المساعد الشخصي الرقمي

مشاهدة النسخة كاملة : للنساء والفتيات الماهرات فقط ــــــــــ طلب عااااجل ومتجدد لمدة عام واحد فقط



محمد عبد العظيم وسية
17-11-2009, 07:43 PM
السلام عليكن ورحمة الله وبركاته ..

بدون مقدمات .. انتوا عارفين اني مستوايا في الطبيخ تحت الصفر بشبرين ، وعلاقتي بالمطبخ علاقة سيئة جدا .. يعني كنت أعرف مكان المطبخ عندي في شقتي طشاش ..

وياما اتحايلت عليا أم سما زوجتي ... اني اتعلم طبخ ... وكنت دائما ........... بكبر دماغي ... ــ

ولما جربت الغربة .... لقيت نفسي لازم أطبخ ...

الزملاء اللي هنا علموني مبدأيا ...

عملت فرخه ... ورز .... ومعكرونة ... حلوه معكرونه دي ...
لكن للأسف اتقدم فيا 3 بلاغات لأقسام الشرطة من المجني عليها معدتي المسكينة ...


ففكرت ... وقولت المعلمات والطالبات الماهرات فقط يعلموني أول بأول ويتابعوا معايا العك اللي هعمله .. قصدي الطبيخ الرائع المذاق ..

والآن ..

ياريت كلكن تشاركن في مساعدة مغترب مسكين وتتابعنه باستمرار ..

وبعد ما أتعلم الأكلات الأساسية ... نخش بقا على الحلويات ... لكن بعدين ...



المهم ..

في الأول عايز أتعلم طبخ

الأرز

والبطاطس أو أي خضار

والمعكرونه .. وياريت كمان المكرونه الباشا ميل ... واللا الباشاميل دي ... ابقى اتعلمها في اعداديه والا ايه ؟؟

المهم ...

تعاطفن معي ....

فأنا بقالي شهر ...

بطبخ ما يلي فقط :

سلق بيض
قلي بطاطس وكمان بيبوظي مني ..:28:

وياريت مستوى الشرح يكون مبسط جدا

لاني مش كي جي ون والا تو طبيخ

أنا مستوايا بكل فخر : محو أميـــــــــــــــــــــــــــــــــــــــــــــــ ة

كريم ماضي
17-11-2009, 07:54 PM
ياحبيب قلبي والله أنت صعبان عليا

أنا عن نفسي هتعلم الطبخ من الان

وطالما بقي جت سيرة المعكرونه ههههههههه يبقي هنا نصيحه
وخلي بالك عز وحيد لو دخل عطالك وصفه تعمل عكسها تماما نصيحه أخويه يعني

وأن شاء الله تتعلم بسرعه
أصول الطبخ وأشهي المأكولات

ولو كده أنا ممكن أجيب لك طرق عمل كل شيئ من علي منتديات الطبيخ

بس عندكم كرنب ولا لاء


ربنا معاك ياأستاذي

بس بجد حلوه الفكره


طبخ من علي النت

يعني تفتح المنتدي وتاخد الخطوات وتعملها هههههههههه فكره جميله والله
\
ربنا معاك ويهون عليك غربتك وينصر مصر بكره

المجاهد فى سبيل الله
17-11-2009, 09:13 PM
ههههههههههههههه
على اتم الاستعداد انى ادى لحضرتك كورس طبيخ
ها تحب نبتدى منين
انا اربع سنين غربة فى الكلية فى بلد تانية غير بلدى و الحمدلله وصلت الى مرحلة الانحراف قصدى الاحتراف
تخيلوا عملت ممبار فى السكن
طالب فى شقة طلبه يعمل ممبار يا سبحان الله
قولى بس حضرتك نبدء منين وانا تحت امر حضرتك

شريف
17-11-2009, 09:52 PM
احم احم
بسم الله الرحمن الرحيم
طريقة عمل الفراخ بالكاري
رجاءا الاهتمام بدقة المقادير

