المساعد الشخصي الرقمي

مشاهدة النسخة كاملة : رساله حب من الحكومه للمواطن(جامده جدا)



س ا يوسف
13-01-2010, 04:01 AM
عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال


بلاش المناكفة و لايم و عيش
هتتعب معانا و سهمك يطيش
نلفق لاهلك قضية حشيش
و تصبح حكاية و نكتة و مثال:


تعالى و هاودنا و عدى الامور
و عيش فى الطراوة و خش الطابور
لكن لو هتزعل و دمك يفور
هنشهد نهايتك فى بحر الرمال

هتصبح حرامى هتصبح امير
هتصبح حرامى و ندل و اجير
و نقدر نلخبط فى اصلك كتيير
و جدك شحاتة هيصبح شحال

هنحلف ان الحبايب شافوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعى احط الرجال

مالكش انت دعوة بى ايه اللى ضاع
و مين اللى شارى و مين اللى باع
و مين اللى كيل و مين اللى شال

فحب الحكومة و حب السلام
و علم ولادك يشدوا الحزام
علشان بكرة هياكلو حمام
و ينسوا الاسية و ينسوا الهزال

فلازم يا صاحبى تغمض عنيك
و طنش علينا نطنش عليك
و اياك تشاور نقطع ايديك
و تصبح مواطن ما يسواش ريال

عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال

7asnaa kareem
13-01-2010, 04:20 PM
ههههههه
تحفه بجد
نسلم ايديك

نعمه محمود
13-01-2010, 04:42 PM
تسلم ايدك جميلة بجد

Blanche Neige
13-01-2010, 08:47 PM
ونعم الرسايل بجد

موضوع طريف باشكرك عليه

طارق ممدوح ذكي محمد
16-01-2010, 07:45 AM
جميلة بجد

دي فعلا رسائل الحكومة .. ولو الحكومة معاها خط فودافون

كانوا اشتركوا في الرسائل المجانية وبعتوها على الموبايلات

دعاء شديد
18-01-2010, 02:43 PM
جميلة بجد


دي فعلا رسائل الحكومة .. ولو الحكومة معاها خط فودافون


كانوا اشتركوا في الرسائل المجانية وبعتوها على الموبايلات




ردك يا مستر بجد
فى الجون
زى الرسايل بالظبط