عــادة غــريبة أوي

[شريف]

كنت بقرأ كتاب امبارح ... كتاب شيق جدا
و في وسط ما انا بقرأ ... وقفت فجأة و قعدت أسأل نفسي
سبحان الله ... ازاي الواحد بيقرأ بالاهتمام دا كله ... دانا و انا في ثانوي
كنت بمجرد ما امسك كتاب فيزياء او كيمياء و الذي منه ... ألاقي عنيا احمرت وقتي ... وش كده... و نزل عليا سهم الله و سنتحت
و قعدت اقول لنفسي ... والله لو الواحد كان بيقرأ بالاهتمام ده كتب المدرسة ... أيام المدرسة يعني ...
كان زماني خريج صيدلة ولا طب و لا هندسة حتي ...

You can see links before reply


و فعلا اكتشفت ان لوالمادة العلمية اللي انت بتقراها شيقة جدا و قادرة تشد انتباهك
كان الوضع اختلف تماما ...و كنت أكلت الكتب أكل... و عشان كده أدعو علماء التربية في مصر
و الناس المسئولين عن وضع المناهج التعليمية انهم يدلعوا المناهج شوية :)
لا مش قصدي يبقا فيها صور ناسي عجرم مثلا ... لا لا مش للدرجاتي
أقصد يخففوا الحمل .... يبسطوا المعلومة .... يحذفوا التعقيدات اللي مالهاش لازمة
و الحشو الرخم اللي كله رغي ....

You can see links before reply

عشان كده و انا في ثانوي و من وانا في ابتدائي
و انا عندي طقوس غريبة جدا في المذاكرة....
ببساطة شديدة كنت أقعد في البلكونة و يا جمالها بقا ....
حتي بنت الجيران اللي البلكونة بتاعتها لازقة في بلكونتنا
كانت تقعد تبص عليا :) .... و قلدتني علي فكرة :)
بس هيا فشلت و انا بقيت خوجة أد الدنيا :006et4:
كنت اعمل ايه بقا .... كنت اجيب ملاية او قماشة كبير الحجم و مسمار في الحيطة
و أوصل بين
الحيطة و المنشر :) .... أعمل خيمة يعني م الاخر ...و اقعد مع نفسي بقا علي مكتب صغنن كده ...

You can see links before reply


الكتاب اللي كان 300 صفحة الخصه في كام ورقة ... ادمان عندي التلخيص ... ألخص اي كتاب في الدنيا في عشرة اتناشر ورقة
... و علي فكرة التلخيص مش سهل ابدا ... دانت مطلوب منك عشان تلخص صح انك تقرأ الكتاب كله كلمة
كلمة و تطلع المهم و الخلاصة و الفكرة الرئيسية في كل صفحة و كل فقرة ...
المشكلة بقا اني كنت بقعد اهتم بالتلخيص ده اكتر من المذاكرة نفسها هههههه
يعني ممكن اقعد السنة كلها الخص و اجي علي اخر اسبوع ابدأ أقرأ التلخيص و احفظه
ما علينا ... المهم ان كان طبعي غريب اوي في المذاكرة.... التلتوميت صفحة يبقو عشرين صفحة
و قبل الامتحان بشهر ...العشرين صفحة يتحولوا بقدرة قادر يبقوا خمس صفحات مكبوسين فوق بعضهم
بخط صغير جدا ... بس جميل ... اصل انا من يومي خطاط :).... الخمس صفحات دول بعيد عنكو بقا ...
بيبقا فيهم الزُبد .... الخلاصة و المهم كله في الخمس ورقات دول .... عناوين و تحتها ملخص بسيط جدا و مفاتيح دلالية للكلمات ... بحيث لما اشوف كلمة واحدة كانت تفكرني الكلمة دي بصفحتين تلاتة او اكتر في الكتاب ...