عدد أربعة ورك نملة
نص كيلو ملح من أبو ربع جنيه الباكو
عدد 6 صدر ضفدعة مقتولة
7 جرام فضلات طيور (( حسب الطلب ))
صراصير مطحونة
2 كيلو زيت سيارات من النوع الفاخر
2 فنجان لبن مقطع
معلقة بن صغيرة

الطريقة
يتم خلط كل المقادير السابق ذكرها جيدا في خلاط مستورد
و مع التقليب المستمر يتم اضافة لبن ابل تدريجيا
و علي نار هادية لمدة 72 ساعة
و بالهنا و الشفا
بس مش ليك انت
دي لاصحابك هناك عشان يحبوك و يتوصوا بيك
و ماتستغربش ان مافيش فراخ

الفراخ هنشتريها جاهزة ان شاء الله
و هجيبهالك ليك انت بس مخصوص :)

7asnaa kareem
17-11-2009, 10:36 PM
كيفك مستر محمد
أخبار الغربه ايه؟
لسه ماكالتكش
؟؟؟؟

عموما أنا هقول لحضرتك على أكله سهله جدا ما بيعملهاش غير الكسليه أمثالى

تجيب الفراخ وتقطعها والبطاطس وتقطعها وطماطم وفلفل شرايح
وتحط كل الخبطيطه دى فى صينيه عليهم الملح والسبايسيز بتوعها
وتحطهم على البوتوجاز على نااااااار هاديه جدا
ساعه أو أقل حتلاقى كل حاجه تمام التمام
ويبقى كدا عملت الخضار والفراخ او اللحمه فى خطوه واحده


بالنسبه للرز بقى ف دى اسهل حاجه يعنى لو هتعمل كبايه رز مقدار المياه بتاعها
نفس الكبايه يعنى كبايه مياه برده

وتضيف الملح
لو انت من البشريه التعبانه زى حالاتى تحط الزيت معاهم
لو انت معدتك بتهضم كويس اقدح الزيت وحطه على الرز بعد ما يستوى
وبالهنا والشفا


واهلا بيك فى مطبخ حسناء

ميس سوزان
18-11-2009, 01:06 AM
لا حولة ولا قوة الا بالله
ربنا يعينك يارب
وياريت لو تجرب خلطة أ شريف حلوة اوى على فكرة
متجربة 100% وحتخليك شبعان اوى ومش حتاكل تانى ابدا ابدا
ههههههههههههههههههههههههه


طيب حقول لحضرتك على المكرونة
اول حاجة تجيب حلة وتملاها مية بس مش كلها
وتحطها على النار واول ما تغلى تحط لها معلقة ملح وبعدين كيس مكرونة وتقلبها علشان ما تلزقش فى بعضها او تلزق فى الحلة
وتسيبها 10 دقايق بالظبط لحد ما المكرونة تبقى طرية { ممكن تدوق واحدة } ما تسبهاش اكثر من كده علشان ما تعجنش !!
وتصفيها من المية { ممكن تحطها فى مصفة كبيرة }
وبعدين تجيب الصلصة الجاهزة دى
طبعا حتبقى سميكة وغليظة ودمها تقيل
تروح واخد منها معلقة او اتنين حسب رغبة سيادتكم
وتحط عليها ملح وفلفل وبهارات ....وسمنة او زيت { بسيط } على النار فى نفس حلة المكرونة وممكن تخففها بشوية ميه صغيرين
وبعدين تطفى عليها وتجيب المكرونة من المصفى وتحطها على الصلصة وتقلبها كويس وتغطيها علشان تهدى وبعدين تاكلها بالهنا والشفا

محمد عبد العظيم وسية
18-11-2009, 01:08 AM
ياحبيب قلبي والله أنت صعبان عليا

أنا عن نفسي هتعلم الطبخ من الان

وطالما بقي جت سيرة المعكرونه ههههههههه يبقي هنا نصيحه
وخلي بالك عز وحيد لو دخل عطالك وصفه تعمل عكسها تماما نصيحه أخويه يعني

