حسبي الله ونعم الوكيل

[ombody]

السلام عليكم ورحمه الله وبركاته
حسبي الله ونعم الوكيل الف مرة علي كل ظالم
انا متعاقدة من 2004 يعني من سبع سنين
ولما قالوا معلم مساعد واختبارات الكادر مدخلتش بسبب الدبلومة التربوي والله العظيم تعبت فيها وربنا شاهد ودفعت دم قلبي من قوت عيالي والحمد لله نجحت وشفت النتيجة بنفسي ولما رحت اعمل استخراج الشهادة الموقتة قالولي انتي شايله مادة من الترم الاول ازي ياجماعة انا شيفاها بنفسي والله العظيم شيفها بنفسي ناجحة والتقدير جيد رحت لعميد الكلية يقولي الخطأ وارد وادخلي الامتحان في شهر خمسة اللي جاي انا ذنبى ايه في الخطأ يعني لسه استنه سنه كمان علشان امتحن والنتيجة تبان
وحتي لو كنت شايله مادة من حقي اعرف في وقت ظهور النتيجة كنت عرفت ادخل في الدور الثاني
انا مش عارفه اعمل ايه بالله عليكوا حد يساعدنى يقولي اعمل ايه
حسبي الله ونعم الوكيل

[طه عرب]

لله الامر من قبل ومن بعد

[سيف رسول الله]

هام جدا لتنفيذ طلبات التعيين لكل المتعاقدين تربية وتعليم وازهر ارجو التثبيت للأهمية




ياجماعة بعتنا فاكس للوزير لتنفيذ هذه المطالب فيجب الدخول وتوقيع الاسم بالله عليكم لا تترددوا
You can see links before reply


بيان تغيير الظلم

تاريخ الظلم:

لقد قال أحد الزملاء كلمة أعتقد أنها وافية لسرد ماحدث لنا :
لقد تعرض المعلمون المساعدون لكل أنواع الاهانة التي يمكن أن يتخيلها بشر ، فالكثير منهم اضطر للاستدانة و البعض الآخر باع شبكة عروسه ، و ذلك كله بهدف تغطية نفقات الحصول علي الدبلومة التربوية اللازمة للتعيين ، و بعدها تم اختراع موضوع شهادة Icdl ، ليس لهدف سوي تعطيل تنفيذ القانون ، و لقد انصعنا للامر الواقع و قلنا " آمين ".
و بعد أن كان المطلوب هو النجاح في أربعة موديولات فقط " أربعة امتحانات " ، عندها اكتشف السادة المسؤلون الجهابذة أن مخططهم لم يكبح جماح شباب المعلمين ، فذادوا الموديولات " الاختبارات " الي سبعة كاملة .
و لكن هيهات لهم أن يوقفوا النهر عن الجريان ، لقد اجتاز الآلاف من شباب المعلمين الاختبارات ليحققوا رقما قياسيا لم تحققه أي وزارة أخري .
و جاءت النهاية ، و نضبت الحيل ، فأخذ السيد الوزير الأسبق / احمد ذكي بدر .. يستخدم حيلة التسويف و التأجيل مرة بحجة أن الأوراق و المستندات تتم مراجعتها ، و مرة بحجة أن هناك بعض " القلة المندسة " التي قامت بتزوير أوراقها ، و مرة ......... تجر مرة ......
الي أن قامت الثورة
و استيقظت مصر
و فر الجبناء الفاسدون
و هبت رياح التغيير
و أخيرا هلت قرارت التعيين
و لكن .. و يالها من كلمة تقتل كل أمل و حلم
بدأت اللعبة من جديد
تم الاعلان عن أن رسائل التهنئة سوف ترسل لكل من استوفي أوراقه
و جاءت الرسائل بالفعل و لكن لبضع مئات
و الأغلبية الساحقة لم تجد شيئا
و تم ارسال أسماء من ستم تعيينهم الي الادارات التعليمية
و لكن ....
أين بقية الأسماء ، و هم قد استوفوا كل أوراقهم ، لدرجة أنني كنت عندما أشتري جريدة " جرنال " كنت أختمها بختم النسر و أحتفظ بها لعل جهابذة الأكاديمية يطالبونني بصورة منها شرط تكون "طبق الأصل"
لقد اكتشفنا أننا قد وقعنا ضحية موظف / ة مستهتر / ة
و لكن ما ذنبنا نحن !!!
انني أحذر من انفجار وشيك ، و ثورة ربما لن تكون سلمية تماما
اللهم و قد بلغت
اللهم فاشهد