المهم في آخر اسبوع قبل الامتحان ... الخمس ورقات دول بيتحولوا لورقة واحدة بس فيها كل حاجة عن المنهج ...اكتبها و الخصها
و اذوقها و ادلعها و الونها و اروح اصورها ف اي مكتبة صورة مصغرة جدا :)
شوفوا الجبروت ؟ سبحان الله دماغي ما كانتش بتشتغل في امتحان اي مادة الا لما اكون عامل الورقة دي
مش برشام لا سمح الله ... لا ابدا... انا عمري ما عرفت اغش... كرامتي كانت بتقح عليا

You can see links before reply

و دي ورقة بقا يا جماعة بتعرف الواحد راسه من رجله.....بجد كانت ورقة مهمة جدا في حياتي
و استمرت العادة المنيلة دي معايا لحد دلوقتي ... بقيت لو نازل و المدام عايزة حاجة من تحت و انا جاي اخليها تكتبلي في ورقة و تعلقها علي الباب .... عدد كذا كذا و عدد كذا كذا .... غير كده أحلف أيمانات الله مانا جايب :)
الورقة دي سر في حياتي بجد مش قادر افهمه ... خصوصا لما اكون مقبل علي حاجة مهمة لازم اكتب خطواتها في ورقة و انظم المسائل و اعرف الدنيا ماشية ازاي بدقة ... مش عارف دي ميزة ولا عيب
ما علينا



اكيد انتو برده ليكو طقوس غريبة في المذاكرة من سنة اولي ابتدائي لحد الجامعة
مش كده برضه؟ انا واثق ان في ناس دماغها لاسعة في المسائل دي
ياريت تحكولنا عن ذكرياتكو الاليمة :) في المذاكرة خصوصا المطرقعة منها
:38:

[مسيو وليد عسكر]

والله يا شريف انا كنت تقريبا زيك كده في المذاكرة مع اختلافات بسيطة
يعني مثلا كنت في عز الحر اربط راسي بمنديل عليه ميه بتلج علشان نافوخي كان بيجيب جاز من مذاكرة الصيف
وكنت في احب اتمشي واشرح لنفسي اللي فهمته وده خلاني احب اني افهم الاخرين مافهمته والنتيجة اني بقيت مدرس:28:
وكان دايما ليا مزاج اذاكر وانا بسمع مزيكا هادية او ام كلثوم ونجاة والشاي كان رفيقي الدايم في المذاكرة لدرجة اني كنت بشرب شاي بالهبل لحد ما طلع لي تفل في وشي بدل حب الشباب :):)
كان عندي سبورة والله العظيم بذاكر عليها وكنت دايما اشرح بشكل تخيلي اللي فهمته وكان بالطريقة دي يستحيل انسي اي حاجة اذاكرها
اخيرا وانا في الجامعة كنت مدمن الخص اي كتاب عامل بالوه لزملائي وكنت باخدها تحدي مع الذات لدرجة ان فيه مكتبات كانت والله بتبيع ملخصاتي لزملائي ومنهم اللي كان بينصور اني بقسم مع صاحب المكتبة :)
موضوع جميل يا شريف فكرني بايام جميلة 00تسلم ايدك

[7asnaa kareem]

يا سلام عليك يا شيريف وعلى أفكارك

انا كمان كان عندى هوايه التلخيص

صحابى كانو بيستغربو
ازاى كتاب 300 صفحع يتلخص فى 20 ورقه
ورغم كدا ما كنتش بفوت حاجه فى التلخيص

انا كمان عندى الهوايه دى

كان من طقوس مزاكرتى طربيزه بلاستيك واحطها على السرير بتاعى واذاكر عليها

ويا سلام على نجاه وهيا بتغنى " متى ستعرف كم أهك يا أملى "

ولا ام كلثوم " يا حياتى أنا كلى حيره ونااار وغيره وشوق اليك نفسى أهرب من عذابى نفسى ارتاح بين اديك""

بس والحمد لله يعنى كل ما احب انام افكر افتح كتاب اذاكر زى ما تقول كدا الكتاب بيفكرنى بحاجه وهيا انى انام


اما بالنسبه لتعديل المناهج وعجرمتها وتهييفها وتحسينها

فدا يتم فى حاله واحده
لما يبقى فيه تعليم أصلا

نسيت اقول على حاجه

كنت ادى تلخيص المواد لصحابى يذاركو منها
هما يجيبو فى الماده دى تقدير اعلى منى

ببقى متغاظه مع انى انا اللى ملخصاها

أكيد الدكتور كان مغرم بيا
شئ طبيعى يعنى


والحمد لله زى ما انت شايف معاكو فى المنتدى
هههههههه

[noha77]

