللى فيه القسم
وكان اقل مخبر يجيبه من قفاه
شوية بلطجية على شوية عواطليه
عاملين فيها أبطال
والعيب مش عليهم العيب على
الحاج عصام اللى قابل حرامى غسيل
وكرمه العيب على الميديا اللى شغلانة بقضية
احمد الشحات ولا مصطفى كامل اللى طلع القمر
يوووووه قصدى السفارة
من ساعة مافيلم يا انا يالسفارة ده بدأ
و احنا متفرغين له تماما
هنقول ايه لكى الله يامصر
ياشعب أثبت للعالم انه مايمشيش
غير بالكرباج
الله يسامحك ياشريف كنت خلينا مكتومين احسن
ولا على ايه نتكلم احسن بدل مانطق نموت
مش هقول غير حسبي الله ونعم الوكيل
فى اللى خطفو مصر
lucky 96
11-09-2011, 10:10 AM
ما يحدث فى مصر الان انفلات امنى من الجيش والشرطة
وللاسف نحن نعانى من قلة تحضر وفقدان النظام ... لاننا لم نعلم يوما ما معنى الحرية والتحضر فى ظل وجود النظام السابق
وواضح ايضا من كاتب الموضوع التحضر فى تنقيه كلماته و ألفاظه
فاذا كنت تسعى للتحضر كن انت التحضر لا ان تتحدث بألفاظ نابية ثم تبحث عن هؤلاء المتحضرين ؟؟!!
قام عدد من الشباب امام اسفارة بالتظاهر وتكسير الحاجز الخرسانى ... وهذا من حقنا جميعا
كى تكون صورتنا فى العالم على قدر من الكرامة.. خصوصا تركيا
نحن لن نبنى الحاجز لحماية اسرئيل وتركيا تطرد السفير الاسرائيلى ردا على كرامة التركى
لكن المشكلة الحقيقة ماحدث بعض تكسير الحاجز ... قمة فى الهمج
لكن لا تقولوا لى ان هؤلاء هم شباب ثورة 25 يناير !!
مستحيل ... لان هؤلاء الذن قاموا بتخريب السفارة داخلا واشعال الحرائق فى سيارتين امنيتين واعمال البلطجة هذه
المتسببين فيها بعض البلطجية وليسوا شباب الثورة الحقيقيين
فقط نريد من الجيش والشرطة بأن يزيدوا شدا و ربطا علينا نحن الشعب
لاننا مازلنا لا نعلم معنى الحرية والديمقراطية بما اننا بأذن الله مقبلين عليها
فيجب على الطفل بأن يتعلم المشى ويدان رقيبتان عليه تعلماه كى لا يكون مندفعا او يؤذى نفسه
اما من يريد ترك بلاده فى وقت الشدة بعدما كان ينعم بأمنها وأكلها وشربها فى وقت ما من الزمان
والذى لم يكن ينعم به نصف عدد سكان مصر

أذهب اليهم مهما كانوا القوم المتحضرين هؤلاء الذين تبحث عنهم ... ولكن لا ترجع وتبحث عن مصر
لان وقت ما تكون امك تحتاج المساعدة منك فى وقت شدتها وانت تعطيها ظهرك وتهرب منها عندما تشعر بعدم الامان فهذا هو الابن العاق
لان مهما حدث فى مصر من حروب وغيره لم يهرب ابناءها المخلصين منهم ودافعوا عنها حتى وقفت على قدميها

وشكرا .
حبيبه المصريه
11-09-2011, 12:49 PM
ما يحدث فى مصر الان انفلات امنى من الجيش والشرطة
وللاسف نحن نعانى من قلة تحضر وفقدان النظام ... لاننا لم نعلم يوما ما معنى الحرية والتحضر فى ظل وجود النظام السابق
وواضح ايضا من كاتب الموضوع التحضر فى تنقيه كلماته و ألفاظه
فاذا كنت تسعى للتحضر كن انت التحضر لا ان تتحدث بألفاظ نابية ثم تبحث عن هؤلاء المتحضرين ؟؟!!
قام عدد من الشباب امام اسفارة بالتظاهر وتكسير الحاجز الخرسانى ... وهذا من حقنا جميعا
كى تكون صورتنا فى العالم على قدر من الكرامة.. خصوصا تركيا
نحن لن نبنى الحاجز لحماية اسرئيل وتركيا تطرد السفير الاسرائيلى ردا على كرامة التركى
لكن المشكلة الحقيقة ماحدث بعض تكسير الحاجز ... قمة فى الهمج
لكن لا تقولوا لى ان هؤلاء هم شباب ثورة 25 يناير !!
مستحيل ... لان هؤلاء الذن قاموا بتخريب السفارة داخلا واشعال الحرائق فى سيارتين امنيتين واعمال البلطجة هذه
المتسببين فيها بعض البلطجية وليسوا شباب الثورة الحقيقيين
فقط نريد من الجيش والشرطة بأن يزيدوا شدا و ربطا علينا نحن الشعب
لاننا مازلنا لا نعلم معنى الحرية والديمقراطية بما اننا بأذن الله مقبلين عليها
فيجب على الطفل بأن يتعلم المشى ويدان رقيبتان عليه تعلماه كى لا يكون مندفعا او يؤذى نفسه
اما من يريد ترك بلاده فى وقت الشدة بعدما كان ينعم بأمنها وأكلها وشربها فى وقت ما من الزمان
والذى لم يكن ينعم به نصف عدد سكان مصر

