طور نفسك ... من كتاب استمتع بحياتك

[ميس سوزان]

السلام على من اتبع السلام

نزلت مرة الكلية السنة اللى فاتت وكالعادة المواصلات اخرتنى والمحاضرة راحت عليا وحاولت ادخل والدكتور طردنى ادام الدفعة كلها الحمد لله.
:18:
كنت لوحدى وكانوا عاملين معرض سنوى فى الكلية فدخلت واتفرجت على الحاجات اللى فيه ولقيت كتاب اسمه استمتع بحياتك ل د. محمد بن عبد الرحمن العريفى اكييييد فيه منكم قراه اوسمع عنه قبل كده
المهم لقيته ب13 جنيه مش غالى بس كنت فرحانة بيه جدا كأنى لقيت كنز .

ولفت انتباهى عناوين كتير حلوة منها طور نفسك وبأختصار الراجل كان بيحكى فيها ويقول :

ممكن تعد تتكلم مع واحد عنده 25 سنة وبعد 10 سنين ترجع وتتكلم معاه برده وتلاقيه زى ما هو ما اتغيرش !!

طيب تيجى نتأمل الناس عاملة ازاى لما مثلا بيتفرجوا على التلفزيون فيه منهم بيهتم بالاخبار وبرامج المعلومات والبرامج الثقافية المفيدة والدينية .......
وفيه منهم لا حولة ولا قوة الا بالله مفيش فيلم ولا مسلسل ولا فيديو كليب الا ولازم يتابعه اكتر من مرة!!
حتى فى القراءة فيه منهم بيدور على المجلات الهادقة وفيه بيدور على الهيافة و ......

طيب تعالوا نبص لهم بعد 5 او 10 سنين مين فيهم اللى حيتطور اكثر فى مهاراته؟
فى قدرته على الاستيعاب ؟ فى الثقافة والقدرة على الاقناع ؟واسلوب التعامل مع الاحداث ؟

وبدأ يحكى لنا قصه رجل اسمه عبد الله .... كان راجل متحتمس لدينه بس كان ينقصه بعض المهارات .
راح مرة علشان يصلى الظهر وهو فى الطريق لقى واحد فوق نخلة بيشتغل وبيلم البلح فقال بينه وبين نفسه : ايه ده شغال عادى كده ولا كأن فيه صلاة ولا حاجة
راح مزعق له وقال له: انزل للصلاة .
فالراجل قاله ببرود : طيب طيب .
راح عبد الله اتنرفز اكتر وقاله : انزل بسرعة يا حماااااااااااااااااااار !!
الراجل قاله : انا حمار طيبب ولله لانزل اكسر دماغك .
راح عبد الله غطى وشه وطلع يجرى بسرعة قبل ما الراجل يعرف شكله .

وحان وقت صلاة العصر ومشى عبد الله من نفس الطريق ولقى نفس الراجل راح مغير اسلوبه وقال : السلام عليكم , كيف الحال و واخبار الثمار السنة دى ايه ؟؟
فالراجل :رد السلام وقاله الحمد لله تمام .
قال عبد الله : ربنا يكرمك ويوسع عليك رزقك بالحلال ويبعد عنك ولاد الحرام .
فالراجل انبسط اوى من الدعاء ده وامن عليه وشكره
فقاله عبد الله : واضح انك مشغول جدا فى الشغل ومخدتش بالك من صلاة العصر فايه رأيك تنزل منها ترتاح شوية وفى نفس الوقت تصلى علشان ربنا يبارك لك .. ها ايه رأيك ؟
قاله الراجل : صح عندك حق ان شاء الله حنزل اهه
وبدأ ينزل فعلا وسلم عليه بحرارة شديدة والابتسامه على وشه وقاله يااااااا سلام على اخلاقك الرائعة دى، مش التانى اللى قابلنى فى صلاة الظهر، بس لو اشوفه حعرفه مين فينا الحمار !!
ههههههههههههههههههههههههههههههههههههههههه

النتيجة : ان مهارتك فى التعامل مع الاخرين على اساسها تتحدد طريقة تعامل الناس معك .
عامل الناس بمثل ما تحب ان يعاملوك به .

تحـــــ:6::38::27:ـــــــــــــياتى

[محب الخطاب]

جزاك الله خيرا
والحقيقة أن الانسان ينبغي أن يراجع نفسه بالمحاسبة كل فترة ليري ان كان انتقل سلبيا أو ايجابيا عملا بنصيحة النبي (ص)(حاسبو انفسكم قبل ان تحاسبوا)
ياليت( بعض )الدعاة يقرأوا المثال الذي طرحتيه حضرتك ليعيدوا قراءة أنفس الناس التي تستجيب للرفق وحسن المعاملة قبل أن تستجيب للمنطق المجرد
اطلالة قيمة من حضرتك وشوقتينا للبحث عن الكتاب المذكور
ومرة اخر ي
جزاك الله خيرا

[ميس سوزان]

جزانا واياكم
كلام حضرتك جميل جدا

على فكرة الكتاب لقيت منه كتير ومرة رحت عند واحدة صحبتى لقيته عندها بس الطبعة كانت مختلفة .
نورتنى
:18:

[امل لاشين]

النتيجة : ان مهارتك فى التعامل مع الاخرين على اساسها تتحدد طريقة تعامل الناس معك .
عامل الناس بمثل ما تحب ان يعاملوك به .