مطالب تغيير الظلم كالآتي:
1-تثبيت جميع المعلمين المساعدين الذين استوفوا شروط التعيين فورا أسوة بزملائهم، وعدم الانتظار والتسويف الذي اعتدنا عليه من الحكومة
2-إلغاء شرط ال ICDL
3-التثبيت الفوري لكل من أمضى 3 سنوات بناءا على قرار رئيس الوزراء حيث أننا لسنا أبناء البطة السوداء ، تم تثبيت جميع المؤقتين الا المعلمين !!! هل لأننا أبناء البطة السوداء أم لأن قدرنا أن نكون معلمين في هذه البلد؟!


سوف يتم التجمع على حسب المحافظة والارسال عبر الايميل او التليفون ما سوف يتم فعله

عزيري المعلم السامي والعظيم كن ايجابيا وشارك في بيان تغيير الظلم :

[سيف رسول الله]

هنا الحل بفضل الله نتوحد حتلى يتم الغاء قانون الاكاديمية الظالم وعلى فكرة بقانون مصر للعملين نتعين بزيادة قانون الكادر هنقف محلك سر الخلاص في اسقاط هذا القانون الظالم يا جماعة احنا اسقطنا نظام ورئيس فاسد مش هنقدر على قانون يالله ادينا في بعض هنغير ونعيد كرامة المعلم
هام جدا لتنفيذ طلبات التعيين لكل المتعاقدين تربية وتعليم وازهر ارجو التثبيت للأهمية




ياجماعة بعتنا فاكس للوزير لتنفيذ هذه المطالب فيجب الدخول وتوقيع الاسم بالله عليكم لا تترددوا
You can see links before reply

[ombody]

هنا الحل بفضل الله نتوحد حتلى يتم الغاء قانون الاكاديمية الظالم وعلى فكرة بقانون مصر للعملين نتعين بزيادة قانون الكادر هنقف محلك سر الخلاص في اسقاط هذا القانون الظالم يا جماعة احنا اسقطنا نظام ورئيس فاسد مش هنقدر على قانون يالله ادينا في بعض هنغير ونعيد كرامة المعلم
هام جدا لتنفيذ طلبات التعيين لكل المتعاقدين تربية وتعليم وازهر ارجو التثبيت للأهمية




ياجماعة بعتنا فاكس للوزير لتنفيذ هذه المطالب فيجب الدخول وتوقيع الاسم بالله عليكم لا تترددوا
You can see links before reply





جزاك الله خيرا
انا سجلت اسمي يارب يكون بفايدة

[مدرسة علوم]

قدمى تظلم لرئيس الجامعة
و لو ماردش عليكى فى نفس اليوم
قدمى التظلم مباشرة لوزير التعليم العالى
و معلش سؤال بعد اذنك
هى كلية ايه حضرتك ؟؟؟؟؟؟؟؟؟؟

[ombody]

قدمى تظلم لرئيس الجامعة
و لو ماردش عليكى فى نفس اليوم
قدمى التظلم مباشرة لوزير التعليم العالى
و معلش سؤال بعد اذنك
هى كلية ايه حضرتك ؟؟؟؟؟؟؟؟؟؟
هي كلية التربية بدمنهور
بس للاسف انا مش معايا ما يثبت اني ناجحة
النتيجة اتعلقت شفتها وبعدين شالوها

[دعاي]

اللهم اضرب الظالمين بالظالمين واخرجنا منهم سالمين

[Mr:M.Kamal]

هي كلية التربية بدمنهور
بس للاسف انا مش معايا ما يثبت اني ناجحة
النتيجة اتعلقت شفتها وبعدين شالوها

اعملى كل اللى فى وسعك ولا تستسلمى ابدا قدمى التماس او طلب الى اى جهه تمكنك من اداء الامتحان

[sally2009]