أذهب اليهم مهما كانوا القوم المتحضرين هؤلاء الذين تبحث عنهم ... ولكن لا ترجع وتبحث عن مصر
لان وقت ما تكون امك تحتاج المساعدة منك فى وقت شدتها وانت تعطيها ظهرك وتهرب منها عندما تشعر بعدم الامان فهذا هو الابن العاق
لان مهما حدث فى مصر من حروب وغيره لم يهرب ابناءها المخلصين منهم ودافعوا عنها حتى وقفت على قدميها


وشكرا .



مهلا مهلا أيها العضو الجديد بيننا
أنت جديد بيننا كما هو ملاحظ إن لم يكن غير ذلك
نحسن الظن بالأخرين إلى أن يظهر أمرا آخر
وعليه فلا يمكنك الحكم علينا
وعلى صاحب الموضوع من موضوع واحد
فلتبحث عنا عبر موضوعاتنا قبل أن تصدر أحكامك

صاحب الموضوع وطنى جدا أكثر منا
يتحدث صاحب الموضوع بلغة الشارع العادى
بما تحتويه من ألفاظ وعبارات دارجه
ربما البعض لا يستحسنها
لكنها فى النهايه لا تتعدى الخطوط الحمراء

لكنا نلتمس له العذر لأننا نعلم أن كلماته نابعه من حبه
لهذا الوطن وغيرته الشديده على ما يحدث فيها
من خراب ودمار
نلتمس له العذر لأننا نعرف جيدا
من هو مستر شريف راغب
فموضوعاته تتحدث عنه قبل أن نتحدث نحن
وإليك بعض من فيض قلمه فلتطلع عليها

فى حب معشوقته مصر يتحدث

(You can see links before reply)تعدو الذئاب على من لا كلاب له (You can see links before reply 8%A7%D8%A7-%D8%A8%D9%82%D8%A7%D8%A7%D8%A7)

سئمنا من تشتتنا وكل الناس تتكتل (You can see links before reply)

ثم لماذا حضرتك لم تسلط الضوء
على الجانب الايجابى منها ؟؟

وهو أعتراضه على ما يحدث فى بلاده
من فوضى ودمار وخراب
لنرى الصوره من الجانبين لا من جانب نقدى واحد
أما بالنسبه لترك البلد
ليس صاحب الموضوع من تلك النوعيه بتاتا
عباره خرجت منه فى حالة ضيق
مما يحدثه المخربين بمصر
ولسنا ممن يقف عند ما يخرج فى لحظات الضيق
لأننا جميعا وببساطه نعرف بعض جيدا
ونستطيع أن نفرق بين ما يخرج من القلب
وما يخرج من اللسان

مبدأى ونصيحتى لك وللجميع
فلتبحث عنا وعنه أولا من موضوعاته وموضوعاتنا
ثم نحكم بعدها على الأشخاص الحكم الصائب

تحياتى لك
شريف
11-09-2011, 03:08 PM
شكرا يا نعمة علي ردك تسلم ايدك
بأيدك جدا
و نصيحتي ليكي
اتكلمي
ماتسكتيش

الكل بيتكلم
الناس اللي علي باطل بتتكلم

يبقا الناس اللي علي حق تسكت ؟؟؟؟ معقولة
شريف
11-09-2011, 03:09 PM
عاجز عن الشكر أختى الغالية استاذة حبيبة على حسن ظنك بى
ربنا يبارك فى عمرك و يجازيكى عنا كل خير

دائما و أبدا انتى أجدع أخت و بمليون راجل
لو اتكلمت عن نفسى و رديت على أخينا الفاضل
مكونتش هقول أكتر من اللى حضرتك قولتيله

