موسم المتحولون

[نعمه محمود]

نعم هذا هو موسم المتحولون فكثير من البشر تحولوا فجأة ودبت فيهم عروق الوطنية رغم أنهم هم من كانوا يرقصون طربا للنظام يوما ما .عديد من الشخصيات العامة تحولوا من النقيض للنقيض وبعد أن كانوا يتغنوا بالنظام والرئيس أصبحوا فجأة من المصلحين فى الأرض .أتعجب عندما أرى أشخاصا كانوا بالأمس هم أنفسهم أدوات النظام التى كانت تنكل بالشعب واليوم أصبحوا أبطالا وطنيين ينادون بالاصلاح واين كنتم من هذا الاصلاح عندما كنتم مليء السمع والبصر هل تذكرتموه الآن أم أنتم تحاولون الحاق بآخر موجة .أقولها بصوت جهور آسفة لم أعد احترمكم
الأمر لايقتصر فقط على الشخصيات العامة بل الجميع أصبح يبحث له عن دور والغريب أنهم يحتكرون الرأى لأنفسهم وعندما نقول أنه لايصح إلا الصحيح وأن مازاد عن حده انقلب إلى ضده نتهم بالعمالة والخيانة والثبات على الرأى أصبح سُبة وأصبح السائد هو التخوين والاتهام بالعمالة للأسف فقدنا حتى القدرة على الحوار الراقى وأصبح كل شخص يسمع لوجهة نظره فقط
وفى النهاية تبقي مصلحة مصر فوق كل اعتبار ولابد أن نتخلص من لهجة الشماتة التى تمتلىء بها أحاديثنا الآن
دمتم لمصر ذخرا وأمانا

[عادل أبوجليل]

الأخت الفاضلة الناس شئنا أم أبينا ثلاث طوائف : طائفة مع الحق وطائفة مع الباطل وطائفة تنافق الأقوى

[نعمه محمود]

الأخت الفاضلة الناس شئنا أم أبينا ثلاث طوائف : طائفة مع الحق وطائفة مع الباطل وطائفة تنافق الأقوى

والخوف كل الخوف أستاذى من هؤلاء المنافقون فهم أشد خطرا على الأمة ممن يقفون مع الباطل

[شريف]

أؤيدك يا أم عمر ان المتحولين كتييييييير

لكن عشان نبقا منصفين ... تعالي نقسمهم لاقسام عشان ما نعممش
لازم ناخد بالنا ان المتحولين دول :

1- إما اتباع النظام الساقط ... المنافقين ... اللي من الاخر بيركبوا الموجة (( الموجة الاقوي طبعا ))
فلما ضعف النظام و قويت الثورة و المظاهرات وقفوا بجانبها ... و داخل في دول شريحة كبيرة من المجتمع
فنانين و مطربين ووزرا مخلوعين و صحفيين و كتاب و مفكرين ... الخ
و انا معاكي و بندهش فعلا ان كتير منهم بقا وطني اليومين دول زيادة عن اللزوم

2- الصنف التاني ... اللي لازم الي حد ما نعذره
هما اللي كانوا مكبوتين ... و كانوا عارفين انه نظام فاسد لكنهم كانوا خايفين يتكلموا
و انتي عارفة طبعا الدولة البوليسية اللي كانوا عايشين فيها
كان هيتم اعتقالهم و يتبهدلوا هما و اهلهم و يتسحلوا و يهانوا و يتكهربوا و البدع كلها كانت هتتعمل فيهم

فرجاءا ... ما نلومش الفئة دي ... لانهم كانوا مضطرين و مجبرين علي الصمت و الا حياتهم كانت هتدمر