:18:
العلم صيد والكتابة قيده
قيد صيودك بالحبال الواثقة

[المجاهد فى سبيل الله]

هههههههههههههههه
يعنى مطلعتش لوحدى مفرقع فى طريقة المذاكره
انا بقى كنت بعمل حاجه حلوة اوى
كنت اخد كتابى و اخرج الحديقه واذاكر هناك وفى وسط العربيات و بييييييييببتها
وعند اشارات المرور و زحمتها
الى من المنصورة اكيد عارف طريق سندوب
و الجناين الى فيه
كنت باخده كله مشى ومع الكتاب بقى واعيش
بس انا الحمدلله مش بمل ولا بحب الخص انا بذاكر كلمة كلمة
لانى حابب الكتب الى انا بدرسها
لانها عبارة عن تاريخ حواديت بمعنى تانى و ببقى شغوف مثلا لو بدرس حقبه زمنية انا كنت وانا صغير عايز اوصلها
بجد ببقى فى قمة متعتى وانا بذاكر لان حواسى كلها بتبقى صاحيه
حتقولولى طب بدل ما انت كدا ليه مجبتش امتياز و طلعت بمقبول السنه الى فاتت
حقول بكل بساطه ان خطى زفففففففففففففففففففففففففففففففففت
لدرجة ان والله فى دكتور بيقولى انت عارف يا احمد
وانا بعلم الورق والله لولا انك جيت فى بالى وانا بعلم ورقتك وعرفت ان الى تحت ايدى دى ورقتك بسبب خطك كان زمانك شلت مدتى
تخيلوا دكتور بيعلم كام الف ورقة يعرف ورقتى من وسط الورق بسبب خطى
وقبل كدا دكتور بيقرا بحثى كا المقدمة و الافكار بيراجعه قال ايه يابنى دا
انت فى الحضانه ولا ايه
بقولكم ايه متفكرونيش بقى
انا عمال اشرب ماية ساقعه ماية ساقعه علشان انسى الحكاية دى

[Blanche Neige]

والله يا شريف انا كنت تقريبا زيك كده في المذاكرة مع اختلافات بسيطة
يعني مثلا كنت في عز الحر اربط راسي بمنديل عليه ميه بتلج علشان نافوخي كان بيجيب جاز من مذاكرة الصيف
وكنت في احب اتمشي واشرح لنفسي اللي فهمته وده خلاني احب اني افهم الاخرين مافهمته والنتيجة اني بقيت مدرس:28:
وكان دايما ليا مزاج اذاكر وانا بسمع مزيكا هادية او ام كلثوم ونجاة والشاي كان رفيقي الدايم في المذاكرة لدرجة اني كنت بشرب شاي بالهبل لحد ما طلع لي تفل في وشي بدل حب الشباب :):)
كان عندي سبورة والله العظيم بذاكر عليها وكنت دايما اشرح بشكل تخيلي اللي فهمته وكان بالطريقة دي يستحيل انسي اي حاجة اذاكرها
اخيرا وانا في الجامعة كنت مدمن الخص اي كتاب عامل بالوه لزملائي وكنت باخدها تحدي مع الذات لدرجة ان فيه مكتبات كانت والله بتبيع ملخصاتي لزملائي ومنهم اللي كان بينصور اني بقسم مع صاحب المكتبة :)
موضوع جميل يا شريف فكرني بايام جميلة 00تسلم ايدك



عاوزه اقولك ياشريف ان وليد ده كان ايام الجامعه
موووووووووووس مذاكره يابنى أه والله
كان كمان استاذ فى التلخيص وكما فى الشرح لزمايله
وانا فى سنه تانيه كان هوه فى رابعه
انا وصحباتى كنا خمسه ومعانا واحد زملنا قعد معانا
وشرحلنا grammaire قواعد
وكان عامل علينا دكتور بقا وايه مااقولكش
وكمان وهوه فى سنع رابعه جاب فى مادة الحضاره بالفرنساوى طبعا
100/100 مش باقولك موس ودحاح عشان كده كان أول دفعته