ربنا ما يحرمنا منك
و من جدعنتك و حسن ظنك بالناس
و مخك الكبير فى استيعاب الكلمات و العبارات التى تخرج وقت الغضب
برغم ان القضية ليست مجرد ساعة غضب
و برغم ان رد حضرتك كافى جدا
إلا اننى اطلب من حضرتك تسمحيلي أرد على أخى الفاضل
احتراما له ... و كمان لاني متوقع رد زي رده في الموضوع
و إذا كنت بالجرأة اني اكتب موضوع زي ده
يبقا اكيد لازم يكون عندى شجاعة ادبية في الرد علي المختلفين في الرأي
تسلم ايديكي
شريف
11-09-2011, 03:20 PM
ردا علي الاستاذ lucky 96 مش هختلف معاك ان الموضوع اسلوبه قاسى جدا
لكن ده من وجهة نظري ... رد الفعل الوحيد المناسب لما حدث
لو كتبت موضوع عن القضية دي بعد سنة ... برضه هكتبها بنفس الاسلوب
لو شوية الشباب دول هيردعهم و يوقفهم عند حدهم انهم يتشتموا و يتهزأوا
و يتضربوا كمان ... عشان أمن مصر ومصلحة مصر العليا
فأنا جاهز انا و غيري نعمل كده ... معنديش اي مشكلة ..القسوة أحيانا هي العلاج الناجع
دول شوية عيال 19 سنة و 20 و 22 سنة ماينفعش العيال دول يبقوا هما صورة مصر !!!
بختلف معاك في معني التحضر و الحرية !!!!!! حضرتك فاهم التحضر و الحرية غلط
مش حرية انهم يشتموا الشرطة والجيش بالام و الابنة و الاخت بأقذر الالفاظ
مش تحضر انهم يتعاملوا بغوغائية و كل واحد عايز يعمل حاجة يعملها , مش حرية أبدا انك تحرقلي عربيتي
مش حرية انك ترمي طوب يكسرلي ازاز بيتي ومش حرية و لا تحضر انك تقتحم مكان أيا كان علي ارض مصر
و ترمي ورق او تحرق او تسرق !!! في عرف القانون الدولي و حقوق الانسان ... دي بلطجة مش تحضر و لا حرية
فضلا عن الاديان حتي البوذية و الهندوسية منها !!!!!! تتحرق الحرية اللي بالشكل ده
حضرتك بتقول اني بنعاني من قلة التحضر !!!!!
طب هوا الهدم و الاقتحام و سب الجيش و حدفهم بالطوب ... تحضر ؟؟ مش ده بالظبط اللي حصل؟
و موضوعي ده رد فعل علي اللي حصل؟؟ ولا انا بتكلم علي ناس تانية ؟؟؟
حضرتك معتبر ان التحضر و الحرية ان الناس تتظاهر فتعتدي علي املاك الاخرين ؟؟؟
الالفاظ النابية اللي في موضوعي ... مقصدش بيها متظاهرين محترمين تظاهروا سلميا و مشيوا في هدوء
انا موضوعي قاصد بيه ... شوية البلطجية اللي بيهيصوا في الهيصة و اللي بيخربوا البلد و يعتدوا علي ممتلكات الناس
و اذا كان التحضر ... اعتداء علي الاخرين يولع , حضرتك بتقولي : اذا كنت تسعي للتحضر
لا يا فندم ... انا لا اسعي للتحضر , مش عايز التحضر اللي من النوع ده
و ما طالبتش بيه في موضوعي , انا عايز امن و كرامة و هيبة مصر
انا عايز شباب واعي يعرف ايه فعلا اللي يفيد مصر , انا مش عايز اصابات بالالاف
انما التحضر ده ... لا ... لا يعنيني في شئ و اسمحلي أسألك بنفس منطقك !!
ازاي حضرتك شايف ان شوية البلطجية دول حريتهم انهم يهدوا و يقتحموا و يولعوا في البلد
و مستغرب اوي ان في موضوعي يوجد الفاظ نابية !!
طب ما تطبق نظريتك في التحضر و الحرية عليا انا كمان !!!!!
مش هما احرار و ده حقهم ؟؟؟ أنا كمان حر ... أقول اللي انا عايزه مش كده ؟؟؟
مش هوا ده التحضر اللي حضرتك بتقول عليه و اللي الشباب دول عايزينه ؟؟؟
أحرام علي بلابله الدوح حلال للطير من كل جنس ؟؟؟؟؟؟؟ يعني حلال ليهم يخربوا مصر
و حرام علينا نشتم !!!! هوا التحضر و الحرية دي ليها ناس ناس ؟؟؟؟
انت حضرتك سمعت و شوفت هما كانوا بيشتموا الشرطة و الجيش ازاي
مصر مش لعبة في ايديهم أمن مصر مش لبانة في بقهم
ألفاظ ايه النابية اللي احنا زعلانين منها و مش زعلانين علي بلد بتتحرق !!!!!!
و دولة اقتصادها بينهار و خراب علي جميع المستويات !!!!!!!!!
أحيانا بقول لنفسي العيب مش عليهم العيب علي اللي بيشجعهم و عامل منهم ابطال
و الله يا استاذ ... لو عربية حضرتك كانت تحت السفارة وقتها و كنت بتجيب حاجة من كشك سجاير
و رجعت لاقيت العربية متفحمة و محروقة أو بنتك كانت موجودة في الشارع ده بالصدفة وقتها
و اتأذت لا قدر الله كنت هتغير رأيك تماما أما بالنسبة للهجرة من مصر و الخروج منها
فده مجرد تعبير عن حالة الحزن و الغضب اللي بتجتاح كل واحد حريص علي البلد دي
و قلبه محروق عليها ,, اعتبرها استعارة مكنية مش هلم هدومي و شنطتي و احجز و اسافر و اهاجر يعني !!!!!!!
الحمد لله انا كنت من الناس اللي وقفوا في الثورة أيام ما كانت ثورة محترمة !!!!
مش محتاج حد يزايد عليا و يقول اني ههرب من البلد و مش هتحمل مسئوليتي
لو انا من النوع ده مكونتش كتبت موضوعي ده و قلبي محروق ع البلد
غريب اوي اننا نسيب الموضوع الاصلي و القضية المهمة اللي بتتناقش فيها
و نمسك في فروع و جزئيات