لا يمكننى الا قول حسبنا الله ونعم الوكيل....لابد من الغاء الشروط التعجيزيه للتعيين ...وتعيين جميع المعلمين المساعدين الذين هم على رأس عملهم بدون شروط فهذا حقنا جميعا

[شموع]

يا جماعة حرام عليكم
لو سمحت اللى كتب التظلم دة لازم يكتب فية الغاء التربوى
فى ناس خبرة اكتر من 5 سنين وخرجين اداب
الظروف الصعبة والمرتبات الضعيفة منعت الناس من عمل الدبلومة
أرجوكم اكتبوا الشرط دة
لو سمحتم من فضلكم لازم تكتبوة

[شموع]

على فكرة واللة سهل ومقدور علية
الصعب فعلا هو الدبلومة
لازم ياجماعة تتلغى أرجوكمicdl

[مدرسة علوم]

الزميلة / شموع

مع احترامى الشديد للزملاءغير التربويين
يا جماعة احنا لينا زملاءنا خريجين تربية و من اوائل الدفعات
و من غير زعل انتم واخدين مكانهم اللى فى مكتبات و اللى فى وسائل
ببساطة احنا خريجين تربية
يعنى مالناش شغلة الا التدريس
يا جماعة ..
ده فيه مهندسين و خريجى علوم بيشتغلوا وسائل و لما ييجوا يتكلموا يقولولنا ده احنا هندسة و اللى يقول لك ده احنا علوم متخصصين يعنى المفروض هم يدرسوا رياضة و كيمياء و احياء و فيزياء بدلنا و احنا نمسك وسائل
؟؟؟؟؟؟؟؟؟؟؟؟؟
بيتهيالى مش صعب ابدا انكم تفضوا سنة واحدة بس علشان تتعينوا فى مكان ناس ذاكرت اربع سنين تربوى و على الاقل سنتين تربية عملى على حق ربنا علشان تتعين و فى الاخر ماتعينوش
ده انتم يا جماعة سنة واحدة بس تربية عملى
و اذا كان على المصاريف اللى حضرتك بتتكلمى عنها
فاحمدى ربنا ان المصاريف دى اخرتها خير ان شاء الله على عكس ناس صرفت و مالاقتش
و كمان يا جماعة انتم تربية كانت قصادكم لكن فضلتم كليات تانية


و احنا اللى قبلنا الكلية و دخلناها على الرغم ان مجاميع كتييييييييير فينا كانت تجيب
اداب و تجارة و علوم و كمان هندسة و كليات كتير
و فى النهاية فيه ناس غير تربويين اتعينوا قبلنا و احنا تربويين قاعديين
يعنى هاييجى اليوم اللى هالاقى فيه واحد غير تربوى مترأسنى على الرغم ان فى الاصل دى مهنتى بدون منازع
ده غير انى انا اللى باشرح المواد الاساسية و يتحرق دمى فى الفصل و متحملة نتيجة و خصوصا لو شهادة
و ييجى بعضكم نديلو حصص احتياطى و لا اشراف يقول لنا لا الموجه بتاعى محرج عليا احنا مابنخدش الحاجات دى
و انا بخص بالكلام اخصائى التشغيل و الخدمة الاجتماعية و الوسائل
ده وصلت بيهم انه لما بيتقالهم خدوا حصة امن
يقولوا ليه هو احنا بوابين
و فى النهاية يا جماعة ساعة القبض كلنا اللى نفس التعيين بنقبض زى بعض


لوسمحتم يا جماعة مراعاة شعور خريجى تربية لاننا فعلا على اخرنا

[ombody]

المشكلة دلوقتي مش المفروض اخدها ولا لأ انا بالتكلم في الظلم لو انا فعلا مستحقش النجاح كانوا قالوا من الأول كنت دخلت في الصيف وانتهي المشكلة لكن دلوقتي وانا في امس الحاجة للشهادة يقولي لا انتي مش ناجحه وعلي فكرة انا مش لوحدي اكتشفت في ناس كتير زاي
ولو التربوي كان شرط اساسي كانوا قالوا قبل التعاقد من سبع سنين اثناء التعاقد عرفين اني مش خريجة تربية وبعد ست سنين اكتشفوا انها شرط اساسي
وفي حاجة كمان السنة التربوي اللي كانت قبلي كانت المصاريف 380 جنيه لما عملوها شرط اساسي كانت المصاريف 1400 جنيه غير الكتب والابحاث
بالله عليكي دا يرضي ربنا
حسبي الله ونعم الوكيل