اما انا بقى فكنت احسن واحده تشترى اى كتاب لاى دكتور ينزل
واسيبه زى ماهوه ابيض ولا احط فيه قلم حتى
لانى مش كنت باعرف اذاكر من الكتب كنت بحب التلخيص
بس كانت بتجيلى انا وصحباتى لحد عندنا طبعا
ولا عمرنا طلبناها من اى حد وعليه
كنا نذاكر وكنت بجيب تقديرات الحمد لله
بس كنت باعتمد على انى افهم اكتر لانى مااحبش
الحفظ نهائى وربنا يهون بجد المناهج
الدراسيه شويه اصل بجد الطلبه بيصعبوا عليا
وزمايلى مدرسين عربى وانجلش وماس مش بيبقوا
عارفين ولا لاحقين يخلصوا المناهج
ربنا ييسر ويهدى وزير التعليم شويه بقى
موضوع جميل ياشريف باحييك عليه
:18::27:

[شريف]

كان عندي سبورة والله العظيم بذاكر عليها موضوع جميل يا شريف فكرني بايام جميلة 00تسلم ايدك
ههههههههههههه
انت انسان مكافح و مجتهد يا وليد
فكرتني بالسبورة اللي كان بيذاكر عليها جمال عبد الناصر
محتفظ بيها انا في بيت جدتي في اسكندرية
الموضوع بقا جميل بيك يا وليد
و لانك شاركت فيه
تسلم ايدك يا جميل

[شريف]

ويا سلام على نجاه وهيا بتغنى " متى ستعرف كم أهك يا أملى "

ولا ام كلثوم " يا حياتى أنا كلى حيره ونااار وغيره وشوق اليك نفسى أهرب من عذابى نفسى ارتاح بين اديك""




انتي مـتأكدة انها كانت مذاكرة ؟؟؟؟؟؟؟؟؟؟؟؟؟؟؟؟
هههههههههههه
نورتي الموضوع يا حسناء
باين عليكي كنتي مطرقعة اوي في المذاكرة:)

[شريف]

حقول بكل بساطه ان خطى زفففففففففففففففففففففففففففففففففت


العباقرة كلهم علي فكرة خطهم بالشكل ده
سيبك انت
المهم الدماغ
انا ممكن اقعد معاك شوية يا احمد في موضوع الخط ده
و اديك كورسات
اصل انا عكسك تماما
خطي الحلو هوا بس السبب في نجاحي :)
كنت بخلي ورقة الاجابة كأنها فرح
تسلم ايدك يا احمد

[طارق ممدوح ذكي محمد]

اغرب عادة لي اني في كل مرة امسك الكتاب

كان لازم تحت كل كلمة اقراها خط

ومش اي خط كان لازم يكون باللون الاحمر

اكتر واحد في الدنيا استهلك اقلام حمرا

ومن غير الخط الاحمر ده معرفش اقرأ اي كلمة

ولو قريتها ما تثبتش في دماغي

لحد ما دكتور في علم النفس عقدني من الموضوع ده

او بمعنى اصح عالجني منه


دايماً افكارك جديدة وجميلة يا شريف

ربنا يحفظك ويرعاك

[شريف]

عاوزه اقولك ياشريف ان وليد ده كان ايام الجامعه

موووووووووووس مذاكره يابنى أه والله

شهادة اكيد وليد يعتز بيها من اميرة
احنا مش بنأر عليه يا اميرة ولا حاجة لا سمح الله
احنا بنحسد بس :)


اما انا بقى فكنت احسن واحده تشترى اى كتاب لاى دكتور ينزل
واسيبه زى ماهوه ابيض ولا احط فيه قلم

كلنا كنا كده :)
بصرة
شكرا يا اميرة علي مشاركتك الجميلة
دايما بتنوري اي موضوع تدخليه

[شريف]