وأن شاء الله تتعلم بسرعه
أصول الطبخ وأشهي المأكولات

ولو كده أنا ممكن أجيب لك طرق عمل كل شيئ من علي منتديات الطبيخ

بس عندكم كرنب ولا لاء


ربنا معاك ياأستاذي

بس بجد حلوه الفكره


طبخ من علي النت

يعني تفتح المنتدي وتاخد الخطوات وتعملها هههههههههه فكره جميله والله
\
ربنا معاك ويهون عليك غربتك وينصر مصر بكره





كريم دايما يا كريم في ردودك وحضورك
شكرا يا حبيبي على الفكرة
لكن أنا محتاج حد يتابع عكي أول بأول .. قصدي طبخي أول بأول

محمد عبد العظيم وسية
18-11-2009, 01:11 AM
ههههههههههههههه
على اتم الاستعداد انى ادى لحضرتك كورس طبيخ
ها تحب نبتدى منين
انا اربع سنين غربة فى الكلية فى بلد تانية غير بلدى و الحمدلله وصلت الى مرحلة الانحراف قصدى الاحتراف
تخيلوا عملت ممبار فى السكن
طالب فى شقة طلبه يعمل ممبار يا سبحان الله
قولى بس حضرتك نبدء منين وانا تحت امر حضرتك

بارك الله فيك أيها المجاهد الشيف الماهر

بس انا مش عايز اعمل ممبار .... انا عايز يادوب .. اتعلم اطبخ طبختين تلاته يا اخويا ... واقضيها

يعني رز ــ معكرونه بالعين ــ بطاطس ــ بسلة ــ فرخه ــ لحمه ــ
كفايه بقا لأني جوعت بصراحه .

محمد عبد العظيم وسية
18-11-2009, 01:15 AM
احم احم

بسم الله الرحمن الرحيم
طريقة عمل الفراخ بالكاري
رجاءا الاهتمام بدقة المقادير


عدد أربعة ورك نملة
نص كيلو ملح من أبو ربع جنيه الباكو
عدد 6 صدر ضفدعة مقتولة
7 جرام فضلات طيور (( حسب الطلب ))
صراصير مطحونة
2 كيلو زيت سيارات من النوع الفاخر
2 فنجان لبن مقطع
معلقة بن صغيرة


الطريقة
يتم خلط كل المقادير السابق ذكرها جيدا في خلاط مستورد
و مع التقليب المستمر يتم اضافة لبن ابل تدريجيا
و علي نار هادية لمدة 72 ساعة
و بالهنا و الشفا
بس مش ليك انت
دي لاصحابك هناك عشان يحبوك و يتوصوا بيك
و ماتستغربش ان مافيش فراخ


الفراخ هنشتريها جاهزة ان شاء الله
و هجيبهالك ليك انت بس مخصوص :)

واحشني يا غالي يا أيها الفارس الشريف بفتح الشين غرزتين فوق الحاجب الشمال .
ــــــ
جملة واحده هعلق بيها على طبختك الجميلة اللذيذه :


دي واصفه سهله ... دي واصفه هايله .... مع السلامه يا أبو طبخه بايظه ..

لكن أنت نسيت صحيح تقولي حاجه مهمه جدا ....
انا مابحبش وراك النمل ...
ممكن لو جبت صدور نمل مخليه .... تنفع مع الطبخه ؟؟ والا الموضوع هيحتاج طبخه تانيه هايله هايله هايله برضه ؟؟ والا ايه ؟؟

وما تنساش ..