[شموع]

الزميلة /مدرسة علوم
كلامك على عينى وعلى راسى بس أولا مفيش حد غير تربوى جالة تعيين
ثانيا خريجى أداب لما بيقدموا فى الادارة بيتوزعوا حسب العجز
يعنى انا مثلا خريجة تاريخ وعينونى رياض أطفال
وزى ombody ما قالت هما اكتشفوا اخيرا بعد السنين دى كلها أهمية التربوى
والخبرة اللى خدناها دى كلها
واللة لى زميلتى بقالها 10 سنين بالظبط وعملت التربوى السنة اللى فاتت وعندها ولد فى المدرسة وزوجها متوفى واقسم باللة العظيم ما كانت لاقية فلوس تصرف على ابنها اليتيم
وجاتلها الغدة ومعهاش فلوس العلاج
دة غير ناس تانية كتير
وكمان أداب 4 سنين زى تربية بالعكس احنا دراستنا أكاديمية أكتر
يعنى كلنا فى الهوا سوا ولازم نراعى شعور بعض
وبالنسبة للمدرسين عندك اللى مش عايزين يدوا حصة ويقعدوا أمن دة مش أساس نبنى علية الموضوع
دى مواقف شخصية وفردية
فى مدرستى كلة بيشتغل وبيساعد سواء اداب ولا تربية ولا حتى دبلوم
ربنا يسهلنا حالنا كلنا
وتقبلى تحياتى

[مدرسة علوم]

استاذة شموع /


مافيش حاجة اسمها حالة فردية لان ده فعلا اساس لان قانونا ممنوع ان الاخصائى ياخد حصص احتياطى او امن او اشراف لكن يمكن ربنا كرمكم باناس افاضل بيقدروا النعمة اللى ربنا من عليها بيهم
لكن فيه ناس ربنا يهدينا و يهديهم متمسكين بحقوقهم لاقصى درجة هم و موجهين مادتهم و على فكرة ده الاكتر مش الاقل و لو فيهم حد اخد حاجة من اللى فاتت ده بيكون على اساس انه بيمن علينا

لكن لاننا لينا زملاءنا و اصدقاءنا الغير تربويين
ساكتين على حقوقنا كتربويين مراعاة لشعورهم و ان المفروض لينا وضعنا فى الوزارة


يعنى لو مهندس بترول و محاسب بيشتغلوا الاتنين فى شركة بترول
اكيد هايكون للمهندس وضعه لانه فى مكانه الطبيعى اللى دخل الكلية و تعب فيها علشان المكانة دى


و اعذرينى انى اقول لك ان حالة زميلتك الانسانية امامها حالات انسانية كتير جدا
فلو سمحتى لى ان اقول لحضرتك ان لى زميلتى من الاوائل على الدفعة و والدها و والدتها مرضى لابعد الحدود و اخوها المعيل للاسرة صياد بسيط جدا و لما اتقدمت لوظيفة اخصائى وسائل رفضوها و قبلوا كلية علوم و هى فى حاجة ماسة للفلوس
فاضطرت انها تشتغل فى محل لبيع الملابس و احنا طبعا كلنا عارفين ان الشغل الطيب مهما كان فين بنحترمه مادام بيحفظ للانسان لقيماته
لكن اهى صورة انسانية لتربوية مااخدتش حقها بسبب شخص غير تربوى اخد مكانها على الرغم ان ممكن خريج هندسة او علوم الل فى الوسائل انه شهادته تؤهله لعمله الاساسى لكن احنا بتوع تربية نشتغل ايه غير مدرسين


و كمان موضوع التربوى ده معروف من زمان من ساعة مالجاوا لكليات اداب و علوم لسد العجز و لكن كان على شرط استكمال التربوى بعد التعيين لكن الناس طنشت و العملية مشيت كالعادة على الرغم ان عندنا فى السويس فيه ناس كتير عاملين التربوى من ساعة المكافاة الشاملة