3- الصنف الثالث : انا واحد منهم

انا من المتحولين يا نعمة
انا مريت بتلات مراحل من التحول
المرحلة الاولي : كنت مذهول و فخور جدا بالثورة دي و فرحان اوي
المرحلة الثانية : حسيت انهم طولوا اوي و الموضوع زاد عن حده و خفت علي اقتصاد مصر و حال البلد
فاتخنقت و اتضايقت و حسيت انهم متهورين و هيبوظوا كل اللي عملوه
المرحلة الثالثة (( و اللي هتستمر ان شاء الله بصفة دائمة دون تحول اخر ))
مرحلة النزول وسطهم ... بصفة شبه يومية عشان اعرف الناس دي مين ؟
مرحلة اليوتيوب و البلاوي و المقاطع الفيديو اللي شوفتها و اللي حصل في المظاهرات

عايز اقولك اني بكيت كما لم ابكي من قبل
حطيت نفسي لمدة دقيقة واحدة
مكان واحد صاحبه مات و مخه طلع بره راسه بعد ما دهسته عربية امن مركزي
حطيت نفسي مكان واحد شاب مهندس عبقري مخه جبار المفروض يكرموه
اهانوا و سحلوه و شتموه و ذلوه
حطيت نفسي مكان ام بتصرخ في الميدان مش لايقة ابنها
حطيت نفسي مكان راجل شفته بعيني و الله ... المفروض يعمل غسيل كلي بشكل مستمر
مرمي علي الرصيف ... بيقول يااااااااااااااااارب ارحمني من ظلم البلد دي

حطيت نفسي مكان راجل بلغ من العمر ارذله و شعره شاب بيبكي عشان يلاقي اي حد يجيب له شغلانه
يصرف علي اولاده
حطيت نفسي مكان شاب بقاله خمستاشر سنة مش لاقي شغل و لا عارف يتجوز و نلوم عليه لو سرق او قتل
حطيت نفسي مكان واحدة ست مش لاقية لقمة تاكلها في نفس الوقت اللي المليارات فيه بتتهرب بره مصر
حطيت نفسي مكان شاب بيصرخ علي اخوه ... اللي خد رصاصة بين عينيه علي يد قناصة مجرم واقف فوق سطوح ... تبع العالم القذرة اللي كل الناس عارفاهم

لو لدقيقة واحدة في لحظة صدق حطينا نفسنا مكان دول ...و القهر مالي قلوبنا
عمرنا ما هنشتم عليهم ... و لازم شخصيا اتحول ... لازم اتحول فورا للدفاع عنهم

تخيلي مدي الظلم اللي حاصلهم و رغم كده بنشتم عليهم و بنشتم حتي علي اللي بيدافع عنهم
اقسم بالله لو انا واحد منهم ما هتحرك من ميدان التحرير الا لما اخد حقي من الظابط اللي قتل اخويا
او القناصة اللي قتلوا 300 شهيد

يمكن عشان حياتنا مستقرة شوية مش حاسين بيهم
الظلم وحش اوي
و اللي داق مرارته هوا اللي قاعد دلوقتي في ميدان التحرير

بلاش نيجي علي المظلوم
العكس هو المطلوب دلوقتي

الظالم هوا اللي المفروض يتعدم في ميدان عام

[نعمه محمود]

حطيت نفسي مكان راجل شفته بعيني و الله ... المفروض يعمل غسيل كلي بشكل مستمر
مرمي علي الرصيف ... بيقول يااااااااااااااااارب ارحمني من ظلم البلد دي


تعرف برضه ياشريف ان عندى زميلة فى المدرسة عتدها Cancer وبتعمل جلسات كيماوى بقالها ايام بتموت لانها مش عارفه تنزل معهد الأورام بسبب المتظاهرين

[جمال سراج]

