هيستريا ... حماقة ... قل ما تشاء !

[شريف]

أدهشنى جدا حديث نبوي شريف قريته ... ان النبى صلى الله عليه و سلم كان يتوضأ بالمد و يغتسل بالصاع ...المُد ده يا جماعة حوالى نص لتر ميه و الصاع حوالي 2 الي 3 تر ميه !!! انتو متخيلين الموضوع عامل ازاي ؟الحبيب عليه الصلاة و السلام كان بيتوضأ ب نص لتر ميه و بيغتسل بحوالى 2 لتر ميه و العلماء فى مختلف العصور أجمعوا على ان أكثر من كده يبقى اسراف !!! يا خبر ابيض !! و كمان نهى الرسول عن أن نسرف فى الماء و لو كنا على نهر !! الموضوع خطير جدا و لو فكرنا فيه بشكل أعمق خصوصا مع مشكلة الميه اللى فى العالم كله و الحروب المتوقعة بين دول العالم على الماء سواء كانت حروب تجيش لها الجيوش أو حروب باردة .الاسلام نهى بشدة عن الاسراف و نهى بشدة عن الاسراف فى الماء بصفة خاصة الرسول مكانش بيتوضا بمد و يغتسل بصاع عشان قلة الماء لا و لكن عشان دي سنة لازم نتعلمها و نمارسها بعده ..يا جماعة احنا مجانين فى استخدام المياه و الاسراف فيها
دانا بفتح الدش و اقف تحته بتاع نص ساعة ... ايه البلطجة دي ! في المدرسة عندنا يوميا يرشوا بلاط الحوش بكميات ميه تكفي بلد لمدة عشر سنين
العربيات تحت البيت بتتغسل بكمية ميه تحل مشكلة دول حوض النيل ! الحنفيات المنزلية بتفضل مفتوحة مع اي نشاط بنعمله في المطبخ و الحمام و بنستهلك كميات مهولة بهيستريا شديدة و بدون وعي .. مشكلة كبيرة جدا سندفع ثمنها غاليا فى سنوات قليلة قادمة لا نشعر بها الآن. لو كل واحد فينا قام بواجبه ورشد استهلاكه و ما قالش - يعني هيا جات عليا انا - أكيد الحال ساعتها هيتغير و الكل هيستفيد

[المنشاوية]

معك حق يا استاذ شريف في كل ما ذكرت ده فعلا تبذير وقد قال تعالى "إن المبذرين كانوا إخوان الشياطين"عافانا الله واياكم وجميع المسلمين من ان نصبح اخوانا للشياطين

[نعمه محمود]

هى جات على التبذير فى الميه ياشريف احنا بقينا أساتذة فى الاسراف في كل شيء
تخيل إحنا بقينا حتى مسرفين فى الكلام محدش بيقفل بقه الكل بيرغى ياسلام ولو سعدك زمانك ووقفت فى مكان فيه تجمع بشر او مواصلة عامة اسمع بقي ياسيدى أحلى فشر فى رأيي إن ده كمان تبذير
ربنا يعافينا ياشريف

[محمد شوقى محمد اسماعيل]

اتمنى ان نكون مسرفين فى القاء السلام