و كمان حضرتك بتقولى اننا كلنا درسنا اربع سنين
معلش مع احترامى .. لو مثلا تم الغاء الدبلومة و حضرتك حبيتى تترقى فى المناصب ممكن تكملى ماجستير بصورة مباشرة
لكن لو حبيت انا اكمل ماجستير لازم اخد سنتين و بعد ما اصرف دم قلبى و يتهد حيلى ابقى افكر فى الماجستير لو فضل فيه نفس


و اسمحى لى اقولك كانت قصادكم تربية و انتم اختارتم كلية تانية و احنا اللى اتحملنا وصمة تربية زى مابيقولو لاننا كلنا عارفين ان كلية تربية فى منظور العالم الجامعى هى اقل الكليات شأنا
و كمان حضرتك بتقولى بالعكس اننا اكاديمى اكتر ..
طيب لم حضرتك دخلتى الكلية الاكاديمية كان فى ذهنك انك هاتشتغلى ايه
طبعا مش مدرسة لانك لو كنتى فكرتى فى مدرسة كنت دخلتى تربية


واسمحى لى اقولك انه علشان الاكاديمى بقى فيه كلية تربية لان الطالب مش محتاج دراسة اكاديمية بحتة الطالب محتاج اللى يبسط له المادة
و ده اللى احنا ادربنا عليه فى الكلية و دى المواد التربوية اللى اسمحى لى انى اقول اننا عكسكم طبقنا جزء كبير جدا منها لاننا على الاقل قضينا سنتين تربية عملى
ولان الدراسة الاكاديمية البحتة ليها مجالاتها الاخرى اللى ممكن تطبق فيها لكن على غير الطلاب طبعا


و طبعا ده كله كلام و حوار بينا لان احنا فى الاخر زملاء فى مهنة واحدة

[مدرسة علوم]

يا استاذة ombody/
علشان كده قلنا لحضرتك ترفعى طلب لعميد الكلية و الاحسن لرئيس الجامعة و كمان احمدى ربنا مابقتيش لوحدك يعنى انتى و زملائك ممكن تقدموا الشكوى بصورة جماعية
و بيتهيالى فى ظل الظروف دى ماحدش هاريفض لكم طلب ان شاء الله

و بخصوص التربوى و لا المصاريف ده مش وقته ماتضيعيش الوقت و اتحركى بسرعة و ان شاء الله ربنا هايوفقك

[شموع]

انا بحترم رأيك /مدرسة علوم
بس هى بلدنا كدة وصدقينى أنا كان نفسى ادخل تربية بس وقفت معايا على درجتين:25:ههههههههههه
الحمدللة يا ستى كلنا اخوات وظروفنا واحدة
أنا خريجة حديثة ومعرفش ان موضوع التربوى دة من زمان
وانا فعلا كنت مقدمة على الماجستير بس ربنا ماكتبهاش ليا
الخيرة فيما اختارة اللة
ربنا يوفقنا كلنا
وتقبلى اعتذارى لو أسأت ليكى فى حاجة
شكرا

[ombody]

يا استاذة ombody/
علشان كده قلنا لحضرتك ترفعى طلب لعميد الكلية و الاحسن لرئيس الجامعة و كمان احمدى ربنا مابقتيش لوحدك يعنى انتى و زملائك ممكن تقدموا الشكوى بصورة جماعية
و بيتهيالى فى ظل الظروف دى ماحدش هاريفض لكم طلب ان شاء الله

و بخصوص التربوى و لا المصاريف ده مش وقته ماتضيعيش الوقت و اتحركى بسرعة و ان شاء الله ربنا هايوفقك
ياجماعة الموضوع دلوقتي مش المفروض ادخل تربوي ولا لأ
انا كل يوم بروح الكلية ولقيت ناس كتير زي وكمان في ناس استخرجت إفادة بالنجاح وراحت تطلع الشهادة لقت نفسها شايلة مواد
بالله عليكوا دا يرضي مين
المهم عميد الكلية قالنا انهم حيعيدوا تصحيح الاوراق بتعتنا ونسأل بعد اسبوع وربنا يسهل
بالله عليكوا تدعولي
وحسبي الله ونعم الوكيل