سيدتى
أن يتحول الإنسان عن خطأ فعله أو ذنب اقترفه مصححا ذلك ومعترفا بذلك فهذا أمر محمود
لكن أن يكون الإنسان امعة إذا أحسن الناس يحسن وإن أساء الناس يسىء فهذا نفاق ورياء
وأظن هم من تقصدينهم سيدتى
أنا حزين كل الحزن من أمثال هؤلاء المتملقين - محدودى الثقافة - غير العابئين بالمخاطر التى تتعرض لها البلاد اليوم
اللى ركبوا الموجة سيدتى اليومين دول مش بس البرادعى والاخوان والأحزاب التى لا نعرف لها نشاطا وليس لها أى وجود سوى اسمها - ولكن ركب الموجه بردو شباب جاهل لا يقدر ولا يمكن لأمثاله أن يقدر المسؤلية
بالزمة دا ينفع
اللى عاوز عيش يروح يتظاهر قدام المحافظة ويولع فيها
واللى عاوز المرتب يزيد يسيب المرضى فى المستشفيات تموت ويروح ميدان النكبة ( مش الثورة)
واللى مضايق من حد اليومين دول يروح يطخه ومحدش عارف حاجة - فوضى بقا
واللى ميعرفش معنى كلمة سياسة حتى بيتكلم فيها اليومين دول
يا سادة
لازم نتجاوز عن اى حاجة اليومين دول ونخلى أمن البلد فى المرتبة الأولى اليومين دول
لازم نظهر للعالم مدى ترابط الشعب المصرى واحترامه لرموزه ونفوت فرص التدخل فى احوالنا عسكريا او حتى اقتصاديا
لازم نشتغل اكتر حتى لو عانينا اكتر
أنا لست ضد التظاهر أو عرض مطالب مشروعة .... ولكن أنا وكتير ضد الفوضى والهمجية - ضد قلة الأدب والإستخفاف برمز مصر الكبير الرئيس مبارك
أنا ضد الجهل والتخلف والأفق الضيق فى عرض المطالب
أنا مع اعطاء الفرصة لجنى المكاسب التى حققها الشعب خلال انتفاضته وهذا يتطلب احترام العمل وحقوق الغير وعدم تعطيل المصالح أو المرور أو غيره
أنا مع احترام الكبير وتضييع الفرصة على الشامتين من دول عربية علمناهم ازاى يكلوا ويشربوا ويلبسوا قميص وبنطلون وهذا يتطلب عدم تدعيم فضائيات هذه البلاد والتى شعارها ولعها ولعها!
أنا لا يعجبنى التحدث عن رمز مصر بهذه الطريقة الهوجاء القذرة التى لا تنم عن أخلاق أبدا ولا ترضى الله حتى ولو كان الرئيس مخطئا .
يا سادة احفظوا لمصر شأنها
تجنبوا الفتنة
تمسكوا بالوحدة
حبوا الخير للجميع
علموا ولادكم يحترموا الكبار ويعطفوا على الصغار
علموا ولادكم يحترموا رموز مصر ومنهم سيادة الرئيس محمد حسنى مبارك بغض النظر عن مساوئه فأعماله وبطولاته تغفر له كل المساوىء
علموا ولادكم التاريخ بدلا من سب هذا الرجل البطل
والله يا سادة ليس لى ناقة ولا جمل من كلامى دا - أنا زى الجميع أو الغالبية أعانى من ضيق ذات اليد ومن كل ما يعانى به الكثير
لكنها بلادى ومش ممكن تهون عليا أبدا
بلادى بلادى لكى حبى وفؤادى
ستبقى مصر حرة قوية بإذن الله
فأهلها فى رباط إلى يوم الدين
إن شاء الله
خالص ودى
وشكرا لحضرتك مدام نعمة

[دعاء شديد]

للاسف يا نعمه فعلا هو موسم متحولون

بس كمان موسم "جني الاقنعة"
اقنعه كتير وقعت

لى عوده ورد اخر ان شاء الله

[امل لاشين]

فعلا عندك حق يانعمه موسوم المتحولون ..

واكبر شيء مستفز الاعلام المصري

اللي مكنشي بيتكلم دلوقتي تحول الي شيء مستفز علشان يركب الموجه

بدل مايوضح الصورة بامانه وشفافيه بقي مستفز جداااااا وفي الاخر يطالب بالاستقرار

وطبعا واضح جدا الشخصيات العامه الوطنيه وتحولها بالفطره الي الوطنيه ..

والله حاجه تخنق ..وصدقيني يانعمه انا خايفه جدااااا من الاستمرار في العناد ده واخرته ايه علي مصر

ربنا يحمي مصر