دايماً افكارك جديدة وجميلة يا شريف


ربنا يحفظك ويرعاك


عالجك منه ازاي و انت لسه بتكتب بالاحمر اهو
ههههههههههههههههه
تسلم يا طارق
عيد ميلادك اضاف مع عيد الاضحي بهجة في المنتدي
ربنا ما يحرمنا منك و لا من ردودك
و يرزقك حياة طيبة

[مسيو وليد عسكر]

عالجك منه ازاي و انت لسه بتكتب بالاحمر اهو
ههههههههههههههههه
تسلم يا طارق
عيد ميلادك اضاف مع عيد الاضحي بهجة في المنتدي
ربنا ما يحرمنا منك و لا من ردودك
و يرزقك حياة طيبة [/center]
كل سنة وانت طيب يا جميل
عيد ميلاد ك جاي في يوم مبارك
ربنا يملي حياتك كلها بركة وسعادة

[أفنان أحمد]

الحقيقة أنا فاشلة فى التلخيص
والسبب إن علشان تلخص لازم تفهم الموضوع جدا وتعرف أهم نقاطه
فإن حدث هذا ما الداعى للتلخيص
فكنت باكتفى بالتخطيط .... وبعدين ألاقى نفسى خططت كل الكتاب
كنت أحب أفهم ومش كثير باحفظ علشان كدة فشلت .. الحمد لله
لكنى من أوائل من اكتشف المنوم الطبيعى



المذاكرة

[نعمه محمود]

الحمد لله أنا من الناس اللي بيستمتعوا بالمذاكرة , ولكن كان لى طقوس غريبة جدا في المذاكرة مثلا انا ممكن كنت احط كرسي فوق المكتب واقعد اذاكر عليه, وكنت بشرب كمية شاى وقهوة ونسكافية بشعة والاغرب انه كان ممنوع الراديو يشتغل او التلفزيون والمأساة كانت ف الراديو لان بابا الله يرحمه كان عاشق للراديو وبيحب يسمعه على طول وانا كنت مش بعرف اذاكر لو في صوت حواليا( الكارثة بقي ان بابا كان يصحى بالليل يلاقينى بذاكر وبسمع ام كلثوم كان ليها حفلة الساعة 2 بالليل). الشيء البشع بقي اللي كنت برتكبه في حق كل اللي حواليا انه كان ممنوع حد يعدى حنب أوضتى وهو لابس (شبشب) عشان الصوت شوفن جبروت أد كده بس الحمد لله عشان كده جبت جيد جدا بس اتفق معاك في قصة التلخيص انا كنت حريفة تلخيص وكنت استاذة في تلخيص الملخصات نفسها
موضوع لذيذ وكل سنة وانت طيب يا شريف

[مسيو وليد عسكر]

بسمع ام كلثوم كان ليها حفلة الساعة 2 بالليل).
ياااااااااااااااه يانعمة
هو انتي طلعتي من جيل ام كلثوم
جيل الخمسينات بتاع الطرابيش والاستقلال التام او الموت الزؤام
وانا اللي كنت فاكر انك من جيل الستينات زي حالاتي:)

[نعمه محمود]

ياااااااااااااااه يانعمة
هو انتي طلعتي من جيل ام كلثوم
جيل الخمسينات بتاع الطرابيش والاستقلال التام او الموت الزؤام
وانا اللي كنت فاكر انك من جيل الستينات زي حالاتي:)
هههههههههههههههههههههه
يعنى هى دى اللي لفتت نظرك في ردى كله
لا انا مواليد 36 بصراحة من ايام المعاهدة

[شريف]

الشيء البشع بقي اللي كنت برتكبه في حق كل اللي حواليا انه كان ممنوع حد يعدى حنب أوضتى وهو لابس (شبشب) عشان الصوت
ايه الجبروت ده؟
لا اله الا الله
يعني الناس تتذنب عشان في حد بيذاكر :)
ان كيدهن عظيم
طب و دلوقتي لو اضطريتي تذاكري ماجستير ولا دكتوراه
هتعملي ايه في عمر و حبيبة ؟؟؟
انا كده برضه علي فكرة
ممكن يكون في فرح في الشارع و صوت عالي جدا
لكن لو حد عندي في البيت اتنفس
يبقا ليلتو مالهاش ملامح

[شريف]