نورت الموضوع
lucky 96
12-09-2011, 11:52 AM
أتوجه اولا بالشكر ل( حبيبة المصرية ) وأقول اننى لم اشك فى وطنية الاخ الكريم شريف ابدا
لكنى كنت مستاء قليلا من ألفاظه فى الحديث عن هذه الاحداث الاخيرة لانى اعلم تماما بأن اى شخص اخر غير وطنى لم يكن يلق بالا اصلا بالاحداث الخطيرة الجارية
ولكن اظن بانك تستطيع التعبير عن شعورك بشكل افضل استاذ شريف اليس كذلك ؟؟

ومن منا لا يخرج عن شعوره انا اكن له العذر التام يبدو انه يعانى ايضا بشكل واضح
ومن منا لا يعانى من ما يحدث الان ,, اختى ؟؟
ولكن انا لم اسبه او اسىء به الظن ابدا !!
ومن قال هذا انستى الكريمة ؟؟
على العموم شاكر لكى حديثك معى جزيل الشكر

...

الاستاذ شريف
لا اعلم لما اساء بى الظن الجميع !!
اتمنى ان تراجعوا كلامى مرة اخرى
لا طبعا طبعا اخى هذا لا يسمى تحضرا ابدا
انا كنت اقول بأن تكسير الحاجز الخرسانى من حقنا جميعا والذى لم يكن له داع من الاساس لبناءه
ضايقنى قليلا بناءه الذى استغرق تقريبا اقل من اسبوع ,, اما اذا طالب بعض الاهالى بتصليح اى مشكلة لديهم فى الحى مهما كانت صغيرة
ينتظرون سنوات وسنوات حتى يتكرم اى احد من المسئوليين للمساعدة وقليلا ما تحدث

من قاموا بالحرق والسلب والنهب فى احداث السفارة فهم بعض البلطجية اما من قاموا بالتظاهر سلميا بشكل حضارى بدون اى اساءة بالالفاظ او بالافعال تجاه اى مسئول
فهذه هى الثورة الحقيقية
اؤكد لك اخى الكريم بأن نظرتك لى كانت بشكل خاطىء تماما وبناء عليها بنيت كلامك نحوى

اما بالنسبة للهجرة من مصر وعن هذا الكلام
فهذا الكلام لا يقال ابدا عن بلادنا مصر ولكنى كنت متيقن بأن هذا الكلام ليس كلام قلبك الحقيقى
عموما كنت اقول هذا الكلام لك حتى تقول لى بالفعل بانه ليس ما اريده حقا
اما عن الموضوع الاصلى فأنا معك بشكل جزىء تقريبا
وشكرا لك مرة اخرى وبارك الله فيك .