شعر السدر حسين
الكليو 99
الشرف
العذراء
التاريخ

محمد عبد العظيم وسية
18-11-2009, 01:20 AM
كيفك مستر محمد

أخبار الغربه ايه؟
لسه ماكالتكش
؟؟؟؟


عموما أنا هقول لحضرتك على أكله سهله جدا ما بيعملهاش غير الكسليه أمثالى


تجيب الفراخ وتقطعها والبطاطس وتقطعها وطماطم وفلفل شرايح
وتحط كل الخبطيطه دى فى صينيه عليهم الملح والسبايسيز بتوعها
وتحطهم على البوتوجاز على نااااااار هاديه جدا
ساعه أو أقل حتلاقى كل حاجه تمام التمام
ويبقى كدا عملت الخضار والفراخ او اللحمه فى خطوه واحده



بالنسبه للرز بقى ف دى اسهل حاجه يعنى لو هتعمل كبايه رز مقدار المياه بتاعها
نفس الكبايه يعنى كبايه مياه برده


وتضيف الملح
لو انت من البشريه التعبانه زى حالاتى تحط الزيت معاهم
لو انت معدتك بتهضم كويس اقدح الزيت وحطه على الرز بعد ما يستوى
وبالهنا والشفا




واهلا بيك فى مطبخ حسناء

شكرا والله يا حسناء على الوصفه العبقرية دي ..

لكن هيبقى فيه شربه ... بضم الشين ؟؟ والا هتبقى شربه بفتح الشين ؟؟؟
وبعدين ما حطش سمنة أو زبده أو زيت خالص ..
انا متهيألي كل دا يتحرق
وأموت انا من الجوع بسبب مطبخ حسناء يرحب بكم ويتمنى لكم جوعا شهيا

شمس بياض
18-11-2009, 01:41 AM
بقى انتم نقلتم الموضوع اونا عماله اكتب واكتب وبعدين كل اللى كتبته يتحذف
طيب طوووووووووووووووويب
صعبان على ياخوووووووووووووووووى

شمس بياض
18-11-2009, 01:42 AM
استنى بقى لما اكتب لك حاجات بسيطه قوى
وسهله بتكلم جد للمبتدئين اللى زى


























زيى طبعا انت استاذ الكل

محمد عبد العظيم وسية
18-11-2009, 01:49 AM
ياريت الموضوع اتنقل يا أختي ــ دا اتحذف اصلا

شمس بياض
18-11-2009, 01:55 AM
قول بسم الله الرحمن الرحيم الاول


هات فرخه واغسلها كويس


بملح ودقيق
او
عصير ليمون فى ماء
ثم ملحها
واتركها جانبا لحد الميه ماتغلى
ثم اسقط الاتى فى الماء
الفرخه حبايه طماطم ثم بصلايه
ثم قرن فلفل وليمون اسود جاف بيتباع هناك
وشويه هيل اللى هو حبهان وزعتر وبهارات بسيط يعنى عشان القولون


وغطى الحله غطاء موارب
عشان الفوران وكل شويهع تشيل الريم
ثم
وهى داخله على سوا هاتنشل اللحمه او الفراخ من الحله
وتضعها فى طبق
اصبح لديك شوربه اى مرقه لصنع الطبيخ والرز او المكرونه


ناجى للفرخه بقى هاتحمرها ولا تاكل مسلوق ؟
الاسهل ضعها فى الفرن
وحضر ليها الخلطه دهيت


حبيتين تلاته فصوصتوم حكم الفص يعمل طبخه هناك
ثم طمطمايه وبصلايه وفلفلتين خضر مشطشطين


او بلاش عشان القولون
وضع عليهم شويه كمون وفلفل اسود واضبط الملح
واضربهم فى الخلاط
هايطلع لك خلطه تدهن بيها الفراخ من جميع الجوانبع الفراخ المدهونه بالخلطه فى الصينيه وضعها بالفرن
وهدى النار


وهات الصينيه وادهنها زيت درة
ثم قم بالاتى
ضع الفراخ المدهونه بالخلطه او الصوص
فى الصينيه
وضعها فى فرن متوسط الحرارة او هادى و
بص عليها احمرت خرجها وضعها فى الطبق وزينه بحلقات طماطم وخيار
وعود بقدونس دى لحد كده الفراخ بالهنا والشفه ابقى دوقنا :7:

شمس بياض
18-11-2009, 01:59 AM
استنى لما تعرف طريقه عمل الرز والمكرونه

شمس بياض
18-11-2009, 02:24 AM
والله كتبت لك طريقه عمل الرز
ومنه لله النت فصل

:18:

شمس بياض
18-11-2009, 02:30 AM
كيفك مستر محمد

أخبار الغربه ايه؟
لسه ماكالتكش
؟؟؟؟


عموما أنا هقول لحضرتك على أكله سهله جدا ما بيعملهاش غير الكسليه أمثالى


تجيب الفراخ وتقطعها والبطاطس وتقطعها وطماطم وفلفل شرايح
وتحط كل الخبطيطه دى فى صينيه عليهم الملح والسبايسيز بتوعها
وتحطهم على البوتوجاز على نااااااار هاديه جدا
ساعه أو أقل حتلاقى كل حاجه تمام التمام
ويبقى كدا عملت الخضار والفراخ او اللحمه فى خطوه واحده



بالنسبه للرز بقى ف دى اسهل حاجه يعنى لو هتعمل كبايه رز مقدار المياه بتاعها
نفس الكبايه يعنى كبايه مياه برده


وتضيف الملح
لو انت من البشريه التعبانه زى حالاتى تحط الزيت معاهم
لو انت معدتك بتهضم كويس اقدح الزيت وحطه على الرز بعد ما يستوى
وبالهنا والشفا




واهلا بيك فى مطبخ حسناء
هههههههههههههههههه
اوعاك تتبع كلام حسناء
يا شيخه حرام عليك وقفت حالك بنفسك
ليه كده
روحى ياشيخه يرزقك كده بعريس

عنده شغاله
يابنتى الرز دايما بياخد كد وزنه مرتين ماء ايش اللى بتقوليه دهوت

المجاهد فى سبيل الله
18-11-2009, 03:35 AM
نعم
ازاى بياخد وزنه مرتين مية
والله اول مرة اعرف
طول عمرى بعمله كوباية رز قصاده كوباية ماية
و اوقات بعاير الرز و اخلى المية على قد اول عقلة من صبعى
يلا وانقول فى الاخر واختلف الطباخين فى ذالك
اشمعنه كل شوية نقول اختلف الفقهاء فى ذالك

dream
18-11-2009, 09:19 AM
يا عينى عليك

يا وسية يا اخى

الغربة وحشة برضة

صحيحة خليتك تلجا لاخوانك واخواتك

لكن ربنا يقدرك عليها

واى وصفة انت محتاجها قول لى على طول

انت عارف انا تخصص

:28::28:

شمس بياض
18-11-2009, 02:49 PM
مالك ياحاج احمد داخل سخن كده ولا رز مفلفل
اهدى
دا انا بقول مقدار رز اصلها غاظتنى بتقول ضع الرز وعليه الماء وبعدين السمن او الزيت بزمتك دا رز ؟؟؟؟؟؟؟؟

وبعدين انا بعايره الصراحه كده حقيقه ارتفاع اتنين سم فوق الرز تكون المرقه ولانسقيه بالماء
لازم شوربه
يطلع كيف الرز ابو ميه دهوت
طيب خد عنك الطريقه اللى بعمل بيها الرز ابو شعريه

ربع كيلو ارز تمن كيلو شعريه او اقل

ضع ملعقتين من السمن ويستحسن زيت درة فى اناء او دقيه جافه
يعنى اناء صغير
ثم قم بقدحه وضع عليه الشعريه مع الاستمرار بالتقليب على نارهاديه
ثم قم بغسل الرز
وانت بتغسل الرز لاتقلبه كثير حتى لايعجن منك
ثم قم
بوضعه على الشعريه
بعد احمرارها خفيف
يصير لونها بنى فاتح