ياريت فعلا يكون ده المبدا اللي بيسود في المجتمع

وقتها ممكن تتحل اغلب المشاكل ...

والاسلام دين معامله ..يعني حسن معامله الغير من طبيعه دينا ....

فاذا تعاملنا مع الناس بالحسني يرضي عننا الله

الحمدلله علي نعمه الاسلام ....

موضوع جميل ياسوزان ...جزاكي الله كل خير ...

[ميس سوزان]

فعلا الحمد لله على نعمة الاسلام
بس نفهمه صح ونكون مسلمين بجد
نورتينى
ربنا يكرمك
احبك فى الله

[ندى ابوشامية]

والله فعلا بس الحكاية اساسها العصبية

[ميس سوزان]

قال تعالى : { والكاظمين الغيظ والعافين عن الناس والله يحب المحسنين }
ده حتى الرسول عليه الصلاة والسلام كان بيتعرض لاذى المشركين يعنى احنا مشاكلنا جنبه ولا حاجة
وده اللى بيصبر الواحد بصراحة لما بيتعرض لمشاكل وضغط عصبى
الحمد لله بستخير ربنا فى كل امورى وباخد قرار نهائى فى منتهى الهدوء مهما اللى ادامى استفزنى
نورتينى يا ندى

[دعاء شديد]

السلام على من اتبع السلام

وعليكم السلام ورحمة الله وبركاته



طيب تيجى نتأمل الناس عاملة ازاى لما مثلا بيتفرجوا على التلفزيون فيه منهم بيهتم بالاخبار وبرامج المعلومات والبرامج الثقافية المفيدة والدينية .......
وفيه منهم لا حولة ولا قوة الا بالله مفيش فيلم ولا مسلسل ولا فيديو كليب الا ولازم يتابعه اكتر من مرة!!
حتى فى القراءة فيه منهم بيدور على المجلات الهادقة وفيه بيدور على الهيافة و ......


طيب تعالوا نبص لهم بعد 5 او 10 سنين مين فيهم اللى حيتطور اكثر فى مهاراته؟
فى قدرته على الاستيعاب ؟ فى الثقافة والقدرة على الاقناع ؟واسلوب التعامل مع الاحداث ؟




اقولك رأيي البسيط

مش مهم الناس تشوف ايه فى التليفزيون
برامج ثقافيه ولا مسلسلات
الاهم الناس بتشوفها ازاى ؟؟؟؟

وهنا فعلا "بيت القصيد"
ممكن حد يشوف برامج ثقافيه
لكن اذا اتكلمتى معاه تلاقى معلوماته = 0
وممكن حد يشوف مسلسل يتعلم منه حاجة فعلا
يعنى الاهم احنا بنشوف ازاى اى حاجة حوالينا
مش بس فى التلفزيون
ازاى بنشوفها وبنتعلم منها
وعلى فكرة المسلسلات والافلام ... قصص واقعيه
بس لم نصادفها
وعلشان كده بنرفضها وبنثور عليها

وانا كان ده راي ... لحد محصلت ادامى قصه
زى مشفتها بالظبط ... وكان وقتها رايي
ان القصه دى لا يمكن تكون واقع
وانه درب من الخيال حدوثها

ومن وقتها ... بجد اتغيرت نظرتى للأمور تماما
مبقاش فى حاجة مستبعده
ومبقاش فى حاجة هايفه او تافهه
لازم اتعلم منها حاجة

مش كده ولا ايه؟؟؟؟؟

[ميس سوزان]

صح كلامك جدا يا دودو
وانا معاكى فيه ان دى قصص واقعية
وعلى فكرة انا لازم اتابع مسلسل ولما يخلص اتابع غيره
الراجل هنا بيتكلم عن الناس اللى حياتهم كلها كده مش بيعمل فيها حاجة وليل نهار بيتفرج على مسلسلات وافلام وحافظ الجديد من الاغانى اول بأول ومش بيتعلم منها اصلا ولا فى دماغه حاجة { هايف } علشان كده بيفضل محلك سر مش بيتغير ولا بيتطور حتى ولو بعد سنين
وده عنوان الموضوع { طور نفسك }

نورتينى يا قمر
يا شدييييييييد انت
:18::6::38:

[شريف]

تسلم ايدك يا ميس سوزان والله
و منتظرين باقي الكتاب هههههه

[ميس سوزان]

ههههههههههههههه
حضرتك داخل على طمع يا أ شريف ولا ايه؟؟؟
حاضر
ححاول اكتب اى عناويين تانية من الكتاب
بس ما تحلموش مش حكتب الكتاب كله
لازم تنفعوا الراجل وتشتروه
هههههههههههههههه

[عبــــدالــــرحمـــــن]

قصه جميله
ونهايه جميل
مصدقآ لقول ربنا
فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ

[ميس سوزان]

قصه جميله
ونهايه جميل
مصدقآ لقول ربنا
فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ


حضرتك اللى جميل يا amrelblassy
جزاك الله خيرا
نورتنى
يارب المنتدى يعجب حضرتك وتكبر فيه أكتر واكتر وتورنا دايما كده