الحقيقة أنا فاشلة فى التلخيص
والسبب إن علشان تلخص لازم تفهم الموضوع جدا وتعرف أهم نقاطه
فإن حدث هذا ما الداعى للتلخيص
فكنت باكتفى بالتخطيط .... وبعدين ألاقى نفسى خططت كل الكتاب
كنت أحب أفهم ومش كثير باحفظ علشان كدة فشلت .. الحمد لله
لكنى من أوائل من اكتشف المنوم الطبيعى



المذاكرة


عموما الناس اللي مش بتلخص بيبقوا دحيحة :)
يعني بيحفظوا من اول مرة ما شاء الله
انما احنا غلابة بنقعد نضيع وقتنا في التلخيص
تمويه يعن عشان مانذاكرش:)

[نعمه محمود]

طب و دلوقتي لو اضطريتي تذاكري ماجستير ولا دكتوراه
هتعملي ايه في عمر و حبيبة ؟؟؟
تخيل بقي سبحان الله وانا بذاكر الدبلومة او التمهيدى كنت بذاكر مع عمر وحبيبة على السرير ولا كنت بتأثر ولادى بقي:):):)

[شريف]

لا انا مواليد 36 بصراحة من ايام المعاهدة
36 ؟؟؟؟؟
انا قعدت احسبها طلعت
طلعت 73 سنة ما شاء الله
العمر مش بالسنين
الشباب شباب القلب :)

[شريف]

حرام عليك يا وليد بجد
نعمة لم تتجاوز بعد الثانية و الثلاثين
يعني اصغر عضوة في المنتدي سنا و اكبرهم مقاما
نورتوا الموضوع
و كل سنة وانتو بخيييييييييييييييييييييييير
و سعادة
و لحمة و فتة:)

[نعمه محمود]

حرام عليك يا وليد بجد

نعمة لم تتجاوز بعد الثانية و الثلاثين
يعني اصغر عضوة في المنتدي سنا و اكبرهم مقاما
نورتوا الموضوع
و كل سنة وانتو بخيييييييييييييييييييييييير
و سعادة

و لحمة و فتة:)

قول له والنبي ياشريف


يعني اصغر عضوة في المنتدي سنا و اكبرهم مقاما
نورتوا الموضوع
العفو يا شريف

[امل لاشين]

في الجامعه ..اشتري الكتب والخص في الكتاب نفسه ...


والجمل اللي مش عجباني فيه او زياده عن الهدف من الموضوع اشطبها ..


علشان كده دايما اذاكر بالقلم الرصاص ....:006et4:


مش عاوزة اقولك يا شريف... الكتب عندي عامله ازاي ...بتشتكي مني !!!!


مش من المذاكره لالالالالا....من الكتابه في الهوامش .....


اغنيه شعر اي حاجه ده في حاله السرحااااان..:)


ومش بلخص في ورق خارجي لان خطي خط عباقره اوي ....


ودايما اجيب امتحانات الاعوام الماضيه .....واشوف نظام الاسئله


ودايما توقعاتي للاسئله بتكون بنسبه 80%


ومعرفشي استعمل تلخيص حد من زمايلي ...


لازم انا اللي كون فاهمه وملخصه ...


بس لما ابدا اذاكر ادخل اودتي واقفل بابها .....واتاكد ان مفيش اي صوت ..


كنت عامله ليهم ارهاب ....:16:


والان في الدبلومه.. برده بقفل اودتي مع ان مفيش صوت بس تعود بقي ..


والكتب مازالت تشتكي .......:28:

بس دايما الاغاني ليها معني جميل وقت المذاكره ..:)

وكمان الوحي والخيال ...:friendsxs3:

[شريف]

مش من المذاكره لالالالالا....من الكتابه في الهوامش .....

اغنيه شعر اي حاجه ده في حاله السرحااااان..:)


واضح ان حالة السرحان كانت طويلة اوي :bosyht9:
انا برده كانت كتبي فيها كل الوان الدنيا
من كتر الشطب
بس انا بقا مكانش سرحان
ده كان تتنيح بعيد عنك :)
نورتي يا امل
شكرا الف شكر علي مرورك