ثم

قم بالتقليب المستمر مع تهدئه النار

جتى لايشيط

وبعد ان يفك الارتباط بين حبات الرز وتصير كل واحده بمفردها

وتسمع شخلله الرز
ضع الشوربه التى فى درجه الغليان

بالمغرفه واحده واحده مع تهدئه النار حتى لاتفور خارج الاناء وتسبب حرائق

وتكون الشربه بارتفاع اتنين سم اعلى الرز

كده ينفع يا حاج احمد

ثم تغطى الرز بغطاء غير محكم
ونتركه على نار هادئه مع ضبط الملح

ثم بعد ان يتشرب بالمرقه
نطفى عليه النار ونتركه لمدة خمس دقائق محكم الغطاء

ثم نفتح الغطاء ونقلبه حتى يتهوى الارز ولا يتعجن ونغرفه فى طبق ويجمل بشرائح الشيبسى

جرب طريقتى يا استاذ احمد وانت تعرف تدوق الرز على اصوله
والصراحه انا مبعملش بالمكيال
بالبركه اصل عيليتنا كبيرة يعنى
انا اقلها كيلو فى الحله وبالبركة من غير وزن
فانا الصراحة استقللت كوب الميه دهوت عشان الرز هايبقى جاف
فخليتها فريش مرحرحة :006et4:

شمس بياض
18-11-2009, 03:11 PM
لو انت بقى مستعجل على الاكل

اعمل مكرونه محمرة مش هتاخد وقت

برضه معلقتين سمنه وضع عليهم المكرونه كيس المكرونه ممكن ياخد سمن او درة اكتر من كده

فاعمل انت نص الكيس اللى هو نص كيلو
هاتقلب المكرونه لحد ما تلون واحدة صفرا والتانيه بنى ماشى

وتكون انت مسخن المرقه
دى قاعدة عامة واساسيه
لاتضع المرقه باردة على الرز او المكرونه
ولا تضع اللحم او الفراخ على البارد
لازم الماء يكون فىد رجه الغليان واضح؟؟؟؟
وبعد كده تضع المرقه اللى هيه الشوربه عليها
اوعاك تستخدم
مرقات الدجاج المعلبه لانها تسبب انتفاخات وحاجات احنا فى غنى عنها فى الغربه

المهم بعد ما تتلون المكرونه ضيف عليها الشوربه حبه حبه ههههههههه لسه حبه
واضبط الملح والارتفاع اتنين سم اوعاك تنسى القاعدة دهيت فى اى حله يكون ارتفاع الشوربه اتنين سم ولاتعاير ولا توجع قلبك
ماشى
وبعدها تهدى النار وبعد ماتتشرب المرقه اطفى واحكم الغطا وبعد شويه لمده خمس دقائق بعديها اغرف وكل بالهنا والشفا

دى المكرونه المحمرة انتظر طريقه عمل المكرونه الاسباكتى والباشميل
والمسلوقه اللى قالت عليها اختناميس سوزان:18:

المجاهد فى سبيل الله
18-11-2009, 03:31 PM
عن حضرتك الاسبكتى بقى دى لعبتى انا
بص يا استذنا
انت تجيب كيس المكرونه الاسبكتى
و تحط الحله وفيها ماية على النار و تسيب المية تغلى تغلى اوى تغلى خالص
وطبعا تحط فيها شوية زيت و شوية ملح صغيرين علشان يدو المكرونه طعم
و بعد كدا تسقط كيس المكرونة فى المية المغلية
و تغطى عليها او متغطيش مش حتفرق كتير
هى مش بتاخد وقت علشان تستوى اصلا
و تقلبها علشان متلزقش
و طبعا اثناء ما هى بتستوى تكون انت بتحضر الخلطه بتعتها التسبيكه بمعنى تانى
بس بما انك فى غربة يبقى حتجيب برطمان صلصه حتاخد يا دوب على الكيس معلقتين بس منه
و تحط عليه شوية ملح صغيرين و يسلام بقى لو جبت مرقة ماجى و تحطها على الصلصة حتدى طعم كويس
على شوية مية صغيرين جدا جدا
كدا المكرونة استوت مش تخليها تستوى اوى اوى اوى يعنى لا تستوى بس
بعد كدا تصفيها و تسبها
و تجيب حلة تانيه
و تحط فيها شوية زيت على النار و تسقط الصلصه و تسبها شوية
و تسقط الخلطه الى انت عملتها تسبها تتسبك شوية
و بعد كدا تسقط عليها المكرونة و تقلبها بقى
لحد ما تبقى كلها حمرا
و تسبها شوية صغيرين على النار و بكدا تبقى خلصت المكرونة
و بالهناء و الشفاء
وانا مش مسئول على الى حيحصل بعد كدا

