بس يا سيدى ... ادي كل الحكاية

[شريف]

و انا ماشى فى شارع جامعة الدول العربية

قابلت مجموعة من الاشقاء العرب متجمعين على قهوة

و اعتقد ان ده المكان الوحيد اللى بيتجمعوا عليه :)





واحد ظريف كده منهم قال لى ... ياريت بصفتك مصرى و مصر ام الدنيا

تحكيلنا نبذة و همسة حائرة عن تاريخ الوحدة العربية



ايه هيا يعني او ايه هوا مفهومها



قلت له ... بص يا سيدى هشرحلك مفهوم (( الوحدة العربية ))

و يارب تستوعب بسرعة

عشان دي عايزة مخ صاحي

سيبك م الفول اللي بتضربه ده

.........



هما كانوا 22 دولة



اللي بيفصل بينهم سور نادى الزمالك (( الموسم اللى فات )) .. و كانوا الولاد لسه واخدين الاجازة بقا فرحانين مسافرين الساحل ... فمش متأكدين ... هييجي من العراق

مش جاي م العراق ؟ محدش عارف ... و هما بيتكلموا في التليفون الباب خبط ...

فتحوا لقوا الراجل جايب الاوردر ناقص واحد شاورما فراخ ... فقعدوا يفكروا يعملوا ايه يعملوا ايه يعملوا ايه ؟ راحوا سايبنها في وسط الشارع متكلبشة و راحوا راكبين تاكسي ...و لسه الراجل بيقولهم رايحين فين ... راحوا مهللين بقا و معيطين و طلعوا في البلكونات قعدوا يقولوا .. تي ترتت تي مصر ... تي ترتت تي مصر ...

دقيقة واحدة و النار شبطت فى كل البضاعة اللي في المخزن ... مين جاي من بعيد ؟

ربيع .... سمعهم بقا و هما بيتفقوا عمل نفسه مش واخد باله خالص و قام عامل جرد في نفس اليوم ... و بالصدفة البحتة يطلع ان ده عيد ميلاد وائل ...و حاجز مركب ...

و قاعد مستنيهم في المركب بتاعه تحت بيت سامح ... ساعة بيندهوا ... طلعت طنط ام سامح م البلكونة ... ايه يا طنط اومال سامح فين ؟ قالت لهم ده راح لعادل لما ييجي نقوله مين؟ راح عادل متشملل و قايل بعلو صوته : انا اللي شوطت الكورة في الازاز و مستعد ادفع تمنه ... راح حماه رادد عليه قاله يابني الفلوس مش كل حاجة و ياما

ياما ناس بدات حياتها من الصفر ... النهاردة الناس كلها بتتكلم عليهم ...

محبش يرد عليه و قاله طب حضرتك اديني اسبوع افكر ... و في الاخر بعد اسبوع تفكير توكل علي الله و جابه بالقسط .... يشاء المولي عز و جل ان يبقا في مشكلة في البروسيسور ... قاله خلاص خدوا رجعه و اللي هيتبقا من الفلوس تديهولي في ايدي ماتديهوش لامك .... ليه و ليه يقول كده ... راحت رافعة سماعة التليفون و قايلالها ...

بصي يا بنت الناس بصراحة ... يا تقبضيني واحد في الاول وواحد في النص ...

يا اما اعتبريني مش معاكم في الجمعية ... و راحت قافلة السماعة ... و قعدت تعيط ...



بس يا سيدي ...



فهمت يعني ايه وحدة عربية ؟

[امل لاشين]

هههههههههه ......لالالالالا مفهمتش حاجه ..

[شريف]

كده يا امل ؟
بقا انا حاطط امل كبير ان اول رد ينصفني و يفهم تقومي تخذليني كده ؟
ركزي بس شوية
ركزي ركزي

[نعمه محمود]

اخيراااااااااااااااا انا فهمت يعنى أيه وحدة عربية

[أفنان أحمد]

وأنا بأقول الوحدة عربية تعبانة ليه؟؟؟
أكيد علشان كل ده حصل
بسيطة إن شاء الله
قاعدة عرب تصلح كل حاجة ...

[عزة المصرى78]

دى حكاية معقدة خالص ربنا يجعل لها حل سريع لأحسن كل مدى بتزيد العقدة وربنا يستر