7asnaa kareem
19-11-2009, 01:01 AM
ليه الحقيقه المره دى
يعنى كل العمر دا وانا باكل غلط
طب قولولى الحقيقه واحده واحده
خبط لزق كدا
وانا اقول ياختى مالى صحتى فى النازل كدا


أقولك على فكره احسن يا استاذ محمد


جوعوووووو تصحوووووووو


وسيبك من النصايح اللى مش نافعه دى

ميس سوزان
22-11-2009, 01:08 AM
السلام عليكم
اخبار حضرتك ايه؟

هو محدش قال لحضرتك على الباشميل والمكرونة البشاميل اللى باللحمة المفرومة؟؟
اول حاجة حنعصج اللحمة
تجيب بصلة وتقطعها وتحمرها فى الزيت
ولما لونها يتغير تحط لها اللحمة المفرومة وتسيبها تستوى وهى حتنزل مية وحتشربها تانى
وبعدين تحط لها ملح وفلفل وتقلبها كويس اوى وتطفى عليها.
وتسلق مكرونة عادى اكيييييييييد طبعا عرفت ازاى بتتعمل ؟
البشاميل بقى :
ماما لما علمتهولى قالت لى بلاش تحطى عليه بيض علشان لونه حيصفر وحيبقى تقيل فبلاش احسن.
حتجيب نص معلقة سمنة ولما تسيح حط عليها 3 معالق دقيق وسيبه يتحمر ولما لونه يتغير { ما يتحرقش }
حط له لبن كوبايتين او كوباية ونص وقلبه بأستمرار على نار هادية علشان ما يكلكعش وحط له ملح وفلفل
لحد ما قوامه يبقى غليظ طفى عليه.
هات بقى الصينية اللى حتحطها فى الفرن وادهنها زيت خفيف وحط فى القاعدة معلقتين بشاميل ووزعهم
وبعدين حط نص كمية المكرونة وعليها شوية بشاميل ووزعهم برضه وبعدين حط اللحمة المفرومة ووزعها طبعا وبعدين حط نص كمية المكرونة التانية وبعدين غطيها بالبشاميل كلها وحطها فى الفرن 10 دقايق او ربع ساعة وتابعها بأستمرار مش حتاخد وقت .
وبالهنا والشفا
:18:

شمس بياض
22-11-2009, 01:13 AM
تسلم ايدك ياخيتى سوزان انت ماقولتيش يجيب لحمه مفرومه كد ايش
يعنى نص كيلو للصينيه
يا استاذ محمد صينيه متوسطه ونص كيلو مكرونه ريش
وياريت يكون اللبن بارد يعنى مغلى وخارج من التلاجه
دا لايجعل الباشميل تكلكع وياريت نزود الدقيق شويه ونخلى اللبن كوبايتين
هايبقى جميل قوى وتسلم ايدك يا اختى مرة تانيه

أفنان أحمد
22-11-2009, 09:30 AM
الحقيقة يظهر عليكم مدرسين ثانوى الاستاذ بيقول ( محو أمية )
بعنى يا أستاذة شمس بالله عليكِ دى وصفة لمحو الأمية
ده انتِ عقدتينى كل ده علشان أحمر فرخة ....
خليها مسلوقة فى الأول وبعدين المراحل المتطورة بعدين
وصفات سريعة للمبتدئين ( أنا مدرسة ابتدائى )
الأرز : ممكن تضع الماء فوقه - بعد غسله - بمجرد النظر بارتفاع 1سم وشوية و إذا احتاج ماء رش شوية صغيرين والملح و الزيت معاه ( للمبتدئين )( وعلى فكرة كمية الماء بتختلف حسب نوع الأرز )
أما طبخ الخضار أى خضار : تقطع بصلة صغيرة قطع صغيرة ثم تصفر على النار مع فصين ثوم فى السمن أو الزيت ثم تضع اللحم ثم تضيف بعض الماء حسب السوى الذى تريد وعندما يقرب على السوى (نصف سوى يعنى )ويكون الماء قد جف تقريبا أضف عصير الطماطم وعندما يبدأ فى الغليان أضف نوع الخضار الذى تريد وأضف الماء الذى تريد حسب النضج وطبعا البهارات ملح و فلفل وخلافه ( يكون الماء ساخن حتى لا تفقد الخضار قيمته الغذائية) وبالهنا و الشفا

شمس بياض
22-11-2009, 07:45 PM
الحقيقة يظهر عليكم مدرسين ثانوى الاستاذ بيقول ( محو أمية )
بعنى يا أستاذة شمس بالله عليكِ دى وصفة لمحو الأمية
ده انتِ عقدتينى كل ده علشان أحمر فرخة ....
خليها مسلوقة فى الأول وبعدين المراحل المتطورة بعدين
وصفات سريعة للمبتدئين ( أنا مدرسة ابتدائى )
الأرز : ممكن تضع الماء فوقه - بعد غسله - بمجرد النظر بارتفاع 1سم وشوية و إذا احتاج ماء رش شوية صغيرين والملح و الزيت معاه ( للمبتدئين )( وعلى فكرة كمية الماء بتختلف حسب نوع الأرز )
أما طبخ الخضار أى خضار : تقطع بصلة صغيرة قطع صغيرة ثم تصفر على النار مع فصين ثوم فى السمن أو الزيت ثم تضع اللحم ثم تضيف بعض الماء حسب السوى الذى تريد وعندما يقرب على السوى (نصف سوى يعنى )ويكون الماء قد جف تقريبا أضف عصير الطماطم وعندما يبدأ فى الغليان أضف نوع الخضار الذى تريد وأضف الماء الذى تريد حسب النضج وطبعا البهارات ملح و فلفل وخلافه ( يكون الماء ساخن حتى لا تفقد الخضار قيمته الغذائية) وبالهنا و الشفا
مسلوقه حرام عليك يا افنان مسلوقه
وفى الغربه كمان لاع بقى دا لازم ياكل احسن اكل
وبعدين دا تلميذ ممتاز لازم ياخد اللى فى مستواه
وكمان رز ابيض بميه حرام عليك خلى نفسه تتفتح مش كفايه الغربه يبقى اكل عيانين كمان دهدى
بالنسبه للخضار كده كويس
اوعاك تضع السبانخ واللحمه مع بعضيهم
السبانخ بتغير طعم اللحمة

المجاهد فى سبيل الله
22-11-2009, 08:23 PM
استنوا بقى
حقولك حتة اكله يا استاذ محمد لسه عارفها امبارح
اسمها بقبقا
مش عارف اصلا انا كتبتها كدا صح ولا لا
بس بجد اكله تحفه اكلتها من هنا
ومش راضى اقول لحضرتك ايه الى حصلى
هى اكله ليبية
وهى عبارة عن توفير فى كل حاجه
لانك بتحط البطاطس على اللحمة على شوية رز على مكرونه كله فى حله واحده
لو عجبك الاسم ابقى اقولك الوصفه
ولا هو انت صحيح مسافر فين
اقولك تعمل المدفونة ازاى
ولا الكبسة السعودية
انت تامر بس اختارلك اكله و انا تحت امرك بقول لحضرتك ايه اجى اطبخلك انا